Warekaia Iteraera 35 - Kiribati New Version Bible

Aia Kaawa Kanoan Rewi

1Ngke a bon tabe ni maeka Iteraera n aaba ake a rinano i Moaba i rarikin te Karaanga are te Ioretan ni kaaitaraa Ieriko n iteran te karaanga are teuana, ao E tuanga Moote te UEA

2b'a e na kaangai nakoia:

Ngkana e reke iroumi aban ami baronga nako, ao kam na anga kaawana tabeua ma tawaana ni uteute tabeua nakoia te baronga are Rewi.

3Ao a na kona iai kanoan Rewi n reke aia kaawa ake a na maeka iai, ao aia katawanang ni uteute ike a na am'am'arake iai aia man.

4A na riai n tikuea tein taian tawaana n uteute ake a katobibi kaawa aikai n tatabeua nako, ao e na mena i nuuka te kaawa.

5A na riai ni koro 3,000 te buuti ab'akin iterana nako, ao 1,500 te buuti man te kaawa nakon tokin te tawaana ni uteute. A na riki aikai b'a aia tawaana ni uteute kanoan Rewi.

6A na riki onoua te kaawa man ake kam anganiia, b'a taiani Kaawa ni Kamauri, ike e na kona ni kamanoaki iai te aomata ae tiringa te aomata temanna n tiaki nanona. Ma kam na riai naba n anganiia kanoan Rewi abwi ma uoua riki kaawa tabeua,

7b'a aonga n reke m'aitin aia kaawa ae abwi ma mm'aane aika a airi ma tawaana n uteute i rarikiia.

8Ao i bukina ngke a reke aia kaawa kanoan Rewi man abaia taiani baronga, ma ngaia are, e na bon m'aiti riki ana kaawa ae anga te baronga ae buubura nakon te baronga ae uarereke.

Kaawa ni Kamauri i bukiia aika birinako(Te Tua 19.1-13; Iotua 20.1-9)

9Ao te UEA. E tuanga Moote b'a

10e na kaangai nakoia Iteraera:

Ngkana kam tia n ri aon te Karaanga are te Ioretan ma ni maeka i Kanaan,

11ao kam na rinei taiani Kaawa ni Kamauri, ike e na kona ni birinako ni karabaa iai te aomata ae tiringa te aomata temanna n tiaki nanona.

12B'a ngkana a na irantaanga ana utu teuare e tiringaki, E na kona ni birinako te aomata are bukinaki n tiritiri nakon Kaawa ni Kamauri aikanne ni kamanoa iai b'a e aonga n aki tiringaki i m'aain kabowiana.

13A na riai n reke onoua Kaawa ni Kamauri,

14A na reke kaka tenua n iteran te Karaanga are te Ioretan ake uoua.

15Ana riki b'a taabo ni kamauri nakoia aomata ake a maeka i aon Iteraera ake a tiritiri n tiaki nanoia.

Tuua I bukin Taian Tiritiri, Ao Tiritiri Aika Aki Kantaningaaki

Ao E taku te UEA:

16Ngkana ko orea te aomata temanna n te m'akoro ni biti,

17ke te atiibu ae buubura, ke te kai.

18Ao ngkana e a ti mate naba te aomata anne, ao ko a reke n te tiriaomata, ao ko a riai n tiringaki

19iroun temanna ana utu teuare e mate. E na bon irantaanga i bukin maten ana koraki n te tai naba are ko reke iai irouna.

20Ngkana ko un, ao e a ti mate naba konam ngke ko butuia, ke ko oreia, ke ko kareia n te b'ai teuana.

21Ko a reke n te bure, ao ko a riai n tiringaki iroun temanna ana utu ni kaan te mate.

22Ma ngkana tao arona b'a bon akea unim iroun te aomata, ke akea naba ribaakina iroum,

23ao e a ti mate naba tao ngke ko butuia ke ko kareia.

24A na kabowi kaain te kaawa ni baairea taekam.

25Ngkana ko aki reke ni bure, ao ko na kaawakinaki mairouia ana utu te mate, ao ko na kanakoaki nakon Kaawa ni Kamauri ni karokoa te tai are mate iai te ibonga are rietaata.

26Ma ngkana ko bon kiitana te Kaawa ni Kamauri

27ao ko a tiringaki irouia ana utu te mate, ao a na bon aki kona ni katuaaeaki iai i bukin kamateakim.

28Ko na tiku i nanon te Kaawa ni Kamauri ni karokoa maten te ibonga are rietaata, ao ko a tib'a kona ngkanne n okira mwengam.

29A na riai n ongotaeka nakon taian tua aikai te botaki ni Iteraera.

30Tuaan te tiriaomata bon te mate. E na bon aki tiringaki te aomata ngkana e bukinaki n tiritiri, ma ti ngkana a reke uoman taani kakoaua n ana bure.

31Kam na aki anga te m'ane b'a kam aonga n aki katuaaeaki n tiringaki; e na bon kabooaki ni maiumi!

32Ngkana ko a tia ni kakoauaaki b'a bon akea am bure, ao ko a boni maeka n te Kaawa ni Kamauri, ao ko bon aki kona naba ni kabooa otinakom n okira am auti; ko na bon tiku ikanne ni karokoa maten te ibonga are rietaata.

33Bon te UEA Ngai ae I maeka i buakomi Iteraera, ma ngaia are, e riai ni kaawakinaki itiakin abami. B'a ngkana iai te tiritiri, ao e na b'aro te raraa n tanon te aba, ao e na kam'araea.

34Ngkana e riki anne, ao e na tiringaki te tia tiritiri, b'a e aonga ni manga itiaki te aba. Tai karaoa te m'akuri n tiritiri mai aon Iteraera!