1Kam na kakauongo nakon aei, ngkami aika ainen Tamaria aika kam marikarika n ai aroia kaon Batian aika kamarikaaki aika kam karaoa ae e buakaka nakoia aika a mamara, kam karawawataia aika a kainano ao man tuangiia buumi b'a na uotii nimami taian kamanging!
2E a tia ni berita te UEA ae E m'aaka man rietaata ao E taku, “E na bon roko te bong are e na katikiko n te matau, ao ngkami ni kabane kam na riki kanga ai aron te ika i tabon te matau.
3Ko na katikaki nakon b'angab'angan te o ae e uakaan man teweaki nako iai.”
Kab'akan Iteraera b'a Reireiana4E taku te UEA ae moan te rietaata, “Ngkami aika aomatan Iteraera, kam na nako Betaera ae ana kaawa te Atua ae e tabu, ao karaoi m'akuri aika a bure iai ngkana kam kona! Naako Kirekara ao kabatiai riki ami bure! Naako uotimai ami man b'a kam na anga karea ni katoa ingabong, ao uotimai naba ami kabwianib'ai b'a a rikoaki ni katoa te katenua ni bong
5Naako kabuoki kariki b'a karea ni kaitau nakon te Atua, ao uotii naba ami karea n anganano man kamooi ngkami iai! B'a bon te b'ai ae kam tatangiria.
6“Boni Ngai ae I karokoa te rongo nakon aon ami kaawa, ma bon akea naba te kuba iroumi n okirai.
7I taua naba te karau b'a e na aki b'ab'aka i aon arokami. I kab'aka te karau nakon aon te kaawa teuana ao I aki kab'aka nakon te kawa teuana. E b'aka te karau n te tawaana teuana ao a mate arokan te tawaana teuana.
8A bora n taka aomata, ao a nako kain te kaawa teuana ni kakaea te ran n te kaawa are a taku b'a iai te ran iai ma e aki tau nakoia. Ma kam bon teimatoa naba n aki onimakinai.
9“I kanakoa te ang ae kabuebue, b'a e na tiring arokami ao te rookati b'a e na kang ami oo-n-aroka, ma nnen ami kureebe ma biiku, ao oriwa. Ma kam bon teimatoa naba n aki onimakinai.
10“I karokoa te kai i aomi n ai aron are I oroia naba ngkoa iai I-Aikubita. I tiring ami rorobuaka n te buaka ao I uoti nako ami aoti. Ao I kaboiraaea ami kaawa ni kabatia te aomata ae mate iai. Ma kam bon teimatoa naba n aki onimakinai.
11“I tiringiia tabem'aang mai buakomi n ai aroia I-Totom ma I-Komora. Ao ake a reke maiuia ai aron te kai ae bue ae butakinako mai nanon te ai. Ma kam bon teimatoa naba n aki kan onimakinai.” Bon ana taeka te UEA “Ma ngaia are ngkami aika I-Iteraera, N na bon katuaai ngkami ao kam na riai ni kataua motikan taekami i bukin aei.”
12Ao ngkai Iteraera,
N na katuaai ngkami
katauraoi ngkami ni kaaitaraa Atuami!
13Bon te Atua ae karaoi taian Maunga
ao E karikii naba aang.
E kaoti ana iango nakoia aomata
E onika te ngaina nakon te tairiki
ao n nakonako i aon tabuki.
Bon te UEA Ngai ae E m'aaka!
Who We AreWhat We EelieveWhat We Do
2025 by iamachristian.org,Inc All rights reserved.
