1Takaarua te rongorongo!
Tai taua.
Ko na kaangai nakoia au aomata ae Iteraera:
Kam a tia ni bure! Ko a tia n rairaki nako
mai roun te UEA.
2Kam katoa bong n taromauria
ao kam taraa ni kan atai
ana reirei nako.
Kam karaoa aron te botannaomata
ae e kan karaoa ae e raoiroi
n ongotaeka nakon ana Tua nako.
Buubutia ana motikitaeka ae e eti,
ao taekinna b'a ko tangiria
n taromauria te UEA.
3Kam mimi b'a e aera te UEA
ngkai e aki kan tabe
ngkana kam aki am'am'arake
ma ara nanorinano.
Ma ni bon te bong naba akanne,
ngke kam a katoka ami aki am'aam'arake,
kam bon ti iangoingkami i bon iroumi
ma ni kabuakakaia ami taani m'akuri.
4Ao e bon maraki naba nanom
ao ko tauraoi nakon te un.
Ti na bon aki mimi ngkai e aki ongo te Atua
ara tataro nako!
5Tao kam taku b'a e tangiringkami te UEA
b'a kam na toki man ami aki am'am'arake
ma ami nanorinano
are kaanga te buakoako n aroka ae e raranako?
Ke Tao ni karina te kunnikai ae e mangaingai
ma n tekateka i aon taiani mannang?
Bon aei te b'ai ae e tangiria
n te bong n taromauri?
6N na tuangngkami nanon raoi
taromaurian te UEA.
Kanakoi tieiniia buure
ake a kabaeaki n te aro ae e aki eti.
Kainaomataia akana a kabuakakaki!
7Tib'aa kanami nakoia aomata nako
aika a bora ni baki;
Tib'aa ami auti
ma te aomata ae e maiu ni kainano, ao ae akea ana auti;
Anga te kunnikai nakoia akana a kananoanga;
kam na aki tannako mairouia ami koraki nako.
8Ao ane e na ootanako iai am taura
kaanga ootan taai n te kaarangaina,
ao ane ko na
waekoa ni kamaiuaki.
E na kaawakiniko am raoiroi
ngkana ko waaki,
ao e na kaawakiniko
mimitongin te UEA mai bukim.
9E na kaekaingkami te UEA ni kaangai,
“Aio Ngai!” Ngkana kam buubutiai buokami.
Kam na aki karaoa ae aki raoiroi nakoia tabem'aang
ke ni bukiniia n te aro ni kewe
ke n taetae n aki akaaka nakoia.
10Anga kanam nakoia akana a baki
ao kaawakiniia akana akea aia auti.
Ao ane e na oota iai am taura
i nanon te roo;
A na riki b'a kaanga te tawanou
am aoa aika a rangi n rootongitong.
11E na kairingkami n taai nako te UEA
ma ni katauraoi b'aai aika a raoiroi i bukin kanami
ngkana kam mena i nanon te rereua.
E na angan rab'atami te marurung raoi.
Kam na riki b'a kaanga te nne n aroka
ae e m'aiti iai te ran
ke te karaanga n ran
ae a aki konaa n iki.
12Kam na manga karaoi auti ake uoua
ake a tiku n uruaki n ririki aika a bati;
ao ko na kinaaki
b'a te tia kateitei ngkoa ao te tia karaoa
oon te kaawa ao kawain nako nuukan te kaawa.
13Ma i m'aain anne, kam na riai moa
ni karinea te Taabati
ae kaanga ai aron kakukurein te bong n taromauri.
Kam riai ni katoka karaoan ao tataekinan
te b'ai ae kam tangiria ni karaoia
n te bong ae e rine aei.
14Ao ane kam na karekea raoi iai kakukurein
ataakin te UEA.
E na tautaekaningkami
man te maunga ake taiani kabanea n rietaata
ao ni kakab'aiaingkami n aban
ami bakatibu are Iakob'a.
Ngai te UEA ae I taetae!
Who We AreWhat We EelieveWhat We Do
2025 by iamachristian.org,Inc All rights reserved.
