Etekiera 14 - Kiribati New Version Bible

E Kaungaia Aomata Etekiera B'a A Na Okira Te UEA

1N te bong teuana, a roko tabeman taan kairiiri irou ao n titirakinai i bukin te rongorongo mairoun te UEA.

2Ao E taetae te UEA ngke a boni mena ikekei ni kaangai:

3Etekiera ae natin te aomata, a tia ni manga moana taromauriakiia bouannanti m'aane aikai, e ngae ngke e na manga karekeia n te bure ae e korakora riki. Ma ngaia ae I aki kan taekina te rongorongo nakoia.

4Tuangiia Iteraera b'a ngkana a bure n taromauri taiani bouannanti ao i mwiina a nako ni kawara te burabeti ni kan ongora b'a tera au rongorongo, ao Ngai N na ti anganiia te b'ai are e bon reke nakoia ni kaineti ma aia bure.

5Tao a na bae n okirai ke ni katoka taromauriakiia bouannanti ngkana a ongo au rongorongo.

6Ko na tuangiia Iteraera ngkai Etekiera ni kaangai:

Bon te UEA ae te Atua Ngai. Kam riai ni katoka taromaurian taiani bouannanti aika a rangi n ribaaki ao okirai.

7Ngkana tao temanna mairoumi Iteraera ke te ianena ae e maeka i Iteraera ae e rawa irou ma ni manga moana taromaurian taiani bouannanti. Ao i mwiina, ko a manga nako ni kawara te burabeti b'a ko na ongora n au taeka, ao Ngai N na kaekako

8ni manga eekiko nako. N na karaoiko b'a te b'ai ni kauring nakoia tabem'aang akana a na karaoa naba te aekaki anne, ao ko na aki manga atongaki b'a au aomata. Ao ane ko na ataia iai b'a bon te UEA Ngai ae Ko a tia ni bure nakoina.

9Ngkana e anga te rongorongo ae e kewe te burabeti, ao boni Ngai ae I karaoa te burabeti b'a e na kewe. Ma N na bon aki butim'aia ao N na kanakoa mai buakoia au aomata,

10Ao e na katuaaeaki naba aron anne te aomata ane e nako ni kawara te burabeti i bukin karekean te rongorongo.

11N na karaoa te b'ai aei, b'a kam aonga n oki nako iu ma ni katoka kabuakakaan maiumi i bon iroumi n taiani bure aika a ribaaki. Ma ngaia ae kam na oki nako iu! Ao N na riki b'a Atuami, ao kam na riki b'a Au aomata. Boni Ngai ae te UEA ae te Atua ae I karaoa te berita aei.

Te Motikitaeka I Aon Te Bootanaomata Ae E Buubure

12E taku te UEA ae te Atua:

13Etekiera ae natin te aomata, ngkana tao e bure nako iu te botannaomata ae e b'anin, ao I katuaaia n urui arokaia ao ni kamateia kaaina b'a a na mate ni baki ma aia man.

14E ngae ngkana a maiu Nooa, Taniera, ao Iobi i buakoia te botannaomata, ma e na bon aki kamaiuaki naba temanna n aia kakaonimaki ma bon ti ngaiia.

15Ke ngkana tao arona b'a I katuaaea te botannaomata ni kanakoia maan aika aki manana b'a a na kaniia aomata ma ni kakamaakuia taan rikekei b'a e aonga n akea kaain te aba.

16Ngkai I bon maiu, ao I bon berita b'a ngkana tao ao maiu m'aane aika teniman aikai n te botannaomata anne, a na bon aki kamaiuaki naba natiia ao a na bon aki kab'araaki aia bure. A na maiu m'aane aika teniman aikai, ma e na riki te aba b'a te rereua ae akea kaaina.

17Ke ngkana I kanakoa te kairiribai b'a e na buakana te botannaomata ae e buubure aei man tiringiia aomata ma aia man.

18Ao ngkana a mena m'aane akana teniman aikai n te botannaomata anne ngkana I katuaaia, ao a na bon aki naba kab'araaki aia bure natiia. Bon ti naakana teniman akanne aika a na maiu.

19Ao ngkana I a rangi ni un ao I a kanakoa te aoraki ae e kamaamate b'a e na kamaunaia aomata aika a buubure ma aia nanai ni man.

20N na manga kaokia riki. B'a e ngae ngke a maeka ikekei Nooa, Taniera ao Iobi, boni Ngai ae te UEA ae I berita b'a a na boni mate naba natiia m'aane aika a kakaonimaki aikai. Bon ti teniman aika a na kamaiuaki.

21Boni Ngai ae te UEA ae te Atua, ae I berita b'a e na kakorakoraaki katuaaean Ierutarem. N na kanakoa te buaka, te baki, maan aika aki manana, ao te aoraki ae e kamaamate b'a e na tiringiia kaaina ma aia nanai ni man.

22Ao a uotaki nako aika a reke maiuia man abaia nako ikai i B'aburon. Etekiera, ngkana kam noora aron aia bure, ao ko na ataia iai b'a bukin tera ngkai I karaoi b'aai aikai ni kabane nakon Ierutarem.

23Ane ko na kakoauaa b'a boni Ngai ae te UEA ae te Atua ae riai ngkai I karaoa aei.