1E taku te UEA:
Au kaintokanuea karawa
ao nnen katokaniwaeu aonnaba.
Tera te aekaki n auti
ae ko na karaoia ibuku?
E nga te tabo ae N na motirawa iai?
2I a tia ni karaoi b'aai nako;
ao anne aron rikiia ni kabane.
Bon aei au taeka Ngai ae te UEA.
Aomata ae I kawakinia riki
bon aika nanorinano
are a mena aia mwioko irou
ao a ruru ngkana I taetae.
3Kam kareani taiani kaom'aane nako iu,
ao kam tiriaomata;
kam karean taian tiibu ataei nako iu
ao kam karean taian kamea nakoia anti tabem'aang;
kam karean taiani uita nako iu
ao raraan taiani beeki nakon taian bouannanti;
kam kabuoki b'ai ni kaboiarara nako iu
ao kam neboi ami bouannanti.
Kam a tia ni rinea are kam tangiria b'a kam na karaoia
ni karaoi m'akuri aika a rangi n ribaaki aikai
aika b'aai aika kam rangi n tangiri ni kan karaoi.
4Kam rawa n ongo weteami
ngke I weteingkami;
Kam aki kan ongo
nakon au Kaetieti.
Ma kam a manga karaoi baika a ribaaki,
ngke kam bon ataia b'a a bon kaairua.
Ao ngkai N nang katuaaingkami
n te aro ae kam na rangi ni maaku iai.
E Na Buoka Iteraera Te UEA5Ngkana kam ruru
ngkana e taetae te UEA,
ao kam na kakauongo nakon te b'ai ae e taekinna ae e kaangai:
“A ribaingkami tabeman aomata ibuku
ao a rawa naba iroumi ibuku.
A b'ab'ainingare ao a taku,
Ke E kaota m'akana te UEA!
Ti a mataku i rouna
ngkana e anganingkami te kukurei ni koaua.’
Ma ane a na mamaa
koraki akana a atong baikai.”
6Kam a ongo taian karongoa akekei
ake i nanon te kaawa arei ma taian tatakarua
aika a nako man te Tembora?
Bon takaaruan te UEA
ngkai e tabe ni katuaaia ana kairiribai.
7Ko a tia n ongongo taekan te aine
ae e bungia natina
i m'aain ae e mamarakinna?
8Antai ae e a tia n ongongo aei
ke n iangoia b'a e konaa n riki?
E konaa ni bungiaki te botannaomata n ti te bongina?
ke ni manga maiu i nanon teuana te teekan?
Bon ti te bo Ierutarem ma te tina
ae e bungiia natina
i nanon te tai are e mamaraki iai.
9Bon te UEA
ae E kanakoraoa te bung.
Ao E na bon nooria b'a
e na karikiia natina aika a bati Tion.
Boni Ngai ae te UEA ae I taetae.
10Kukurei ao takaarua,
ngkana kam tangira Ierutarem!
ngkana kam nanokawaki i bukina ngkoa
kam na kakatonga ngkai.
11E na m'aneingkami ao e na anganingkami te mwenga raoi,
n aron raoi oin tinami,
ni karokoa kam rauaki raoi.
Kam na onrake n te kukurei
n mimitongina ae e kamimii.
12E a tia ni berita te UEA:
“N na kataonakoa Ierutarem
ni kaub'aia botannaomata nako
ao N na karika te kaawa b'a te tabo ae e mari.
E na kammammaingkai Tion ni mammana,
ao e na uouotingkami ni baina,
ao e na b'ab'akoingkami i m'anokana.
13N na uouoingkami ikekei
kaanga te tina
ngkana e uoua natina.”
14Kam na kukurei ngkana kam
nooria b'a a riki baikai;
e na manga waekoa riki okin korakorami
nakon te rikiraken te uteute ae e a tib'a bwebwerake.
Ao ane a ataia aomata
b'a e mena te UEA
irouia ana taan m'akuri nako
ao e un
nakoia ana kairiribai ni kabane.
15E na ruorikaaki te UEA
kaanga te ukeukenanti
ao a na kaanibuaka aika taian ai.
E na rangi n un
ao ni katuaaia ana kairiribai
n te ai.
16E na uota te motikitaeka ae e eti
ana taeka te UEA ae e ura
nakon taabo nako n te aonnaba aei
ao e na tiringiia aomata aika a m'aiti.
Te Karawawaataki Ao Te Berita17Iai tabem'aang mai buakomi aika a katauraoia ao a nakon te nne n aroka b'a a na taromauriia antiia ianena. Kam kang irikon taiani beeki, taian beru, ao taiani kimoa. Ma N na tiringingkami Ngai ae te UEA i bukin karaoa aei.
18I ataia b'aai ni kabane aika kam karaoi ao aika kam iangoi! E a roko ngkai te tai are a na ikotaki iai aomata nako aika a kakaokoro aia taeka ao botannaomata nako ni kaota nakoia mimitongiu
19man kakoauaan te b'ai ae I konaa ni karaoia. N na karokoia taiani nikira ni maiu mai Taretiti, Bura, Ruuta, Meteka, Tubara, Iawan, ni karokoa abam'akoro ake a raroa nako. N na kanakoia b'a a na katanoataa mimitongiu ae e kamimii nakoia botannaomata nako aika a tuai man ongongo taekau.
20A na uotiia mai ami koraki man taiani botannaomata b'a taian karea nako iu, Ngai ae te UEA. A na roko i aon taian aoti, taian kaanibuaka ao kaani m'am'ananga, miure ao taiani kaamero nako Ierutarem, ae Au maunga ae e tabu. A na riki b'a kaanga Iteraera aika a uoti taian karea nakon au Tembora.
21N berita nakoia b'a a na riki tabeman mai buakoia b'a taian ibonga ao tabeman b'a taan i buobuoki n au Tembora. Bon aio au taeka Ngai ae te UEA.
22I berita naba b'a kam na teimatoa ni karikiia kanoami ao a na m'anuokinaki taekaia, kaanga ai aron karawa ae e boou ao te aonnaba ae e boou ae I a tia ni karikia are a na akea tokiia.
23Ni moanibongin te Toa ae Moan Otin Nam'akaina ao ni katoa Taabati, a na bane aomata nako n taromauriai. Bon aio au taeka Ngai ae te UEA.
24A na otinako au aomata ni kakaai rab'ataia ake a kakaitaraai. A aki konaa ni mate taian ino ikekei, ao e aki konaa n toki uran te ai, ao a na rangi n ribaaki taraan rab'ataia aomata aikai irouia aomata nako.
Who We AreWhat We EelieveWhat We Do
2025 by iamachristian.org,Inc All rights reserved.
