Ab'akuka 2 - Kiribati New Version Bible

Ana Kaeka te UEA nakon Ab'akuka

1N na tam'arakea au taua n taratara, ao n na tataninga b'a n na nora te b'ai ae E nang tuangai te UEA, kaekaan ngurengureu.

2Ao E kaekaai te UEA ao E kaangai, “Koroi ni kaotai raoi i aon baaba ni koroboki baika N na kaoti nakoim, b'a a aonga ni kai warekaki.

3Korobokiia b'a a tuai n roko tain taeka aikai, ma ana bon waekoa ni koro nanoia, ao baika I tuangko ana bane ni koro bukiia. E taraa ni kiriaria, ma tataninga b'a ana bon roko baikai, ao ana bon aki taonaki taiia.

4Ao aio te rongorongo, “Ana bon aki tiku ni maiu aika a buakaka, ma aika a raoiroi ana bon maiu i bukin aia kakaonimaki nakon te Atua.”

B'akaia Aika a Buakaka

5Te kaub'ai bon te tia m'am'anaa te aba. Aomata aika a m'angai-n-rang a kamoamoa ao akea aia motirawa. A bon aki kona n rauaki nanoia n ai aron te mate (rua-ni-mate). Ao bon anne bukina are a buakani man taui aaba teuana i mwin teuana.

6Aomata ake a taenikai, a b'ainingareia ake a konaia man kakanikoia. A taku nakon B'aburon, “Ko anai baika tiaki am b'ai ma ae E nang oroiko te Atua. Ai ti maanra ngkoe n aia kaub'ai man anaaki am m'ane mai rouia aomata?

7N te tai ae ko aki kantaningaia, ngkoe ae ko a tia ni konaia tabem'aang, ana manga kaoka aei nakoim ake ko karaoa aei nakoia. Ana roko am kairiribai ao ko na ruru ni maaku. Ao ana kurib'aiko.

8Ko a tia ni kurib'aia aomatan botannaomata aika a bati, ma ngkai uaake nikira ni maiu ana manga kurib'aiko i bukin am tiritiri, ao am iowawa nakoia aomatan aaba ma kaawa nako.

9Ko na b'aka. Ko kab'aib'aia am utu man baika ko karekei n te iowawa. Ko a tia ni kataia ni kamanoa man te kabuanib'ai, ao te kangaanga.

10Ma am babaire a karika te mamaa i aoia am utu, ao kamaunakiia botannaomata iroum, ko bon urua oin maium iai.

11Ana takaarua naba atiibun taian oo ni kabuakakako, ao kain te auti ana taekina naba ae tii te arona.

12Ko na b'aka, b'a ko aana am kaawa ni m'akuri aika bure, ao ko kateia n te tiritiri.

13Botannaomata ake a b'aka iroum, a kabanei aia tai ni m'akuri iroum ao b'aai ni kabane aika a katei, ana bane ni buee n te ai. E na karaoi baikai te UEA ae E m'aaka.

14Ao e na onrake te aonnaba n ataakin mimitongin te UEA n ai aron taari ae e kaona marawa.

15Ko na b'aka. Ko a tia ni kamamaaia, ao ni kakeaia kaain rarikim, ao ni karaoia b'a ana tatatata ni koro ni manging.

16E na manga okiriko te mamaa n onea mwin te karineaki. Ko na mooi man tatatata. E na kamoiko te UEA ni bon oin m'angkon oream, ao karineam e na onikaki nakon te b'ainrang.

17Ko a tia ni koroi ao ni kab'akai buakonikain Reb'anon, ao ngkai, ko na manga koreaki ni kab'akaaki. Ko tiring manna, ao ana aki karauko maan. Aio te b'ai ae e na riki nakoim i bukin am tiritiri, ao i bukin naba iowawaam nakoia aomatan te aonnaba ma kaawa nako.

18Tera manen te bouannanti? Ti te b'ai ae e bon karikia te aomata, ao e anga taeka aika akea nanoia, aika keewe. Bon tii ana karaob'ai te aomata, e bon aki kona n taetae.

19Ko na b'aka b'a ko kaangai nakon te m'akoro ni kai, “Uti!” ke nakon te m'akoro n atibu, “teirake!” E kona ni kaoti b'aai te bouannanti nakoim? E tii kabiraki aona n te tirewa ma te koora ma bon akea te maiu i nanona.

20E mena te UEA i nanon ana Tembora are e tabu, ke a bane kaain aonnaba ni kainab'aabu i matana.