1Te UEA, Ko na un ma aiau n un,
ao ekianako nako akana eekainako!
2Anaa te otanga ae ab'ab'aki ma ae karako,
ao nako mai buokai.
3Katauraoa am kainiwai ma am angaraa
n un ni kaitaraia akana kan rawea maiu,
ao ni berita b'a ko na kamaiuai.
4A na baka ni baba ma ni b'ainrang
akana kani kamateai;
A na oki rikaaki ma te nako n nano
akana iangoa aroni kam'aruaau!
5A na kakioaki iroun ana anera te UEA,
ao a na riki n ai aroni kunin te uteute ae ukaki nako n te ang!
6A na roo kawaia ma ni kamaranran
n aia tai ni kakioaki iroun ana anera te UEA!
7A katauraoa te b'ai ni kam'am'ane i buku
ao a kena te kinono b'a N na b'aka iai
8Ma ane a na taonaki n te kabuanib'ai ae na roko ni kakuba nakoia;
Ane a na boni m'aane n aia b'ai ni kam'am'ane,
Ao a na b'aka ni kabuanib'ai i
nanon aia kinono.
9Ao N na kakatonga i bukin te bae E a tia ni karaoia te UEA;
N na kim'areirei b'a E a tia ni kamaiuai.
10N na taetae ma nanou ni koaua ni kaangai,
“Akea n ai arom:
b'a Ko kawakinia akana mamara mairouia akana korakora,
ao akana akea aia b'ai mairouia akana b'ainikirina te aba.”
11Iai ake a kewe n aia kaotioti i buku;
Ao a bukinai b'a I karaoi m'akuri ni kakeru aika I aki atai.
12A kaboa mwin au m'akuri ae e raoiroi n te buakaka,
Ao I taonaki n te rawaawata.
13Ma ngke a aoraki, ao I kaota ae I rangi n nanokawaki;
I kataua te aki mamatam;
Ao I tataro ma te nanokawaki ae bati i bukiia,
14N ai aron ae I tataro i bukin raoraou ke tariu.
I nanakonako ni katobibi ni bobobaraki n tanginiwenei,
N ai aron temanna ae b'ab'aeb'aeta nanona ni maten tinana.
15Ma ngke I a reke n te kaangaanga, Ao a bane ni kukurei,
ao a bootaki ni b'ainingareai;
a oreai ake I aki kinaia,
ao akea tokin aia oro.
16Ai aroia aomata ake a b'ainingarea ae m'auku,
ngke a kangengei wiia nako iu.
17Te Uea, tao maanraa Ngkoe n tarataraai n arou aio?
Kamaiuai mairouia raian aikai
ngkana a eekainako!
18Ao N na katituaraoiko n tain aia bootaki ae ab'ab'aki am Aomata;
N na katituaraoiko i mataia ni kabaneia.
19Tai kariaia taan ribaai, ake taani kewe,
b'a a na ngareakinai;
Ao a na tai katou mataia aiau
akana akea bukin riribaakiu irouia.
20A aki taetae n i raorao;
ma ti te karioi taeka ni kewe b'a
taekaia ake a tatangira reken te rau.
21A kaure wiia n takaarua ni kaangai,
“Ti nora te baere ko karaoia!”
22Te UEA, Ko noori b'aai nako!
Ma ngaia ae tai kainab'aabu.
Tai kararoako!
23Te UEA, kauti matam, ao buokai;
Tei rake, te Atua ae au Uea, ao taetae i buku.
24Te UEA ae Atuau, kaeta taekau n ai aron am raoiroi,
ao a na aki ngareakinai aiau.
25Tai kariaia b'a a na kangai i nanoia,
“E a koro bukin are ti tangiria!
B'a e a tia arona!
26A na baka ni baba ma ni bua aia iango
akana ngareakinai n rawaawatau.
A na taonaki n te mamaa ma te b'ainrang
akana kamoamoaia n taku b'a a raoiroi riki nako iu.
27A na takaakaa ni kakatonga akana tangira kaetan taekau,
Ao a na kaokioka atongan ae kaangai,
“Ai kakannato ra te UEA!
E kukurei nanona n ana tokanikai ana toro”
28Ao N na tataekina raoiroim,
Ao N na neboneboiko ni kabongnga.
Who We AreWhat We EelieveWhat We Do
2025 by iamachristian.org,Inc All rights reserved.
