Etekiera 44 - Kiribati New Version Bible

E Na Riai N Aki Ukuki Mataroan Mainiku

1E kairai te m'aane arei rikaaki nakon katawanangin oon te Tembora, i rarikin te mataroa are mai mainiku n te tabo are e mena iai te Tembora. I nooria b'a a in taiani mataroa nakon te mataroa aei.

2E taku te UEA:

Bon te UEA Ngai ae Atuaia Iteraera, ae I roko ri nanon te mataroa aei, ma ngaia ae, kam na kaakainna n aki kaakaukia n taai nako! Bon akea temanna ae e na kamanenaa.

3E na nakomai nako ikai te tia tautaeka mai Iteraera ni kana te iriko ni man are te karea ake a tia aomata n anga nako iu, ma e na ti kabonganaa ruun te kawai n rin n te mataroa aei.

Aomata Ake A Aki Kariaiakaki I nanon Te Tembora

4Ao i mwiina, e kairai nakon te mataroa are mai meaang nako matan te Tembora. I nooria b'a e on te Tembora n raneanean mimitongin te UEA, ao I kawaekoai ni bobaraaki ni kaboa matau ma aontano.

5E taku te UEA:

Etekiera, ae natin te aomata, N na anganiko taian tua i bukin au Tembora. Ma ngaia ae, tanimai ao kakauongo raoi b'a antai aekaki n aomata aika a kariaiakaki n roko i nanon te Tembora, ao antai aika a aki.

6Ko na kaangai nakoia Iteraera aika taani kamangao:

Bon te UEA ae te Atua Ngai ae I tuangkami b'a kam na katoki taiani m'akuri aika a buakaka!

7E a tia ni kamatauningaaki au Tembora, i bukina ngke kam a tia ni kariaia ianena aika akea atuaia, aika a taningamatoa b'a a na roko ikai i nanon tain te anga karea nako iu. Kam a tia ni bure ma n tia n urua ara boraraoi ae e matoa.

8Ngke kam bon riai ni karaoa raoi kawain taromauriau, kam a manga kateia ianena b'a a na tararuaa te taromauri i nanon au Tembora.

9Ai ngaia are, e kaangai Au taeka Ngai ae te UEA ae te Atua b'a te ianena ae akea atuana ae aki ongotaeka irou ae e na bon aki kariaiakaki i nanon au Tembora. Aio naba i bukiia ianena akana a maeka i Iteraera.

A Katuaaeaki Kanoan RewiE taku te UEA:

10Iai tabeman kanoan Rewi aika a tannako mairou ao a raoniia Iteraera tabem'aang ake a taromauri taian bouannanti. Ma ngaia are, a na riai ni katuaaeaki kanoan Rewi aikai!

11A na bon teimatoa naba ni kariaiakaki b'a taan m'akuri i buku n te Tembora, ake taan tei n taian mataroa ao n tiringiia maan ake a na kareanaki ao ni buokiia taan taromauri.

12I berita Ngai ae te UEA ae te Atua b'a a na katuaaeaki kanoan Rewi aikai i bukina ngke a buokiia aomata ngke a taromauri taiani bouannanti. A aki katokiia Iteraera mani karaoan te bure,

13ao ngkai N nang aki manga kariaia kanoan Rewi b'a e na manga riki b'a te ibonga ke n roko i rarikin b'aai aika a tabu i buku. A na kamaamaaeaki ao ana kamatauningaaki i bukin aia bure aika a rangi n ribaaki.

14A na tararuai taiani m'akuri ni kabane aika a rawaawata aika a na karaoaki n te Tembora.

Taian Tua I bukiia IbongaE taku te UEA:

15A kakaonimaki nako iu ibonga ake man te baronga are Rewi ake kanoan Tatoka are te ibonga are e kakaonimaki nako iu, ngke a bane n tan nako mairou Iteraera. Ma ngaia ae, a na teimatoa n riki b'a Au ibonga aikai ao a na anga te nenea ao raraan te karea.

16A na roko n au Tembora, ike a na anga iai taiani karea i aon Au baonikarea ma ni kairiia tabem'aang n te taromauri.

17Ngkana a roko ni katawanangin te Tembora, a na riai ni kunnikaia ni kunnikaia ibonga. A na aki kukunnikaiia Au ibonga ni b'aai nako aika a karaoaki ni buraen te tiibu ngkana a karaoa aia m'akuri n te katawanang aei ke i nanon te Tembora.

18A na riai ni karaoaki naba rabunan atuuia ma aia kawaerake man te riinen b'a aonga n aki rangi ni maono Au ibonga ngkana a m'akuri.

19Ao a na riai ni buuti moa aia kunnikai ni ibonga i m'aain nakoia ni kawariia raoia tabem'aang ni katawanangin te Tembora, a na riai n buuti aia kunnikai ni ibonga, ao ni karin kunnikaia n aki akaaka. E na bon akea temanna ae e na konaa n riinga aia kunnikai aika a tabu ma ni karekeia n te kangaanga.

20A na kookoromaraia ibonga ngkana a tanginiwenei. A na bon koroi raoi iraia ma n aki rangi ni kam'arairai.

21A na aki riai n nima te wain i m'aain nakoia nakon te katawanang are mai nanoaa.

22E riai te ibonga n aki mare ma te aine ae e mate buuna, e na ti mare ma ataeinainen Iteraera ke buun te ibonga temanna ae e a tia ni mate.

23A na riai ibonga n reireiniia Au aomata ataakin kaokoron b'aai aika a tabu ma baika a aki tabu, ao kaokoron b'aai aika a itiaki ma b'aai aika a aki itiaki.

24A na babaaire n ri aon taian tua ni kaineti ma au Tua nako. A na riai naba n kaawakin taian toa ni kabane akana a tangiraki n au Tua ao a riai ni karinea te Taabati n taai nako.

25E na kam'araa te aomata ngkana e riinga te mate. Ma ngaia are, e aki riai te ibonga n aki kaaniia te mate, ma ti ngkana bon temanna mai buakoia ana karo ke natina, ke tarina ke m'anena ae e tuai mare.

26Ngkana arona b'a e riinga te mate te ibonga, e na bon kam'araa iai ao e na riai n ri nanon te bootaki teuana b'a e aonga n itiaki. Ao itiua te bong i mwiina,

27e na nakon katawanangin te Tembora ao e na anga te karea i bukin ana bure. I mwiin anne, e na manga konaa n riki b'a Au ibonga. Bon aei Au taeka Ngai ae te UEA ae te Atua.

28Boni Ngai ae N na katauraoi b'aai nako i bukiia ibonga, ma ngaia ae, e na akea tib'aia n te aba are e na riki b'a oin abaia.

29Ma, e na reke irouia iteran taian karea ake taian uita, ao ai uana naba ma m'akoron te karea i bukin te bure ao te karea are kaetan b'aai. A na anganaki naba b'aai ni kabane i aon Iteraera ake a tia ni katabuaki b'a Au b'ai.

30E na b'ainaki moan m'akoron uaan te tai irouia ibonga. A na b'ain naba m'akoron taiani b'aintangira ni kabane ao taian angab'ai ake a uoti Iteraera nako iu. Ao ngkana iai akana a kam'aa kanaia te kariki, a na riai n anga te moan kariki b'a aia angab'ai nakoia ibonga, ao N na kakab'aia mwengaia aomata akana a karaoa aei.

31A na riai n aki kang taian mannikiba taian ibonga aika a mate i bon irouia ke akana a tiringaki irouia maan aika a aki manana.