Taeka n Rabakau 31 - Kiribati New Version Bible

Ana Reirei Tinan te Uea are Remuera nakon Natina te m'aane

1Aikai taeka n rabakau

ake e reireinaki te uea are Remuera are kaain Mata

iroun tinana.

2Natiu te m'aane ae Remuera, ko bungiaki

b'a kaekaan au tataro,

ma ngaia ae, ko na kakauongo raoi.

3Ko na tai kabanea am tai

ni kakaeia aine!

bon aei te b'ai ae e aki toki n uruan aroia uea aika a bati,

4A na riai n aki koro ni manging

ao a na aki b'arua naba te manging

uea ma taan tautaeka.

5E kam'aningako te manging

man tib'angam,

ao ko na karaoa ae e aki raoiroi nakoia aika a maiu ni kainano.

6E na ti kabonganaaki te manging ma te wain

irouia akana a nang mate

ke irouia aika akea nikiran aia kaantaninga.

7Kamooia

b'a aonga ni m'aninga

ma n aki namakina

kainanoia ao rawawataia.

8Ma ko riai n tei i bukiia

aika a tangira buokaia

ao aika akea aia kaantaninga.

9Karaoa ae riai ao n anga te babaaire ae e raoiroi

nakoia aika a maiu ni kainano ao aika akea mwengaia.

Neboan Te Ainenum'a ae e Raoiroi

10Reken te ainenum'a

ae e rangi n raoiroi iroun te m'aane

bon reken te kaub'ai ae moan te tamaroa!

11E mwiokoaki neienne iroun buuna,

ao e aki konaa

ni kab'aka nanoni buuna.

12E rangi n raoiroi nakon buuna

ni kabane bongini maiuna,

13ao e boni karaoi kunnikain buuna

ni bon oini baina ma te kukurei.

14Bon ti te bo ngaia ma te kaibuke ni ieie

ae e uoti taian am'arake

ri nanoni marawa.

15E a kaman uti i m'aain otin taai

ni katauraoa te am'arake i bukiia ana utu

ao ana toro.

16E ataa aron kakaaean te aba are e na kabooa

ao aron unikan te kureebe,

17ao e m'akuri korakora n taai nako.

18E ataa aron te bitineti ao karekean te raka,

ao e aki toki n tatabetabe n taai nako

ni karokoa e a tairaa.

19E bon rarangaa kunnikaina,

20ao e buokiia aika a maiu ni kainano

ao aika a kai nanoia.

21A b'ainiia ana utu ni kunnikai aika a abue,

ai ngaia are, e aki raraoma

ngkana e roko tain te tinoo.

22E bon itutuu,

ao a bane n tamaroa

ana kunnikai aika e b'ain.

23E rangi ni kinaaki buuna

ao te tia kairiiri ae e karineaki

n te kaawa ae e buubura.

24E karaoi kunnikai ake a na kabooaki nako

iroun are iai ana tabo ni kabob'ai.

25E marurung ao e kakukurei,

ao e kaantaningai boong aika a na roko

ma te kukurei.

26E taetae ma te iango raoi,

ao a rangi n nano

ana taeka n reirei.

27E tararuaia raoi

ana utu

ao e aki konaa n taningaroti.

28E neboaki irouia natina,

e tataekinna buuna

ni kamoamoaa ni kaangai,

29“A m'aiti aine aika a raoiroi ma bon te kabanea n raoiroi ngkoe mai buakoia!”

30E konaa naba ni kam'anea te aba te tikiraoi,

ao e na manga bon b'aruku te botonaine,

ma e bon riai ni karineaki

te aine

ae e karinea te UEA.

31Kaota karineana

neboia i mataia aomata

i bukin baika e a tia ni karaoi.