1Nako mai, ti na anene nakon te UEA!
Ti na anene ni kim'areirei nakon te Atua, are kakawakinira man te kabuanib'ai!
2Ti na roko i matana ma te katituaraoi
ao ti na anene ni kim'areirei n anene n nebonebo.
3B'a bon te Atua ae kakannato te UEA,
ao E m'aaka i aoia atua ni kabaneia.
4E taua taekan aonnaba,
man taabo aika rangi n nano ni karoko aoni maunga aika rangi n ririeta.
5Ana b'ai taari, b'a E karaoia,
ao ana b'ai naba te aba, b'a E karikia.
6Nako mai, ti na bobaraaki n taromauria;
ti na katorobubua i matan te UEA ae te tia karikira!
7Bon Atuara Ngaia;
Ana aomata ngaira aika E tararuaira,
kanga ai aron te tia kawakin-tiibu n tabeakiniia ana nanai n tiibu.
N te bong aei, ao kam na ongora n te bae E na taekinna:
8“Kam na tai kamatoatoai nanomi, n ai aroia ami bakatibu ngkoa i Merib'a,
N ai aroia n te bong arei n te rereua i Mata,
9Ike a kataai iai ao a kekera nako arou,
e boni ngae ngke a tia n noori baike I karaoi i bukiia.
10Abwi au ririki n rangi n ribaia te koraki arei.
Ao I taku, ‘Ai bure ra nanoia!
A rawa ni kan ongeaba nakon au taeka.’
11Ma ngaia are I taetae n un ao I kab'aka
au berita
‘kam na bon aki kona n rin n te aba
are N na kaman tia n anganingkami iai te motirawa.’ ”
Who We AreWhat We EelieveWhat We Do
2025 by iamachristian.org,Inc All rights reserved.
