1Te UEA, ae te Atua ae am B'ai te kareke kai;
Ko na kaota unim!
2Te tia motiki taekaia aomata Ngkoe;
Tei rake, ao anganiia akana kainikatonga rekeni kaiia ni kaeti ma baike a karaoi.
3Ai ti maanraa aia tai akana buakaka ni kamoamoaia?
Te UEA, ai ti maanraa?
4Ai ti maanraa aia tai akana iowawa ni
kainikatonga ma ni kamoamoaia?
5Te UEA, a b'ainikiriniia am Botannaomata;
a karawawataia am Aomata.
6A kamateia aine aika a mate buia, ma ataei akana akea aia karo,
Ao a kamateia naba iruwa aika a tia n reke maekaia i abara.
7A kaangai, “E aki norira te UEA;
E aki mutiakin arora Atuan Iteraera.”
8Kam na iango, ngkami akana kam aki wanawana i buakoia aomata;
Ao ngkami akana kam baba, Kam na wanawana n ningai?
9Ngkae E kariki taningara te Atua, ao kaotana b'a E kona n ongo;
Ao ngkae E kariki matara, ao nanona b'a E noraba.
10Ngkae E boaiia botannaomata nako, ao tiaki b'a E kona ni kareke kaiia ara mataniwi aika buakaka?
Ao ngkai te tia reirei Ngaia nakoia aomata nako,
ao tiaki b'a e riai n iai te ataib'ai i rouna?
11E ataa te bae a iangoia te UEA;
E ataa ae akea kanoan nanon aia iango.
12Te UEA, ai kab'aia ra te aomata ane Ko reireinna,
Ane Ko reireinna taekan am Tua!
13Ko anganna rauna man taai aika e kiriwe te aba iai
ni karokoa kenakin te kinono
i bukini kam'aneaia
akana buakaka.
14Ane E na aki kaaki taekaia ana botannaomata te UEA;
E na aki kitaniia akana ana b'ai.
15E na manga noraki te kaetitaeka ae e raoiroi ni b'ainaki n te kabowi,
Ao e na boutokaki irouia aomata akana raoiroi.
16Antai ae e tei i buku ni kaitaraia akana buakaka?
Antai ae buokai ni kaitaraia taani karaoa ae buakaka?
17Ngke arona b'a E aki buokai te UEA,
ao N na kaman tia ni mate i aban te aki kakarongoaa.
18Ngke I kaangai, E maran nako waeu
Ma am Tangira, te UEA, boni ngaia ae tauai
b'a N na aki b'aka.
19N taai ake I tabeaianga ma n raraoma iai,
ao Ko kabebeteai ma ni kakukureiai.
20Ko aki kona n i raorao ma tia moti akana moti-buaka,
Akana karaoi baika katabuaki i aan te tua b'a a na karaoaki,
21Akana bootaki ni kario iango b'a a na kam'aruaia akana raoiroi,
Ao a motiki taekaia akana aki bure b'a a na kamateaki.
22Ma E kamanoai te UEA ae Atuau man te kabuanib'ai,
Ao E kawakinai.
23E na kareke kaiia i bukin aia m'akuri aika bubuaka,
Ao E na kamaunaia i bukin aia bure;
A na kamaunaki iroun te UEA ae Atuara.
Who We AreWhat We EelieveWhat We Do
2025 by iamachristian.org,Inc All rights reserved.
