1Tabeua te tai i mwiina, e buakana Biritia Tawita ma ni kataenikaiia raoi. E a inaomata ngkai Iteraera man tautaekanakiia irouia.
2E kataenikaiia naba kaain Moaba. Ao i mwiina, e kaweneia aia tautia i aon te tano. E tib'aia nakon tenikoraki; uakoraki a na tiringaki, ao tekorakina a na kamaiuaki. A na riai kaain Moaba aikai ni butim'aea Tawita b'a aia tia tautaeka ma ni kab'aka nakoina te taekiti.
3Ao e waaki nakon Tawita nakon te Karaanga are Iuberetiti ao e katea te kanuringa iai. E a manga kataenikaia uean Tob'a, are arana Atatetera are natin Reoba te m'aane.
4E kataenikaiia tengaa itibubua taan buaka mai aoia aoti Tawita ao uabwi te ngaa tautia ake a nakonako. E kataui naba kaa ni buaka, ma e urui ni kabane ma ti tebubua mai buakoia aika e katikui.
5Ngke e roko ana taanga ni buaka ana tautaeka Aramean mai Tamateko ni buoka Atatetera, ao Tawita e tiringiia uabwi ma uoua te ngaa mai buakoia.
6E katikuia tabeman ana tautia i Tamateko, ao a kariaia kaain Aramean b'a a na karika Tawita b'a aia tia tautaeka ao a anga taekiti nakoina.
E buoka Tawita n taabo nako ike e nako iai, ao e totokanikai n taiani buaka.
7E a tia ana aobitia Atatetera ni uoti ana kanoanikatebe ni nnen te kanoa ni katebe ae te koora ae e katinea i aon angana, ma e anaa te nne ni kanoa ni katebe aei Tawita, ao e uotia nako Ierutarem.
8E uoti naba taian buraati aika a bati man kaawan nako Beta ao Berotai, are ana b'ai Atatetera.
9A tia ni kairiribai te uea are Toi mai Amata ao te uea are Atatetera. Ma ngaia are, ngke e ongo Toi ae e a tia Tawita ni kataenikaia ana taanga ni buaka ae e b'anin Atatetera, e a kanakoa natina te m'aane are Ioram n angan Tawita te kaaitau.
10Ao a uoti naba ana b'aintangira Ioram aika a karaoaki n taian tirewa, koora ao taiani buraati.
11E angan te UEA baikai Tawita, n aron are e karaoia nakon taian tirewa ao taiani koora ake e taui
12i Etom, Moaba, Ammon, Biritia, ao mairoun te Uea are Atatetera mai Tob'a.
13E buakaniia ana taanga ni buaka Etom n te M'arua are Taari ao e tiringiia 18,000 tautia. E karaoa te kanuringa ngke e oki.
14Ao e katikuia ana taanga ni buaka ni kabutaa aon Etom, ao a kariaia kaain Etom ni karikia b'a aia tia tautaeka.
E buobuoka Tawita te UEA n taabo nako ike e nako iai.
Araia Ao M'aitiia Ana Mataniwi Tawita(1 Rongo 18.14-17)15Ao e tautaekana Iteraera ni kabutaa Tawita ma te eti ao te babaaire raoi.
16Ioaba are natin Teruia te m'aane bon mataniwin te taanga ni buaka. Ieotiab'ata are natin Airuta te m'aane bon te tia kaawakina rongorongon te tautaeka.
17Tatoka are natin Aituba te m'aane, ao Abiata are natin Aimereka te m'aane, boni ngaiia taian ibonga. Ao Teraia bon te tia koroboki.
18Benaia are natin Ieoiata bon te kam'anta irouia taan tararua Tawita. Bon taiani ibonga natin Tawita aika m'aane.
Who We AreWhat We EelieveWhat We Do
2025 by iamachristian.org,Inc All rights reserved.
