Taniera 2 - Kiribati New Version Bible

Miin Nebukaneta.

1Ao e mii te uea are Nebukaneta i nanon ana kauoua n ririki n uea, ao e rangi n tabetabe nanona ni miina arei n te aro are e aki reke matuuna iai,

2ma ngaia are, e a kanakoa weteaia ana taan tabunea, ma ana ibonga, ma aomata aika taani b'ai, b'a a na tuangnga b'a tera are e a tia ni miia. Ao ngke a roko n tei i matan te uea,

3ao e taku nakoia, “E rangi n tabetabe nanou n te mii are I miia. I tangiria b'a N na ataa nanon te mii anne.”

4Ao a kaekaa te uea n te taetae n Aram'aika, “Te uea ae ko karineaki, ko na maiu n aki tootoki! Karakina miim nakoira b'a ti na kab'araa nanona nakoim.”

5Ao e taku te uea nakoia, “I a tia ni baaireia i nanou b'a kam na tuangai b'a tera te mii anne, ao kam na kab'araa naba nanona. Ngkana kam aki konaa, ao N na tua b'a kam na raebitiaki, ao N na karikii ami auti b'a taian b'ariko ni maange.

6Ma ngkana kam kona n tuangai b'a tera te mii anne, ao tera naba nanona, ao N na anganingkami kaniwangami, ao karineami ae moan te korakora. Ma ngaia are, kam na tuangai ngkai b'a tera te mii arei ma nanona.”

7Ao a manga kaeka naba nakon te uea ni kaangai, “Te uea ae ko karineaki, ngkana ko bon tuangiira te mii anne, ao ti a tib'a kona ngkanne ni kab'araa.”

8Ao e taku te uea, “Ngaia are I taku! Kam kataia ngkai ni karerekea angami, i bukina b'a kam ataia ae I a tia ni baaireia i nanou

9b'a N na katuuaingkami ngkana kam aki kona n tuangai b'a tera te mii arei. Kam a tia ni kabooi nanomi b'a kam na kabanetai n ami taetae ni kewe, b'a kam taku i nanomi b'a e na bae ni bitaki baairean taekamii ngkana e maan riki te tai. Tuangai b'a tera te mii arei, ao I a kona n ataia iai b'a kam kona naba n tuangai nanona.”

10Ao a kaeka ana taani iango ni kaangai, “Te uea ae ko karineaki, bon akea temanna n te aonnaba aio ae e kona n tuangko te b'ai ae ko tangiria ni kan ataia. Bon akea te uea temanna, akea naba te aomata ae e rangi ni korakora ma n aintoa ae e a tia n tangira te aro anne nakoia ana taan tabunea, ma ana ibonga ma ana taani b'ai.

11Te uea ae ko karineaki, boni moan te matoatoa te b'ai ae ko titiraki iai n te aro are bon akea ae e kona ni karaoi ma ti anti aika a aki mamaeka i buakoia aomata.

12Ao e rangi n un te uea i bukin anne, ao e tua naba ngkekei b'a a na bane n tiringaki ana taan rabakau ake i aoni B'aburon.

13Ao e kanakoaki te taeka arei b'a a na tiringaki taan rabakau ni kabane, n ikotaki naba ma Taniera ma raona ake teniman.

Kaotan Nanon te Mii Nakon Taniera iroun te Atua.

14Ao e nako Taniera nakon Arioka are mataniwiia taani kawakina te uea, ao mataniwiia naba koraki ake a na karaoa tiringakiia ana taan rabakau te uea, ao e maroroo ma ngaia ma te karaurau,

15ao e titirakinna b'a e aera te uea ngkai e karaoa te tua ae e matoatoa anne. Ao Arioka e karakina bukina nakon Taniera.

16Ao e a waetata naba n nako Taniera ni bubuti ana kariaia riki te uea b'a e na taonaki riki teutana, b'a e aonga n reke ana tai ni kab'arab'araa nanon miina.

17Ao i mwiin arei, ao e a nako Taniera nakon mwengana n tuangiia raona ake Anania, Mitiaera, ao Ataria te b'ai ae e riki.

18E tuangiia b'a a na tataro nakon te Atua ae Atuani karawa, b'a E na nanoangaiia mani butiia buokaia nanon te mii arei, b'a a rawa n tiringaki i rarikiia taan rabakau ake boni kaaini B'aburon.

19Ao ni bon te tairiki naba arei, ao e a kaotaki nanon te mii arei nakon Taniera n te kaotioti, ao e neboa Atuani karawa ni kaangai,

20“E bon rabakau te Atua ao E m'aaka!

Neboia n aki toki ao n aki tootoki.

21E taui aron taian tai ma taian aua;

E kateia uea ao E kab'akaia naba;

boni Ngaia ae E anga te rabakau ma te ataib'ai.

22E kaoti b'aai aika a nano ao aika a raba;

E atai baika a raba n te rotongitong,

ao E otab'aniniaki n te ota.

23I neboiko ao I karineko, Ngkoe ae Atuaia au bakatibu.

Ko a tia n anganai te rabakau ma te korakora;

Ko a tia ni kaekaa au tataro,

ao n tuangai nanoni miin te uea.”

E Kab'araa Nanon Te Mii Taniera

24Ma ngaia are, e a nako Taniera nakon Arioka are te aomata are e tuangaki iroun te uea b'a e na kamateia ana taan rabakau te uea. Ao e taku nakoina, “Tai kamateia ma ko na kairai nakon te uea, ao N na tuangnga b'a tera nanon miina arei.”

25Ma ngaia are, e a waetata naba ni kairaanako Taniera teuare Arioka nakon te uea are Nebukaneta, ao e tuanga te uea ni kaangai, “I a tia ni kunea temanna aomatan Iutaia ae te taenikai ae e kona n tuangko nanoni miim.”

26E taku te uea nakon Taniera (are arana naba Beretetiata), “Ko kona n tuangai b'a tera are I miia ao tera naba nanona?”

27Ao e kaeka Taniera ao e kaangai, “Te uea ae ko karineaki, bon akea te ibonga temanna, ke te tia tabunea temanna, ke te tia b'ai temanna, ke te tia borau temanna ae e na kona n tuangko te b'ai anne,

28ma bon ti te Atua ae Atuani karawa ae e kona n tuangko te mii anne. E a tia n tuangko te b'ai ae e na roko n taai aika i m'aaira. Ao tauraoi b'a N na tuangko te mii arei, are te kaotioti are ko nooria ngke ko matu.

29Te uea ae ko karineaki, ngke ko tabe ni matu, ao ko mii kanoan taai aika a na roko; ao te Atua e boni kaota nakoim te kaotioti anne, E kaota nakoim b'aai aika a nang riki.

30Ao ngkae e a tia ni kaotaki nako iu te kaotioti anne, tiaki i bukina ngke I rabakau riki nakoia tabeman, ma i bukina b'a e aonga n reke nanona iroum ao n oota raoi naba iango akana a roko iai nakoim.

31Te uea ae ko karineaki, te b'ai are ko nooria ni miim are e tei i matam bon te bouananti ae bannan te aomata ae te aintoa, ae oota man raneanea, ae e kakamaaku taraana.

32E karaoaki atuuna man te koora ae te kabanea n raoiroi; ao a karaoaki b'aab'aana ma baina n te tirewa; ao mani koreana nakon nimoimoin waena n te buraonti,

33ao rangana n te biti, ao waena n te biti ae e renganaki ma te tano.

34Ao ngke ko bon tabe n tarataraia, ao e a ti b'aka naba i bon i rouna te atiibu ae e korakora man taiani b'aa aika a rietaata, ao e b'akara waen te bouananti arei, are te biti are e renganaki ma te tano ao e kamaerikirikia.

35Ma ngaia are, e a b'aka te biti ma te tano, ma te buraonti, ma te tirewa, ao te koora ni maerikiriki kaanga bubun te uita are e oreaki n tain te aumaiaki. E uotia nako te ang ni kabane ni bon akea nikirana. Ma e rikirake ni buubura te atiibu arei ni karokoa e a rabuna te aonnaba ni kabane.

36“Ao ai anne ngkanne te mii arei. Ao ngkanne N na manga tuangko nanon te mii anne.

37Te uea ae ko karineaki, boni ngkoe te uea ae te kabanea ni korakora i buakoia uea. Bon Atuan karawa ae E karikiko b'a te emberoa ngkoe, ao E anganiko naba te korakora, te m'aaka ao te karineaki.

38E a tia ni karikiko b'a te tia tautaeka n taabo nako aika iai kaaina n te aonnaba, ao te tia tautaeka i aoia man aika kawakawa ma mannikiba. Boni ngkoe te atu are te koora.

39E na manga teirake te tautaeka teuana i mwiim, ma tiaki aron korakoram, ao e na manga teirake te katenua n tautaeka, ae te buraonti, are e na taua taekan te aonnaba ni kabane.

40Ao e na teirake te kaaua n tautaeka ae ai aron korakoran te biti, are e na kamaerikirikii ao n urui b'aai ni kabane. E na urui mani kamanatuai taian tautaeka ake mai m'aiina n ai aron te biti ngkai e urui b'aai ni kabane.

41Ao n aron are ko noori rangana ma waena are te biti ae e renganaki ma te tano, nanona b'a e na bwenauaaki te tautaeka, ma e na boni iai i nanona korakoran te biti i bukina ngke e renganaki te biti ma te tano.

42Waena, iterana te biti ao iterana te tano, ae nanona b'a iteran te tautaeka e na korakora ao iterana are teuana e na mamaara.

43Ao ko nooria naba b'a e renganaki te biti ma te tano. Ao nanon anne b'a a na kataia taan tautaeka n te tabo anne ni kaieiniia aia utu ma kaain te tautaeka are teuana, ma a na bon aki konaa b'a e bon aki kona n renganaki te biti ma te tano.

44E na manga kateirakea te tautaeka teuana ae akea tokina Atuani karawa i nanon aia tai uea aikai. Te tautaeka ae e na bon aki manga konaaki, ma e na boni kamaunai tautaeka nako, ao e na bon teimatoa.

45Ao ko noora naba te atiibu are e buubura are e b'aka i bon i rouna man te b'aa are e rietaata ni b'akara te bouananti are e karaoaki man te biti ma te buraonti, ma te tano, ma te tirewa, ao te koora. E tuangko ma te koaua te b'ai are ko miia, b'a te Atua are e korakora, E a tuangko iai te uea ae ko karineaki baika a na kaoti nakoni boong aika a na roko.”

Anganakin Taniera Kaniwangana iroun te Uea.

46Ao i mwiin anne ao e bobaraaki te uea are Nebukaneta nako aontano, ao e anga ana taeka i bukin te karea ma te angab'ai b'a e na karaoaki i bukin Taniera.

47E taku te uea, “Bon te kabanea ni korakora Atuam i aoia atua ni kabane, ao te UEA i aoia uea, ao boni Ngaia ae E kaoti taiani kaotioti. I ataa aei i bukina ngke ko kona ni kab'ara nanon te kaotioti aei.”

48Ao i mwiin anne, ao e angan Taniera nnena ae moan te rietaata, ao e anganna naba b'aai n tangira aika a rangi ni kakaawaki, ao ni ikotaki ma te burawinti are B'aburon b'a e na taua taekana, ao n riki naba b'a te mataniwi i aoia taan rabakau ni kabane i aoni B'aburon.

49Ao e bubuti Taniera nakon te uea i bukiia raona akekei, ao te uea e rinea Tiateraka, Metiaka ao Abeteneko b'a taan taua taekan te burawinti are B'aburon, ao Taniera b'a ana tia iango te uea.