Etira 4 - Kiribati New Version Bible

Ianena A Kan Buoka Manga Katean te Tembora

1A ongo aia kairiribai kaain utuun Iuta ao Beniamin te rongorongo ae a oki aomata b'a a na manga katea ana Tembora te UEA ae Atuaia Iteraera.

2Ma ngaia are, a manga nakon Terub'abera ao nakoia taani kairiiri man taian utu ao a taku, “Ti na buoka te m'akuri. E a tia uean Aturia are Etaaton ni kairiira nako ikai, ao ti a tia n taromauriia Atuami ma n anganna taiani karea.”

3Ma a taku Terub'abera, Iotua ao taani kairiiri man taian utu, “Kam aki kona n ira karaoan ana Tembora te UEA ae Atuara. Ti na boni karaoia i bon iroura, n aron are e a tia ni mwiokoira iai Tairati are uean Botia.”

4Ao i mwiina, a bane aomata ake i rarikiia ni karaoi m'akuri ake a konaa iai ni kakamaakuia taian Iutaia

5I nanon te tai are e uea iai Tairati ni karokoa naba ana tai ni uea Taraiati ao a bon teimatoa naba n ananaa nanoia mataniwiin te tautaeka b'a e aonga ni waeremwe te m'akuri.

Te Kaangaanga Ni Manga Katean Ierutarem

6N ana moan ririki n uea Aatuereti, ao a bukiniia kaain Iuta ao Ierutarem b'a a karaoa te m'akuri ae e buakaka.

7Rimwi riki, ao a ikotaki Bitiram, Miteretata, Tabeera, ao taan iango ni kabane, ao a korea te reta nakon Atatokititi ngke e uea i aon Botia. E koreaki n te taetae n Aram'aika ao e na riai n rairaki.

8E kanakoaki naba te reta nakon Atatokititi ae taekan Ierutarem iroun te koowana are Reum, ao te tia koroboki Timtiai,

9ao aia taan iango, n reitaki ma Taani Motikitaeka, taiani koowana, mataniwi, ao taani kairiiri i nanoaa. A bon raonaki ni korean taian reta aikai irouia aomata mai Ereka ao B'aburon, kaain Eram mai Tuta,

10ao aomata mani botannaomata ake tekorakina, ake e a tia te aomata ae moan te kakannato man tanoata taekana are Aturabaniboro ni kairoroia b'a a na maeka i Taamaria, ao m'akoron te Burawinti Maeao ake tabeua.

11E taku kanoan te reta: Te Uea ae ko karineaki ae Atatokititi, bon am toro ngaira man taabo nako ake n te Burawinti are Maeao, ao ti anganiko ara kamauri.

12Ko bon riai n ataia b'a a tia n okira Ierutarem taian Iutaia ake a kiitana abam, ao a moana ngkai manga katean te kaawa are e kakamaaku. Ni koauana raoi, e a kaani bane ngkai karaoan taian oo ao onob'aian taian aana.

13Ko bon riai n ataia b'a n te tai are e a tia raoi iai te oo, ao ma ni bane raoi karaoan te kaawa ae e buubura aei, ao ane a nang aki manga kab'aka aia taekiti taian Iutaia, ao e nang keerikaaki m'anen kaub'aim.

14Ti bon kaongoko baikai, i bukina b'a a bon rangi ni m'aiti b'aai aika ko a tia ni karaoi i bukira, ao ti tangiriia aomata ni kabane b'a a na karineko.

15Ngkana ko tarai taian rongorongo aika a eti i bukiia am bakatibu, ao ko na kunea b'a bon Ierutarem ae e aki toki ni kakaaitaraia ma ni kairiia te koraki b'a a na kaaitaraia taiani uea ma m'akoron nako am tautaeka. Ao bon anne bukina are e uruakaki iai ngkoa te kaawa are e buubura arei.

16Ngkana e a manga tei Ierutarem ao n tia raoi oona, ao ane e nang toki am tautaeka n am m'akoro ake i Maeao.

17Ao e kaeka te uea are Atatokititi:

Te kamauri nakon te koowana are Reum, te tia Koroboki are Timtiai, ao ana taan iango Taamaria ao m'akoron te tautaeka are Maeao.

18Ngke e a tia n rairaki ami reta mani warekaki nako iu,

19ao I raibaai taian rongorongo nikawai. Ao e boni koaua ae e aki toki Ierutarem ni kakaaitaraia mani kariki kaangaanga n ririki nako nakoia uea ao botannaomata.

20Ao taian uea aika a korakora aika a tia n tautaekana te m'akoro Maeao mai Ierutarem, a tia n rikorikoi taian taekiti n aekakiia nako.

21I tangiringkami b'a kam na tuangiia aomata b'a a na katoka manga karaoan te kaawa ane e buubura anne, ni karokoa ae I a tia n anga au taeka.

22Kam na karaoa naba aei ngkai, b'a e aonga n aki manga roko te kaangaanga n te abanuea.

23Ao n te tai are e warekaki iai te reta arei, ao a m'ananga naba nako Ierutarem te koowana are Reum, te tia koroboki are Timtiai, ao ana taan iango, ao a kairoroia aomata ni kabane b'a a na katoka manga katean te kaawa are e buubura arei.

E a Manga Moanaki Te M'akuri i aon Te Tembora

24A kairoroaki taian Iutaia b'a a na katoka te m'akuri i aon te Tembora, ao akea te b'ai ae a konaa ni manga karaoia ni karokoa te ririki are i mwiin rikin Taraiati b'a te uea i aon Botia.