Ieremia 16 - Kiribati New Version Bible

E Riai Ieremia Ni Maiuakina Ana Rongorongo

1E taku te UEA nako iu:

2Ieremia, ko na aki mare ma ni karikiia natim—e aki raoiroi Iuta i bukin te katei utu.

3N na tuangko b'a tera ae e na riki nako ia natiia ma aia utu ikai.

4Ane a na mate n te aoraki ae moan te kamaamate ao n te buaka ao te baki. Ao bon akea temanna ae e na karaoa te bootaki ni mate i bukiia ke n tauniia, ao e na riki rab'ataia b'a kanaia mannikiba ao maan aika a aki manana. Ao nikiran rab'ataia a na tiku i aon te tano kaanga nakotariia maan.

5Ko na aki kawariia aomata akana a mate aia koraki ke ni kaota nanokaawakim iai. N na aki manga tangiriia ke ni kakab'aiaia ke n nanoangaia kaain Iuta.

6E na bon ti te bo aron mateia aika a kaub'ai ma aika a maiu ni kainano b'a a na tiku n aki taunaki. Bon akea aika a na tang n nanoangaia ma ni kaota nanokawakiia ni korokorea rab'ataia ke ni kamaraa atuuia.

7Bon akea ae e na uota te am'arake ao te wain ni buokiia ni karaui nanoia akana tang i bukin mateia tamaia ma tinaia.

8Ko na aki naba roko n te auti ae e karaoaki iai te am'arake ma te mooi ao te bootaki ni kukurei.

9Kauringiia kaain Iuta b'a N na katoki aia bootaki ni kukurei ma aia botaki ni mare Ngai ae te UEA ae Moan te M'aaka.

10Ane a na titiraki ni kaangai, “E aera ngkai e a kamarakiira Atuara n taiani kabuanib'ai aika a m'aiti? Tera te kaairua ae ti a tia ni karaoia ke ara bure nakoina?”

11Ao i mwiina, ko na tuangiia te b'ai ae I a tia n taekinna:

Kaain Iuta, a tannako ngkoa ami bakatibu ma i Rou, a katinanikui Au tua ao Au reirei ao a manga moana taromaurian anti tabem'aang.

12Ao ngkami kam a tia ni karaoa ae moan te buakaka riki! Kam taningabono, ao kam karaoi b'aai aika a buakaka ake a reke n ami iango, ngke kam bon riai n ongotaeka.

13Ma ngaia are, N na karenakoingkami nako nanon te aba are a aki ataia ami bakatibu, te tabo ike kam na taromauri iai anti tabem'aang n te bong ma te ngaina. Ao N na bon aki konaa n nanoangaingkami,

14E na roko te tai are kam na manga taromauriai iai. Ma kam na aki manga aranai b'a te Atua ae E Maiu are e kamaiuia Iteraera mai Aikubita.

15Ma n onea mwiin anne, kam na aranai b'a te Atua ae E Maiu are e kamaiungkami mai meang ao man aaba tabeua ake I kairoroingkami iai b'a kam na nako.

N te bong teuana N na manga kaokingkami nakon te aba aei are I anganiia ami bakatibu.

16Ma n te tai aei, N na kanako ia kairiribai ake a na raweingkami kaanga te ika ma ni kam'aneingkami kaanga maan aika a aki manana i aon taian tabuki ao taian nangananga ni b'aa.

17I konaa n noori b'aai ni kabane aika kam karaoi, e ngae ngkana kam karabai ami bure mairou.

18N na kataboroa tuaami i bukin ami bure i bukina ngkai kam a tia ni kabuakaka te aba. Kam a tia ni kaonna n taian bouannanti aika a aki maiu kaanga maate.

E Anga te Korakora Te UEA

Ao I tataro nakon te UEA:

19Ara UEA, boni Ngkoe ae

Ko anganai te korakora

ma ni kaawakinai kaanga te nono

ngkana I reke n te kangaanga.

Ane a na roko aomata ni kawarai

man taiani botannaomata aika a raroa nako ao a na kaangai,

A taromauri anti ni kewe aika a akea manenaia

Ara bakatibu.

20Taiani bouannanti

aika a karaoaki a karaoaki ni bain te aomata.”

21Ao i mwiina, e kaeka te UEA ni kaangai,

“Bon anne bukina are N na reireiniia

iai aron m'aakau,

ao ane a na ataai iai b'a bon te Atua ni koaua Ngai.”