1Ao a roko tabeman mai Tib'a ni kawara Tauro i Kibea ao a tuangnga b'a e karabaa Tawita i aon te Maunga are Akira i mataniwiin rereuan Iuta.
2E kawaekoa Tauro ni m'ananga ma ana taanga ni buaka aika a bane aroia aika 3,000 nakon rereuan Tib'a ni kakaaea Tawita,
3ao a kaemb'a i rarikin te kawai i aon te Maunga are Akira. E bon mena Tawita n te rereua, ngke e a ataia ae ngaia e a roko Tauro ni kakaaea,
4e kanakoia ana taan kakaae rongorongo ao e ataia b'a e a bon roko Tauro ikekei.
5E kawaekoa n nako nakon te tabo are a mamatu iai Tauro ao Abenera are natin Nera, are mataniwiin ana taanga ni buaka Tauro. E matu Tauro i nanon te maeka, ao a kaemb'a ana rorobuaka ni katobibia.
6Ao e titirakina Aimereka are kaain Eta, ao Abitiai are tarin Ioaba (Tinaia bon Nei Teruia), ao e taku nakoia, “Antai mairoumi ae e na irai nakon ana kaemb'a Tauro?”
Ao e kaeka Abitiai ni kaangai, “N na iriko.”
7Ma ngaia are, a niniia ana kaemb'a Tauro Tawita ma Abitiai n te tairiki anne, ao a kunea Tauro ni matu mai nuukan te maeka ma ana kainiwai ae e unikaki i aon te tano i rarikin atuuna. A matu Abenera ma ana taanga ni buaka ni katobibia.
8E taku Abitiai nakon Tawita, “E a tia te Atua ni katuka taekan am kairiribai i nanon baim n te tairiki aei, Kariaia b'a N na ewaria n oin ana kainiwai ni kanimm'a ma te tano n ti teuana ruon baiu; I aki manga ewaria riki te kauoua n tai.”
9Ao e reitia Tawita ma n taku riki, “Tai tiringnga! Bon ti te UEA ae e konaa ni katuaaea te uea ae E bon rineia.
10Ngkai bon iai te UEA ae e maiu, ao I ataia b'a E na bon tiringa Tauro, tao ni bon ana tai ni mate ke e na mate n te buaka.
11E na bon aki kariaia te UEA b'a N na tiringnga teuae E a tia n rineia te UEA b'a e na uea! Ti na anaa ana kaniwai ao ana tiaeki n ran, ao tia nako naba.”
12Ma ngaia are, e anaa te kainiwai ao te tiaeki n ran Tawita mai rarikin raoi atuun Tauro, ao e a m'ananga nako ma Abitiai. Bon akea temanna ae e noora ke n ataa te b'ai are e riki ke n uti; b'a e a tia te UEA ni kanakoa te matu ae e korakora i aoia ni kabane.
13Ao i mwiina, e ri aon te tia Tawita nakon iteran te m'arua are te iterana nako taubukin te tabuki, ni kaua raroaia,
14ao e takaarua nakon ana taanga ni buaka Tawita ao nakon Abenera, “Abenera! Ongo b'anaau?”
Ao e kaeka Abenera ni kaangai, “Antai are e takaarua ni kauta te uea anne?”
15Ao e taku Tawita, “Abenera, a taku aomata b'a te kabanea ni kakamaaku ngkoe i aon Iteraera? Ma e aera ngkai ko aki kaawakina am toka ae te uea? E a tia ninian ami kaemb'a i bukin tiringakin am toka.
16Ko aki kororaoi n tib'angam. Abenera! I tuea n aran te UEA ae e maiu b'a kam bon riai ni mate ni kabane b'a kam a tia n aki kakaawakina ami toka, are e rineia te UEA b'a e na uea. Nooria! E ngaa ana kainiwai am uea? E nga ana tiaeki n ran are e mena i rarikin atuuna?”
17Ao e kinaa b'anaan Tawita Tauro ao e titiraki ni kaangai, “Tawita, boni ngkoe anne ae natiu te rorobuaka?”
Ao e kaeka Tawita ni kaangai, “Eng, teuae ko karineaki.”
18Ao e a manga reitia riki ma n taku, “E aera teuae ko karineaki ngkai ko a bon ririmwiiai naba, ngai ae am toro? Iai te b'ai ae I a tia ni karaoia? Tera te kaairua ae I a tia ni karaoia?
19Te uea ae ko karineaki, ongora nakon te b'ai ae N na taekinna. Ngkana bon te UEA ae e karaoiko b'a ko na eekainako, ao e na konaa ni bitaki nanona n te angakarea nakoina; ma ngkana arona b'a bon mairouia aomata ae e riki iai aei, ao ke a b'akariia ana kamaraia te UEA. B'a a tia ni kanakoai man aban te UEA nakon te aba ae e ti tataromauriaki iai antiia ianena.
20Ko na aki kariaia b'a N na tiringaki n tanon abaia ianena, n te tabo ae e raroa nako mairoun te UEA. E aera uean Iteraera ngkai e nakomai b'a e na tiringai ngai ae kaanga utin te man? E aera ngkai e kaeai kaanga te mannikiba ae e aki manana?”
21Ao e kaeka Tauro ni kaangai, “I a tia ni karaoa ae e kaairua. An ooki Tawita, ae natiu te rorobuaka! N na bon aki manga karaoa riki ae e buakaka nakoim, b'a ko a tia n nanoangaai n te tairiki aei. I a tia n nanobaba! I a tia ni karaoi m'akuri aika a kakamaaku!”
22Ao e kaeka Tawita ni kaangai, “Aei am kainiwai, te uea ae ko karineaki. Kanakomaia temanna am aomata b'a e na nakomai n anaia.
23E na anga te kaniwanga te UEA nakoia aika a kakaonimaki ma ni karaoa ae e raoiroi. E nang kaaki taekam i nanoni baiu te UEA, ma I aki karaoa ae e buakaka nakoim, ngkoe ae ko rineaki b'a ko na uea iroun te UEA.
24Tera ngke E karaoa ae aron aei nako iu te UEA ma ni kainaomataai man taiani kangaanga ni kabane n aron ae I a tia ni karaoia nakon maium n te bong aei!
25Ao e taku Tauro nakon Tawita, “E na kakab'aiako te Atua natiu ae Tawita! Ko na bon tekeraoi ni b'aai ni kabane akana ko na karaoi!”
Ma ngaia are, e toua nako kawaina Tawita, ao E okira mwengana Tauro.
Who We AreWhat We EelieveWhat We Do
2025 by iamachristian.org,Inc All rights reserved.
