Taian Areru 118 - Kiribati New Version Bible

Te Tataro Ni Katituaraoi

1Kam na katituaraoa te UEA,

b'a E raoiroi,

ao akea tokin ana tangira.

2Ke a kaangai te botannaomata ae Iteraera,

Akea tokin ana tangira.

3Ke a kaangai ana Ibonga te Atua,

Akea tokin ana Tangira.

4Ke a bane ni kaangai akana taromauria,

Akea tokin ana tangira.

5I wetea te Atua

ngke e kai nanou;

E ongo irou

ao E kamaiuai.

6Bon raou te UEA,

N na aki maaku;

Tera ae e kona te aomata ni karaoia nako iu?

7Bon te UEA buokau,

ao N na tokanikai i rouna

i aoia akana riribaai.

8E raoiroi riki te onimakina te UEA

i bukin kawakinara

nakon onimakinaia riki tabeman,

9n reitaki naba ma taani kairiri aika korakora.

10A otab'aniniai kairiribai aika bati;

ma E buokai te UEA

n ekianako nako ni m'akana!

11A otab'aniniai;

ma E buokai te UEA

n ekianako nako ni m'akana!

12A otab'aniniai n ai aroia manibeeru,

ma a waekoa n toki eeia ni bane;

ngkai E buokai te UEA

n ekianako nako ni m'akana.

13E korakora buakanakiu

n te aro ae N nang konaaki,

Ma E buokai te UEA.

14E kakorakoraai te Atua

ao E kamarurungai;

E a tia ni kamaiuai.

15Man aia kaemb'a ni maeka ana aomata te Atua

ao e roko te takakaa n tokanikai

ni kaotia b'a E reke aei iroun te UEA ni m'akana ae korakora!

16Ni m'aakan baina

E reke ana tokanikai!

E boni m'aaka te UEA.

17I tekeraoi b'a I aki mate;

ma ngaia ae N na kabongana maiu n tataekina te b'ai

ae E a tia ni karaoia te UEA.

18E a tia ni karaoa

ae N na rangi ni karawaawataaki iai,

Ma E aki anga ngai nakon te mate.

19Kauka nako iu mataroan te motikitaeka ae eti

N na rin man tuanga te UEA;

arou n anganna katituaraoana!

20Aio ana mataroa n rin te UEA;

akana kakaraoa ae raoiroi

ana boni kona n rin iai.

21Te UEA, I neboiko,

i bukina ngkai Ko kaekai au tataro

ao ko kamaiuai

22Te atibu are a kakeaa

bonganana taani kateitei,

e a riki b'a

te kabanea ni kakawaki.

23Boni mairoun te UEA te baei;

ai kamimiira taraana!

24Aio bongin ana tokanikai te UEA!

ti na kukurei,

ao ti na kakatonga n te bong aei

25Kamaiura, te UEA, kamaiura!

Ti na butiia te UEA ma nanora aika itiaki

b'a e na anganira te tekeraoi!

26E na kakab'aiaki iroun te Atua te aomata

ae nako mai n aran te UEA!

Ti taetae ni kakab'aiaingkami

man te Tembora ae ana Auti te UEA.

27Bon te Atua te UEA;

E a tia n anganiira te oota!

Moana te bootaki ni kukurei!

Kam na m'ananga ma m'angani kaai

ao waaki nakon te baonikarea.

28Bon Atuau Ngkoe,

ao N na katituaraoiko;

N na kaotiota kakannatom.

29Kam na katituaraoa te UEA,

b'a E raoiroi,

E akoi

ao akea tokin ana tangira.