Iotua 12 - Kiribati New Version Bible

Uea ake a konaaki iroun Moote

1I m'ain maten Moote, ao a kataenikaia uea aika uoman n aaba ake i mainikun te Ioretan. Ueea aikai a tia n tautaekanii aono ake man te m'arua are Arenon ni karokoa maungan Amon are i meang, n reitaki ma iteran mainikun te karaanga are te Ioretan.

2Temanna mai buakoia bon Taion, uean Amora are e maeka i Etibon. E reke iteran Kireata are maiaki i nanon aban te uea are Taion; mai Aroera (i etan te m'arua are Arenon) ao man te kaawa are i nukan te m'arua, ni karokoa te karaanga are Iaboka, are tian abaia te baronga are Amon.

3E reke naba i nanon abana m'aruan te Ioretan man te nama are Kariraia nako aiaki nako B'atemoti (i mainikun taari are mate) ni kaineta oin te maunga are Bitika.

4A kataenikaia naba te uea are Oka, are uean B'atian Moote ma aomatan Iteraera are bon ngaia temanna nikiraia Rebaim. E maeka i Atitarota, ao i Eterei.

5E reke i nanon aban te uea are Oka te maunga are Amon, ma Tareka, ma B'atian ni kabane ni karokoa tian Keturi ma Maakata, ao iteran naba Kireata, ao e toki n aban te uea are Taion are e maeka i Etibon.

6A taenikai uea aika uoman aikai i roun Moote ma aomatan Iteraera. Ao e anga abaia uea aikai Moote nakoia barongan Iteraera ake Reuben, ma Kata ao nakoia naba iteran te baronga are Manate b'a abaia.

Taian uea ake a taenikai i roun Iotua

7A bane n taenikai uean aaba ake i maeao i roun Iotua ma aomatan Iteraera, ni moa mai B'aara-kata are ni m'aruan Reb'anon ni karokoa te maunga are Araka are i maiaki i rarikin Etom. Ao e tib'atib'ai aaba aikai Iotua i aon barongan nako Iteraera b'a ai bon abaia.

8A reke naba i nanon abaia aaba ake a tabukibuki, ma aaba ake a rinano ake i maeao, ma aaba ake ni m'aruan te Ioretan, ao ake i oin taian tabuki ma aaba ake n te karabee ake i mainiku, ma aaba ake a m'auteretere ake i maiaki. Bon mwengaia ngkoa te baronga are Eta, taian Amoraite, ma te baronga are Kanaan, ma taian Beritaite, ma Iwaite, ao Iebuti aaba aikai.

9Aikai kaawa ake a taenikai ueaia irouia aomatan Iteraera: Ieriko, Ai (i rarikin Betaera),

10Ierutarem, Eberon,

11Iaremuta, Rakiti,

12Ekeron, Ketere,

13Tebira, Ketere,

14Orima, Arata,

15Ribena, Aruram,

16Maketa, Betaera,

17Tabua, Ebera,

18Abeki, Ratiaron,

19Maton, Atora,

20Timron-meron, Akitaba,

21Taanaka, Mekito,

22Keteti, Iokeneam (i Karemera),

23Tora (i mataniwiin taari), Koiim (i Kariraia),

24ao Tireta. Bootaia ni kabane uea aikai bon tenibwi ma teuana.