1Ko na aki kamoamoa i bukin te ingabong!
b'a ko aki ataa kanoan
te bong teuana ma teuana.
2Tai kamoamoako i bon iroum
ke a kamoamoako tem'angina.
3A rawaawata atiibu ma taian tano,
ma e rawaawata riki te uota
n te kangaanga ae e karikia te nanobaba.
4E kamaamate te aomata ae e un,
ma e a rangi ni kamaamate riki
te aomata ae e babakantang.
5E aki maaku ni kaetiko
te aomata ae bon raoraom ni koaua.
6Ko konaa n onimakina raoraom
ae e kaetiko,
ma taian inga mairouia kairiribai
bon akea b'a ti taiani kewe.
7E aki rangi ni kangkang ana karewe te manibeeru
ngkana a m'aiti kanam,
ma ko kang b'aai n aki akaaka
ngkana ko a rangi ni baki.
8Ngkana ko raroa nako ma ni mwengam,
ao ko namakinna b'a kaanga ai aron te mannikiba ngkoe
ae akea ngaona.
9E karika te marurung inanom
arokakin te boiarara,
ma e a rangi n tamaroa riki
te iraorao ae e koaua.
10Tai kiitana te aomata ae e a kara
ae raoraoia ngkoa am utu
ke ni kawariia am koraki
n tain rekem n te kangaanga.
E raoiroi raoraom ae ko kaan ma ngaia nakoia
am koraki aika a raroa nako.
11Natiu, kaota te wanawana!
Ao n na kukurei iai
ao n na konaa ni kaekaia aomata nako
aika a tiribureai.
12B'aina te tatauraoi ao karabako
ngkana ko noora te kangaanga
tai burababa ni m'ananga
ni kakioa buakon te kangaanga.
13Tai anga am m'ane i bukin ana taarau te iruwa
ni karokoa e reke iroum
te b'ai teuana ae e na riki b'a
te kakoaua i bukin te taarau.
14Te taeka ni kamauri ae e om'aaka
n te itingaroo
bon ti te bo ma te kamaraia.
15Bon ti te arona
te timtim ni karau ae e teimatoa
ma te ainenum'a ae e memeremere.
16E konaa riki n tauaki n te ang
ke n tauaki i nanon te bai b'aan te oriwa
nakon katokan te ainenum'a ae e meremere.
17Ai aron taiman te biti
raao a taimi nanoia
i bon irouia.
18Kaawakina raoi te aroka
ao ane e na manga anganiko uaana;
tararuaa raoi am toka
ao ko na neboaki.
19Ko noora moamoam n te tirotaam
ao ko noora am iango
n nanoia tem'angina.
20A aki konaa n rauaki
te mate ma te ruanimate,
ao ai bon ti te arona naba ma ngaira.
21A tuoaki te koora ma te tirewa
n te ura ae e m'aaka roiroi,
ma ti tuoaki n te neboaki.
22Ko bon aki konaa ni kanakoa te nanobaba
mai nanon te nanobaba
ngkana ko batibooia
ni karawataa.
23Ko riai ni kaawakiniia raoi
am tiibu ma am kooti,
24b'a a aki teimatoa n aki toki
te kaub'ai ma te karineaki.
25Ngkana e a tia ni koreaki te uteute
ao e na manga rikirake ae e boou
ao e toki te tai,
26Ko konaa ni kabooi nako tiibu ma kooti
ni kabooa iai te kunnikai ao te aba.
27Ko konaa ni karaoa te tiiti ae e tau
i bukin kaam'arakeaia kaain am utu
ao am taani m'akuri ni kabane
man ranin mamman te kooti.
Who We AreWhat We EelieveWhat We Do
2025 by iamachristian.org,Inc All rights reserved.
