1Bon te bong ae e kakamaaku nakoimi ngkami Iteraera ake i Tion, ake kam m'aninga nako n nakoami aika a ririeta, ao ngkami naba ake i Taamaria ake akea raraoman nanomi n unin te UEA. E kanga n riki anne iroumi ao bon ngkami taan kawaraki irouia aomata i bukin buokaia.
2Noora te kaawa are Karene. Noora naba te kaawa ae ab'ab'aki are Amata, ao ruorikaaki n noora naba aia kaawa I-Biritia are Kate: a bon aki roota tamaroan aaba n uea aika Iuta ma Iteraera, a aki roota naba rababan tiaia.
3Ma ngkai kam aki kan muuti n te bong n urub'ai ae nang roko, ao e na bon roko uruami mai rouia aika a buakaka i bukin ami m'akuri aika a buakaka.
4Bon te bong ae rangi ni kakamaaku nakoimi ngkami aika kam ni wenewene i aon kiemi aika a katamaroaaki, ma n am'am'arake n irikoia kaao ma tiibu aika ataei!
5Kam otoi kuuna ma n anenei ma te aabi n ai aron teuare Tawita.
6Kam momooi wain n taian boora ao kam kabiri ngkami ni kabira aika a rangi ni boiarara, ma kam aki nanokawaki i bukin uruan Iteraera,
7ma ngaia ae kam na riki b'a moan aomata ngkami ni kairaki nako b'a taenikai. A na mauna ami bootaki ma ami baka.
8E a tia n anga te kauring te UEA ae rietaata ae moan te m'aaka ni kaangai, “I bati n ribaai aia kamoamoa Iteraera: I bati n ribaai naba mwengaia aika a raraoi, ao N na anga aia kaawa ae atuun aia tautaeka nakoia aia kairiribai.”
9E ngae ngkana tengaun te m'aane aika a tiku n te auti ao a na bon bane naba ni mate.
10E na kaotinakoaki rab'atan te mate man te auti iroun teuare a na buu te mate arei, are bon ngaia naba ae mataniwiia te bootaki ni mate arei. E na wewete te buu arei nakoia ake a tiku n te auti ni kaangai, “iai riki raom temanna ikanne?” Ao e na kaekaaki ni kaangai, “akea” Ao e na kaangai ana buu teuare e mate, “Tai karongoaa, ti riai ni kaawakiniira man atoatongan aran te UEA.
11A na bane ni maerikiriki auti aika a korakora ma auti naba aika a karako ngkana E kanakoa Ana taeka te UEA.
12A konaa ni biri aoti i aon taian b'aa? A kona aomata ni kairiia kaao b'a a na katika te b'araua i aon taari ni kamaraua taari? Ma ko a tia n onika te eti nakon te b'ai ae kamamate, ao te raoiroi nakon te kairua.
13Ko kamoamoako ngke ko taua te kaawa are Roteb'ara. Ko taetae ni kamoamoa iai ni kaangai, “Ti korakora n niniaanako te kaawa are Kaanaim.”
14E taku te UEA ae te Atua ae m'aaka, ngkami aika Iteraera, N nang kanakomaia taanga ni buaka aika ianena b'a a na maekana abami. A na taua taekami ma ni karawawatai ngkami ni moa mai Amata are i meang n toki ni karaangan te Arab'a are i maiaki.
Who We AreWhat We EelieveWhat We Do
2025 by iamachristian.org,Inc All rights reserved.
