Iobi 27 - Kiribati New Version Bible

Ana kaeka Iobi nako ia raoraona.

1Ao e taku Iobi,

2“I berita n aran te Atua ae m'aaka,

ae aki kan kaeta taekau,

ao E karaoa maiu b'a e na maai,

3ni karokoa tokin maiu n aron are E a tia ni baaireia,

4b'a e na aki manga taekina te buakaka riau,

ao e na aki manga taekina te kewe neweu

5N na aki manga taekinna b'a kam eti,

N na boni kamatoaa ae I aki bure ni karaoan te m'akuri ae buakaka ni karokoa mateu.

6E na bon aki b'ara nanou i bukina

b'a I bon itiaki.

7Ke a bane ni katuaaeaki au kairiribai n aroia aomata aika buakaka,

ae akea te raoiroi i rouia, aika aomata ake aki toki ni kakaitaraai b'a kaanga aongkoa te aomata ae i buakaka ngai.

8Tera aia kaantaninga aomata aika akea atuaia

ngkana e a roko te tai are e a anaaki iai maiuia i roun te Atua?

9E bon kona n ongo tangiia te Atua ngkana a reke n te kangaanga?

10A bon riai ngkoa ni kainanoa te kakukurei are E anga,

a riai ngkoa n teimatoa n tataro nako Ina.

11N na reireiniko b'a korakorara m'aakan te Atua;

ma ni kab'arab'ara b'a tera te b'ai ae a tia ni baaireia te Atua ae m'aaka.

12Ma nooria, kam a bon bane n tia n nooria,

ao e aera ngkai kam taetae n te aro ae nanobaba?

13Toob'a, aio aron te Atua ni katuaaia

aomata aika buakaka, aika iowawa.

14E ngae ngkana tao a karikiia natiia m'aane aika m'aiti,

ma a na bane ni mate n te bo ni buaka;

e na aki tau reken te am'arake ae a na kanna natiia.

15Ao a na manga mate n te aoraki akana a reke maiuia;

ao ane a na aki tang naba aine ake a mate buuia.

16E ngae ngkana tao a tabukirake ana tirewa te aomata ae buakaka

n te aro ae aki kona ni warekia, ao a uataorake riki ana kunnikai nako ia aomata,

17ma ane a na b'ainaki aia kunnikai i rouia aomata aika raoiroi.

18Kaanga ai aron ngaon Ten Takareau ana auti te aomata ae buakaka ngkana e katei ana auti,

ke kaanga ai aron te auti ae uarereke ae ana auti te tia taratarai taian tawaana.

19Ao n te kabanea n tai, e na wene ma kaub'aina i aon ana kainiwene,

ao e na uti, ao e na kunea b'a a mauna nako kaub'aina.

20E na roko i aoia te b'ai ae kakamaaku, kaanga rokon te ieka,

ao a na ubara nako n te ang ae oro n te tairiki;

21e na iribiia nako te ang mainiku man aia auti;

22e oroia te ang n aki manga nanoangaia

ngke a tabe ni kakaai angaia ni birinako.

23A na b'ainingareaki i roun te ang n taabo nako i ke a birinako iai,

ma ni kakamaakuia ni korakorana n urub'ai.