Itaia 24 - Kiribati New Version Bible

Katuaaean Te Aonnaaba

1E nang minota te aonnaba te UEA n urua teina ma n onikia nakon te rereua. A na bane ni maae nako aomata nako,

2n reitaki ma ake bon aomata ao taiani ibonga, tooro ao tooro ake aia taani m'akuri taani b'aib'ai, taani kaboob'ai ao taani kabonako b'aai, taani kairiiri ao taan tangob'ai, kaub'ai ao ake a maiu ni kainano.

3E na kanakoaki ni kakeaaki te aonnaba ao e na tiku n aron anne. Bon anne ana berita te UEA.

4E a bane tain te aonnaba;

a na mauna nako ana taani kairiiri

n riki n akea manenaia.

5E a kam'araa te aonnaba

i bukiia aomatana

aika a aki ongotaeka nakon ana tua nako te Atua,

ma n urui aia booraraoi

are akea tokiia.

6E a b'akaraki te aonnaba n te maraia;

a mate aomatana

i bukin aia bure.

7A m'autakataka taian nne n aroka ni kureebe:

a kani bane n akea taian aroka kureebe

e ongo te aba taian tang

n onei mwiin taian takaakaa ni kukurei.

8Bon akea ae e manga katanga taian timbere

ke b'aai n katangitang aika taian karai;

a bane n toki

taian karongoaa ni kukurei.

9A aki manga anene ngkana

a mooi n te wain,

ao e a maai i nanon te wii.

10A onrake ma ni mangaongao taiani kaawa;

ao a rokanaki ni kamatoaaki taian auti.

11A mauna nako taai ni kukurei

man te aonnaba,

ao a takaarua aomata ni kawain nako te kaawa ni kaangai,

“E a bane ara wain!”

12A uruakaki taiani kaawa aika a buubura;

ao a kamaaenikunaki ni kab'akaaki mataroan taiani kaawa.

13A na taekaki nako botannaomata

kaanga taian kai aika oriwa

ke nne n aroka ni kureebe

i mwiin te bong n tai.

Neboan Te UEA I bukin Ana Motikitaeka Ae E Eti

14A na takaarua aomata ake i maeao;

a na neboa

teuare E Karineaki ma te kukurei.

15Ai ngaia are, a na riai n neboa te UEA,

ae Atuan Iteraera

aomata ni kabane ake i mainiku

ao aomata ake i aon taian abam'akoro.

16E na ongo te aba taian anene n nebo

i bukin ana motikitaeka ae eti te Atua.

Ma e rangi ni korakora

ma n aki rau n te rawaawata n nano.

Bon iai ae e konaa n onimakinaki?

Bon angiina taani kewe!

Akea Te Birinako

17A tataningaia aomata nako

baika a kakamaaku, b'aai ni kam'ane, ao taian ruarua.

18Ane ko na b'aka i nanon te ruarua

ngkana ko maaku ma ni biri nako;

ao ngkana ko manga kawanako man te ruarua,

ko na manga m'ane ni b'aai ni kam'ane.

E a tia ni bwenauaaki karawa

kaanga te winto ae e kaukaki.

A tia n ruru

bouan aan te aonnaba;

19E na rina n uruaki te aonnaba,

ma ni maaerikiriki.

20E na bebebebe ma ni ioioaki

kaanga te koro ni manging.

ke te um'a ae e uarereke n tain te angibuaka.

E na taonaki rikaaki n te bure;

e na b'aka te aonnaba,

ao e na aki manga teirake.

21E na katuaaia

taian m'aaka

ake i karawa

ao uean nako te aonnaba

te UEA n te bong arei.

22E na kab'akaia uea nako nanon taiani m'arua

ma ni kaawakiniia kaanga buure.

Ao rimwi riki,

e na katuaaia.

23A na kaai ni kamaamaaeaki ma ni kab'ainrangaki

nam'akaina ma taai.

E na tautaeka te UEA ae Moan te M'aaka

i aon te Maunga are Tion i Ierutarem,

ike e na kaota iai nakoia ana taan tautaeka

kamimiin mimitongina.