Warekaia Iteraera 15 - Kiribati New Version Bible

Tuua I bukin Taiani Karea

1Ao te UEA, E tuanga Moote

2b'a e na anganiia Iteraera tuua aikai:

3Maan ake kam riai ni kabuoki i aon te baonikarea bon taiani kaomm'aane, tiibu mm'aane, ao taiani kooti b'a taiani karea ake kakukureiau. Ao kam kona naba n anganano n anga ami karea, ke i bukina ngke kam a tia ni berita iai, ke i bukina naba ngke boni kanoan waakin ami Toa. I kukurei ni boiararan bubun taian karea aikai.

4Ao ngkana kam anga te tiibu mm'aane ae te ataei, ke te kooti, ao kam riai n anga naba ami buraawa are moan te raoiroi ae teuana te rawawata ae renganaki ma teuana ma te iterana te riita b'aan te oriwa b'a te karea are te uita.

5Ao e na kab'aroaki naba teuana te riita te wain i aon te baonikarea.

6Ao ngkana te tiibu mm'aane ami man ae a boni ikawai, ao kam na riai n anga uoua te rawawata te buraawa ae renganaki ma teuana ma te iterana te riita b'aan te oriwa.

7Ao e na kab'aroaki naba teuana ma te iterana te riita te wain i aon te baonikarea. E na bon kakukureiai boiararan bubun te karea aei.

8Ngkana e kareanaki te kaomm'aane b'a te karea are kakukureiau, ke i bukin butiakiu Au kakab'aia,

9ao e na nikiraki naba te karea are te uita, are karaoaki man onoua te rawawata te buraawa ae renganaki ma uoua te riita b'aan te oriwa

10n reitaki naba ma aua te b'ainti te wain. N na boni kukurei ni boiararan bubun te karea aei.

11Ngkana boni Iteraera ngkami,

12ao kam riai n ongotaeka nakon tuua aikai n taai ni kabane

13ake kam anga iai te kaomm'aane, te tiibu mm'aane, ke te kooti b'a ami karea.

14Ao e na iri naba nanon tuua aikai te ianena ae maeka i buakomi.

15E na bon aki manga oneaki te tua aei. Bon te UEA Ngai ae ti te arona aomata ni kabane i Rou.

16Ti te arona Iteraera ma te iruwa ae maeka i buakomi.

17Ngkana kam kana te am'arake n te aba ae I anganingkami,

18ao uringnga ni kaokoroi tabeua

19b'a taian angab'ai nako Iu.

20Kam na anga nako Iu te moan kabobo n te buraawa are kam karaoia man moan uitan te tai. Karaoa teuana te kariki ao anganai n aron are kam karaoia n te karea are te uita.

21A na bane ni karaoi nanon tuua aikai kanoami, ma n anga m'akoron te moan kabobo n te buraawa.

22Ao te UEA,

23E tuanga Moote te b'ai ae na karaoaki ngkana a aki ongotaeka n irii nanon nako tuua aikai:

24Ngkana kam bane n aki ongotaeka nakon Au tua teuana n tiaki nanomi, ao kam na anga te kaomm'aane b'a te karea are kakukureiau, n ikotaki ma te karea ae te uita, ao te angab'ai are te wain, ao te kooti b'a te karea i bukin kab'araani buure.

25Ao i mwiina, e na tataro te ibonga ni butiai kab'araan ami bure. Ao i bukina ngke kam bon aki kantaningaia b'a kam na karaoa te bure, ao kam anga ami karea,

26ao a na kab'araaki aia bure aomata nako aika bon Iteraera, ao iruwa ake a maeka i buakomi.

27Ma ngkana iai temanna i buakomi ae karaoa te bure n tiaki nanona, ao e na kareana te kooti aine ae teuana ana ririki ni maiu b'a te karea ni kab'arabure.

28Ao e na bubutiai te ibonga i bukin kab'araan ami bure.

29E na kamanenaaki naba te tua aei nakoia aomata nako aika a karaoa te bure n tiaki nanoia, b'a tao te Iteraera, ke tao te iruwa ae maeka i buakomi.

30Ma ngkana bon iai ae karaoa te bure ni bon nanona, b'a tao te Iteraera ke te iruwa ae maeka i buakomi, ao e na bon reke n te bure b'a e a tia n aki ongeaba n urui taian tua.

31E na kanakoaki ao e na aki manga maeka i buakoia Iteraera.

Te Aomata Ae Tiringaki I bukina Ngke E riko aia N Te Taabati

32N te tai teuana ngke a tabe Iteraera ni m'ananga i nanon te rereua, ao e reke te mm'aane temanna b'a e riko aia n te Taabati.

33E uotaki nakoni Moote ma Aaron, ao nakon te botaki ni Iteraera.

34Ma akea ae ataa te b'ai ae na karaoaki nako ina, ma ngaia are, e a tiku ni kaawakinaki.

35Ao i mwiina, E taku te UEA nakoni Moote, “Tuangiia aomata b'a a na uota te aomata anne nako tinanikun te maeka, ao karebanaia ni karokoa matena!”

36Ma ngaia are, e a tiringaki n aron are E a tia ni baaireia te UEA nakoni Moote.

Taiani Korooti i aon Kunnikaia Aomata

37Ao te UEA e tuanga Moote,

38b'a e na kaangai nako ia Iteraera, “Kam na korotini mataniwiin kunnikaimi akana mai nano, ao ma ni kabaei taiani kora aika a beebo ma taiani korooti akanne n tatabeua nako.

39E na kauringngkami baikai b'a kam na riai n ongotaeka nakon Au tua ma Au reirei.

40Ao ngkana kam karaoa aei, ao kam boni kaokoroi iai ngkami b'a au b'ai, ma n aki iri nanomi aika buakaka.

41Bon te UEA ae Atuami Ngai ae kaotinakoingkami mai Aikubita.”