1Ao e taku Tamuera nakoia Iteraera:
I a tia n anganingkami te uea, n aron ami bubuti.
2Kam a tia n noora aron kairakimi i rou ni moa man te tai are I rorobuaka n ataei iai. I a boni kara, a iaia iran atu, ao a ikawai natiu m'aane. Ao ngkai kam nang noora raoi aron kairakimi iroun ami uea.
3N nang titirakiningkami moa, I a tia n anaa ana kaom'aane te aomata temanna ke ana aati, ke ni imanonoingkami b'a kam na anganai te b'ai teuana? I a tia ni kaikoaka te aomata temanna ke ni karaoa te kamaraato i bukin karaoan te babaire ae aki eti? Kam na kaekaai ngkai b'a e na ongo te UEA ma te uea are E rineia. B'a ngkana arona b'a I a tia ni karaoa teuana mai buakon baikai, ao n na kabooa mwiina.
4Ao a taku Iteraera, “Ko tuai man karaoa anne nako ira!”
5Ao e taku Tamuera, “Bon taani kakoaua te UEA ma te uea are e rineaki nakon baika kam taekin.”
Ao a taku aomata, “Eng, bon te koaua.”
6Ao e taku Tamuera nakoia:
E kaotinakoia ami bakatibu te UEA mai Aikubita ao E rinea Moote ma Aaron b'a taani kairiiri.
7Ao ngkai E na riki te UEA b'a ami tia moti. Ma ngaia are, kam na tei ao kakauongo, ngkana I kauringngkami aron te UEA ngke E aki toki ni kakamaiungkami ma ami bakatibu mairouia ami kairiribai.
8I mwiin nakon Iakob'a nako Aikubita, ao a tang ami bakatibu nakon te UEA i bukin buokaia, ao E kanakoa Moote ma Aaron te UEA. Ao a kairiia ami bakatibu mai Aikubita ao E katekatekaia n te aba aei.
9Ma a manga m'aninga taekan te UEA ami bakatibu, ma ngaia are, A kataenikaiaki irouia kaain Biritia, ma uean Moaba, ao Titera, are te kam'aanta n ana taanga ni buaka Atora.
10Ao a manga tang naba nakon te UEA ami bakatibu i bukin buokaia. Ao a taku, “Ti a tia ni bure! Ti aki tataromauriko, ara UEA, ao ti a manga moana taromaurian B'aara ao Nei Atiterota. Ma ngkana Ko kamaiura ngkai mairouia ara kairiribai, ao ti na manga taromauriiko.”
11Ao E kanakoa Kiteon te UEA, Betan, Iebeta, ao Tamuera b'a a na kamaiungkami mairouia ami kairiribai, ao kam aki raraomaeakina buakanakimi.
12Ao kam nooria b'a e nang buakaningkami uean Ammon are Naati. E ngae ngke bon ami UEA ae te Atua ae ami uea, ma kam taku nako iu, “N te tai aei ao e kaokoro, ao ti a tangira te uea ae na tautaekaniira!”
13Kam bubuti karekean ami uea, ao kam rinea temanna. Ao ngkai e tei i rarikira ao kam boni bane n nooria. Ma bon te UEA ae rineia b'a ami uea.
14Ngkana kam tangiria ni kan riki b'a taan ri mwiin ami UEA, ao kam na tataromauria ao karaoa te b'ai ane taekinna. Kam na aki taningabono!
15Ma ngkana kam taningabono ma n kamoamoaingkami nakon te UEA, ao ane na kaaitaraingkami ma ami uea.
16Kam na ti tei ikai ao matakuakina te UEA b'a E na kaota korakoran m'aakana.
17Tiaki aei ngkoa tain te m'auteretere? N na bubutiia te UEA b'a E na karokoa te karau ma te baa. Ngkana kam nooria, ao kam na ataia b'a kam a tia ni bure ngke kam tangira te uea.
18Ao e tataro Tamuera, ao ni bon te bong naba arei, E a kanakoa te karau ma te baa te UEA. Ao a bane ni maaka te UEA ma Tamuera aomata.
19Ao a taku nakon Tamuera, “Taiaoka ma tataro i bukira nakon te UEA ae Atuam. Ti aki kan mate. A m'aiti ara bure nako Ina n taai aika nako, ao ti bon rangi ni bure naba ngke ti a manga tangira te uea.”
20Ao e taku Tamuera:
E ngae ngke kam a tia ni karaoa te bure ma kam na aki maaku. Ma kam na ti iriira nanon te UEA n taai nako ao kam na taromauriia ma nanomi ni kabane.
21Kam na aki taromaurii taian bouananti! Bon akea m'aakaia, ao a bon aki konaa ni buokingkami ke ni kamaiungkami ngkana kam a reke n te kangaanga.
22Ma E a tia n rineingkami te UEA b'a Ana aomata ni koaua. E na kakaawakiningkami n taai nako b'a kam aonga ni bane n ataa aroni korakorana.
23Ngkana I katoka au tataro i bukimi, ao I aki ongotaeka iai nakon te UEA! N na reireiningkami n taai nako aromi ni maiuakina te raoiroi.
24Kam na riai n ongotaeka iroun te UEA Kam na riai n taromauriia ma nanomi ni kabane, ao uringi b'aai ni kabane aika ab'ab'aki ake E a tia ni karaoi i bukimi.
25Ma ngkana kam karaoa te m'akuri ae buakaka ma ami uea, ao E na kamaunaingkami te UEA.
Who We AreWhat We EelieveWhat We Do
2025 by iamachristian.org,Inc All rights reserved.
