Te Minita 2 - Kiribati New Version Bible

Akea Nanon Te B'angantauti

1I taku nako iu, “Kakukureiko, kamaiua nanom!” Ma bon akea nanon te iango aei.

2Te ngarengare ao te kakukurei bon te m'akuri ni burababa. B'a tera te raoiroi ae e na karaoia?

3I kani kakaaea b'a tera te kabanea n raoiroi i bukira n te tai ae e uarereke aei i aon te aonnaba. Ma ngaia are, I iangoia b'a N na kakukureiai n te wain, ao ni kakaaea b'a tera nanon te riki n nanobaba, ngkana I bon aki nanobaba raoi.

4I karaoi b'aai aika a ab'ab'aki. I katei taian auti ao I uniki nne n aroka ni kureebe aika a m'aiti.

5Iai au onaroka ni uee aika a m'aiti, ao onaroka ni uanikai aika a m'aiti aika a onrake ni kaai aika a uaa.

6A m'aiti au tabo n ran aika I konaa n anaa te ran iai i bukin tebokan aroka.

7Iai au toro, ao a manga riki natiia m'aane ma natiia aine b'a au toro naba. A m'aiti riki au tiibu ma au kooti nakoia aomata nako aika a tia ni maeka i aon Ierutarem.

8Taan tautaeka mai abatera a uoti nako iu tirewa, koora, ao kaub'ai aika a tamaroa. A uouoai ao n aneneai m'aane ma aine, ao a m'aiti buu aika taan anganai te kakukurei ae e bati.

9Boni ngai te kabanea n tanoata taekau mai buakoia aomata nako aika a tia ni maeka i aon Ierutarem, ao I bon rangi ni wanawana.

10A reke irou b'aai ni kabane aika I tangiri ao I karaoi b'aai nako aika I kani karaoi ni kakukureiai. Ma I rangi ni kim'areirei riki n au m'akuri.

11Ao i mwiina, I a iangoi b'aai aika I a tia ni karaoi, ni ikotaki ma m'akuri aika a matoatoa, ao ngaia bon ti kakiokioan te ang. Bon akea nanoni b'aai ni kabane.

E karekei Iango Aika A Raraoi Te Rabakau

12I titirakinai ni kaangai, “Tera ae I tuai ni karaoia ae e na karaoia te uea ae e na onea mwiiu?” Ao i mwiina, I a iangoia b'a N na kabotaua te wanawana ma te nanobaba ao te nanoroo.

13Ao I kunea b'a e raoiroi riki te wanawana nakon te nanobaba, kaanga ai aron te oota ae e raoiroi riki nakon te roo.

14Maata aika uoua aika a raraoi kaanga ai aron te wanawana; ao te nanobaba e katikuko i nanon te roo. Te wanawana ke te nanobaba, ma ti te bo tokira.

15N tokina, I taku nako iu, “Te wanawana e uotai nakon te akea! Bon ti te bo naba are e riki irou, ma are e riki iroun te nanobaba. Bon akea nanoni b'aai nako.

16Ti wanawana ke ti nanobaba, ti na boni bane naba ni mate ma ni m'aninga te aba taekara.”

17Bon aio te b'ai ae I ribaa iai te maiu. A bane ni kammaraki b'aai nako aika ti karaoi, bon te iango ae akea nanona b'a kaanga ti kakiokioan te ang.

18Ao I a tib'a ataia b'a ngaia n te tai teuana, ao ane a na reke b'aai ni kabane ake I karaoi n te m'akuri ae e korakora iroun te aomata temanna. Ma ngaia are, I a moana ribaakin b'aai ni kabane.

19Antai ae e ataia b'a a iangoraoi te koraki aikai, ke a nanoroo? E ngae ngke iangoraoi, ke e nanoroo ma N na boni b'aini b'aai ni kabane aika I a tia ni karekei n au m'akuri korakora ao wanawanau. Bon akea nanona.

20I iangoa mwiin au m'akuri korakora, ao e taonai te b'arannano.

21Ngkana ti kamanenai wanawanara, rabakaura, ao ara ataib'ai i bukin karekean ara b'ai, ao e aera b'a ti na manga katikui nakon temanna ae e bon aki m'akuri i bukin karekeaia? Bon akea nanon te iango aei, ao e kaairua.

22Tera te b'ai ae ti karekea man ara m'akuri korakora?

23E kainano rab'atara i nanon te ngaina, ao e kamaraki te m'akuri. Ao n te tairiki e aki rau ara iango. Bon akea nanona.

24Ti te b'ai ae te kabanea n tamaroa, ti riai ni kukurei n am'aam'arake, ni momooi, ao ni m'akuri. I kakoauaa b'a bon aikai ana b'aintangira te Atua nakoira,

25ao bon akea ae e kukurei riki n am'aam'arake ma ni maiu riki nakon ae I karaoia.

26Ngkana ti kakukureia te Atua, ao e na kawanawanaira, ma n anganiira te ataib'ai ao te kukurei. Ma ngkana ti bure, ao te Atua e na karawaawatai maiura, ao e na manga anga ara b'ai ni kabane nakon temanna are E kakukureia. Bon akea okoron aei ma kakiokioan te ang.