1Natiu, uring
au reirei ma au taeka
ao iri nanoia ni kabane.
2A na bon buokiko ni waakin
maium ao n anganiko te teetekeraoi.
3Ke e nooraki iroum n taai nako
te tangira ma te kakaonimaki kaanga te m'ae n roroa,
ao koroi inanom.
4E na tangiriko te Atua ma aomata
ao a na atongko b'a ko tokanikai.
5Ko na onimakina te UEA
ma nanom ni kabane
ao tai onimakina ana babaaire nanom.
6Karikia n taai nako b'a te tia kairiko,
ao e na kaitiaka te kawai
b'a ko aonga n ri mwiina.
7Ko na tai iangoia n taai nako
b'a ko rangi ni wanawana,
ma ko na karinea te UEA
ao kararoako man taian buakaka.
8E na kamarurungko te aro aei
ao e na anganiko te korakora.
9Karinea te UEA n anganna
am m'ane
ao moan m'akoron
uaan arokam ni kabane.
10Ao ane e na reke iroum
taiani uita ma kureebe ae e m'aiti
riki nakon ae ko kainanoia.
11Natiu, ko na aki rairaki nako
ke ni karikiko b'a baika a maai
ngkana e boaiko te UEA.
12E boaiia ni kabane te UEA
aomata aika e tangiriia,
n ai aroia kaaro aika a boaiia
natiia ae maamaten nanoia.
Kakaawakin te Wanawana13E kakab'aiaia aomata ni kabane te Atua
aika iai irouia te wanawana.
14E kakaawaki riki te wanawana
nakon te tirewa;
e na kakorakoraa kaub'aim
riki nakon te koora.
15E kakaawaki riki te wanawana
nakon te b'ai ni katamaroa ae e raoiroi;
akea te b'ai ae ko tangiria
ae e konaa ni kabotauaki ma ngaia.
16I nanon bain te wanawana are te atai
e mena iai te maiu ae e anaanau
ao ni baina are te maing
bon taian kaub'ai ma taiani karineaki.
17E kakukureia te maiu te wanawana
ao e kairiira ni kaawakiniira i aon kawaira.
18Bon te aroka ae e anga te maiu te wanawana,
bon te tabo ike e nako mai iai te kukurei
i bukiia ni kabane akana a taumatoaia.
19E karika karawa ma aonnaba te UEA
n rabakauna
ma wanawanana.
20N ana ataib'ai
e katabwena marawa are i karawa
ao e kanakoa nangnikarau ao e kab'aka te karau.
21Natiu, kamanena am iango
ao ana babaaire nanom ae e raoiroi!
Kaawakinna inanom n taai nako.
22A na bon buokiko ni
kaanaanaua ma ni katamaroa maium.
23Ko na nakonako raoi
ao a na aki toki waem;
24ko na motirawa ma te aki raraoma
ao ko na matu raoi.
25Ma ngaia ae, ko na aki maaku
n taiani kabuanib'ai aika a karina
ke taian angibuaka aika a na oroia
aika a buakaka.
26Ko na bon kakoaua
b'a e na bon kaawakiniko
te UEA man taian kabuanib'ai.
27Ko na karaoi b'aai ni kabane ane ko konaa ni karaoia nakoia aomata nako
akana a kainanoa am buobuoki.
28Ko na aki tuanga kaain rarikim
b'a e na manga oki nakon te ingabong,
ngkana ko konaa ni buokia n te bong aei.
29Ko na aki kataia ni kakeaa bonganam
nakoia kaain rarikim aika a onimakiniko.
30Ko na aki ngurengure ti i bukin te kan ngurengure
ngkana ko bon aki maraki.
31Ko na aki mataaiakiniia
aomata aika a iowawa
ke ni katotongia aroia.
32E aki tangiriia aomata te UEA
aika a karaoa ae e buakaka,
ma e karikiia aomata aika raoiroi
b'a raaraona.
33E kab'aka te karereanti i aon mwengaia
aomata nako aika a buakaka,
ma e kakab'aiai mwengaia
aomata ni kabane aika a raoiroi.
34E kaenaena te UEA
nakoia akana a kaenaena naba,
ma e akoia ni kabane
aika a nanorinano.
35Kam na neboaki
ngkana kam rabakau
ma kam na kamamaaeaki
ngkana kam nanobaba man taningabono.
Who We AreWhat We EelieveWhat We Do
2025 by iamachristian.org,Inc All rights reserved.
