Etekiera 19 - Kiribati New Version Bible

Te Anene Ni Mate I bukiia Ana Taani Kairiiri IteraeraE taku te UEA:

1Etekiera, ko na anenea te kuna ni mate i bukiia ana taani kairiiri Iteraera ake uoman:

2Bon te raian te aine ae e ninikoria tinam

ae e kaikawaia natina

i buakoia raian.

3E reireina temanna mai buakoia aron kakaean kanana,

ao e a rabakau te nati arei aron kanakiia aomata.

4Ao ngke e ongo te botannaomata taekana,

ao a kam'anea i nanon m'anono,

ao a kamanenai taian matau

ni uaakinna nako Aikubita.

5E tataninga tinana

ni kaantaningaa okina.

Ma n te tai ae aki maan ao e a toki ana kakantaninga

ao e a manga kaikawaa bunna temanna,

are e a manga riki rake naba n tiritirina ma ununna.

6E kaai ni kakaaea kanana ma raian ake tabeman

ao e a rabakau kanakiia aomata.

7E urui taian nono

ao e kamaunai kaawa;

e kakamakuia aomata nako

ni bekorarana ae e korakora.

8A iangoa aron matena botannaomata,

ao a roko aomata man taabo nako

b'a a na taakina aia karaun

ma ni kam'anea i nanon aia b'ai ni kam'ane.

9A kaakiia i nanon nnen te man

ao a uotia nako B'aburon.

E a kainaki te raian,

n te aro are e aki manga ongo te aba

bekorarana ae e korakora

i aon tabukin Iteraera.

10Bon te kai ae te kureebe tinam

ae e maiu i rarikin te raanga n ran.

E rangi n m'aiti te ran,

ai ngaia are e a kaon m'aangana

n taiani uaa aika a m'aiti.

11A riki m'aangana ake a korakora

b'a kanikinaean te m'aaka,

ao e rietaata riki

nakon taian aroka ni kabane

a bane n nooria aomata nako korakorana

ma marurungin neierei.

12Ma I katikia rikaaki ni marakin nanou

mai wakaana

ao e karenakoa i aontano,

ike e a m'autakataka uaana

angin te rereua ae e kabuebue.

A kui m'aangana ake a korakora

ao a bue.

13Ao i mwiina, e a unikaki

i nanon te rereua ae e kabuebue ni m'auteretere,

14ike e a bue iai kaina,

ao e a kaurarakei m'aangana nako

te urarake.

Bon akea nikiran m'aangana;

E tiku ni ngaongao.

E na riai n aneneaki te anene ni mate aei ma te nanokawaki.