Otea 10 - Kiribati New Version Bible

1Bon te kai te kureebe ngkoe

ae e onrake ni uaana.

Ma m'aitin riki uaana

bon m'aitin naba te baonikarea ae ko karaoia;

raoiroin rokom

bon raoiroin te oota are ko karikia

i bukiia antiia beekan.

2Ko kam'am'ane ao ko aki kakaonimaki.

Ma ngaia are, ko na anganaki boon

am bure nako,

i bukina b'a E na urua

am baonikarea ao am banna te UEA.

3Ane kam na kaangai,

“Akea ara uea.

Ti aki maaka te UEA.

Tera manenan te uea?”

4Iteraera, ko urui taian boraraoi

ao ko aki kaawakina te berita;

ko onika te eti

nakon te uteute ae boitin

ike e na riai ni maiu iai te aroka ae e maiureirei.

5A bane ake a maeka i Tamaria n ruru ni maaku

i bukin iangoan taian bouananti

i Betaera are e korakora te bure iai.

te bouannanti bon aia kamoamoa

taian ibonga,

ma a bon uotiia nakon te kamamaaeaki;

ao ngkai a bane n tang.

6E na uotaki nako Aturia

ao e na anga te aba nakon te uea are e kakannato.

Ao i mwiina, e na kamamaaeaki Iteraera

i bukin taromaurian te bouananti anne.

7E na beti nako

uean Tamaria,

kaanga te m'akoro ni kai i nanon te raanga n ran.

8A na uruakaki taian baonikarea

ake i Betaera are e bure korakora

i bukin karekean Iteraera n te bure;

a na rabunaki nako

n aroka aika a kateketeke ao taian aroka aika a kateketeke baaia.

Ao ane a na bane aomata ni butiia

taian maunga ma taian tabuki

b'a a na rabuniia ma ni kaawakiniia.

E Berita Te UEA

B'a E Na Katuaaea Iteraera

9Iteraera, kam tuai man

katoka karaoan te bure

man te tai arei i Kibea.

Ao anne bukina

ngkai ko na buakanaki i Kibea.

10A taboroboro am bure,

ao ko kakamangao.

Ngkai I a tia n iangoia

ni kanakoia botannaomata b'a a na buakaniko

ma ni kabaeko n taian tiein.

11Ngkai Ko a tia n ongotaeka ngkoa

kaanga te kao te ataei

are e kukurei ni manga kaaki kunin te uita.

Ma N na kaaki te b'ai n toka

i aon roroam ae e korakora;

ao ko na kaai ni kamaraua te tano ngkoe ma Iuta

ma n unika te tano.

12Kamaraua am tawaana nako.

kamaae atin te motikitaeka ae eti,

ao taia te kakaonimaki.

Taromauriai, Ngai ae te UEA,

ao N na kanakoa m'aakau ni kakamaiu

ni kab'aka kaanga te karau.

13Ko a tia n unika te buakaka,

ko taia te motibuaka, ao ko kana

uaan am kewe.

Ko onimakina oin korakoram

ma korakoran am taanga ni buaka nako.

14Ma ngaia are, e na roko te buaka,

ao a na uruakaki

ami nono nako.

Ao ami kairiribai a na karaoa nakoim

te b'ai are e karaoia Tiareman nakoia kaain

Beta-Arebera

a na oreaki ma te b'aa

tiina ma natiia

ni karokoa mateia.

15Betaera, bon aei tokim

i bukina b'a ko buakaka.

Iteraera, e na tiringaki am uea

n te kaarangaina.