Ieremia 30 - Kiribati New Version Bible

E Na Kamaiua Iteraera Ao Iuta Te UEA

1E taku te UEA ae Atuaia Iteraera

2nako iu: “Ko na koroi ni kabane i aon te boki b'aai ni kabane aika I tuangko,

3N te bong teuana ao a na oki Au aomata aika uakoraki aika Iteraera ma Iuta nakon abaia are I anganiia aia bakatibu.”

4E taku te UEA nako ia Iteraera ma Iuta:

5“I ongo te tangi ni maaku,

tangin te maroaa b'a akea te rau.

6E konaa ni bungia natina te mm'aane?

Ao e aera ngkai I nooriia

b'a a rangi ni mainarake

ma n tautaua birotoia

kaanga te aine ae e ariri b'a e nang bung?

7Au aomata, e na rangi ni korakora riki marakimi nakon are mai i m'aaina

n te tai ae e aki maan mangkai,

ma N na kamaiungkami.

8Kam a riki b'a aia toro ngkai

botannaomata ake tekorakina,

ma N na motiki aia tiein

ao N na urui amoia

ake a tautoroningkami.

9Ao i mwiina, kam na riki b'a au tia m'akuri,

ao N na rinea te uea maibuakomi

man ana utu Tawita.

10Iteraera, bon au aomata ngkami,

ma ngaia ae kam na aki maaku.

Iteraera, kam na aki nim'atoaua.

N na kamaiungkami man te aba are e raroa nako,

man te aba are kam kataenikaiaki ngkoa iai

kam na oki nakon mwengami ao kam na maiu ma te rau;

Ane kam na mano raoi, ao akea ae e na konaa ni kakamaakuingkami.

11N na roko iroumi ni kamaiungkami.

N na kamaunaiia botannaomata ni kabane

ake I kamaaenakoingkami nako ia,

ma N na bon aki urua aromi.

N na bon katuaaingkami ngkana I kanakoingkami;

ma N na bon katuaaingkami n te aro ae e riai.

Bon aei Au taeka Ngai ae te UEA.

12E taku te UEA:

Au aomata, kam a ikoaki

ao kam a kani mate.

13Kam bukinaki ni karaoa te bure

ao akea ae e konaa n tei i bukimi,

ao kam a onrake n taiani maneka

ae akea b'ainaorakiia ae a na mao iai.

14A bane ni m'aninga taekami raraomi;

a aki manga tabe ma ngkami.

I a tia ni buakaningkami kaanga te kairiribai;

ao e rangi ni kamaraki katuaaeami

i bukina ngkai a m'aiti ami bure

ao a rangi ni korakora buakakami.

15Katoki ngurenguremi i bukin ikoakimi;

bon akea b'ainaorakiami.

N na katuaaingkami n aron aei

i bukina ngke a m'aiti ami bure

ao a rangi ni korakora ami buakaka.

16Ma ngkana a kataia ami kairiribai ni kimoaingkami

ke ni uruana aromii,

ao N na manga kimoaia ma n uruana aroia,

ao a na uotaki nako b'a taian taenikai

nakon abaia ianena.

17Akea ae e tangiria n riki b'a raoraomi

ke n tabe n te b'ai ae e riki nako imi.

Ma N na kamaoi ikoakimi,

ao kam na manga marurung.

E Na Kamaiuia Iteraera Ao Iuta Te UEA

18E taku te UEA:

Kaain Iteraera, N na akoingkami

ma ni kanakoingkami nakoni mwengami.

E a wene n uruaki ngkai Iteraera,

ma kam na manga kateia, ni katiaa ma te bareti ae e boou.

19A na karineingkami ma n neboingkami

botannaomata ake tabeua.

A na kaonaki mwengami

irouia ataei,

ao kam na bukamaru,

ma n anene n neboai.

20E na riki kaanga taai ake ngkoa.

Ane a na taromauriai ami botannaomata,

ao N na katuuaia ni kabane akana a kabuakakaingkami.

21E na riki b'a ami tia tautaeka

temanna mai buakoia oin ami aomata.

Ao ngkana I kaoa

b'a e na roko ni kaaniai

n te tabo n taromauri,

e na bon karaoa anne.

Bon akea ae konaa n roko ni kaaniai

ngkana e aki kaoaki.

22Kam na riki b'a Au aomata,

ao Ngai N na riki b'a Atuami.

Bon aei Au taeka Ngai ae te UEA.

23I rangi n un!

N na riki kaanga te angibuaka ae e korakora

n oroia aika

a karaoa te kaairua.

24E na bon aki toki uniu

ni karokoa e bane raoi

te b'ai ae I a tia ni baaireia b'a N na karaoia.

N te bong teuana, ao kam na ataa

te b'ai ae I nanonna.