1Ao e anaa te tiaeki ni b'a n oriwa ae uarereke Tamuera ao e kab'aroa i aon atuun Tauro. Ao i mwiina, e kiitina Tauro ao e taku nako ina:
E a tia n rineiko te UEA b'a te tia kairiiri ao te tia tautaeka i aoia Ana aomata.
2Ngkana kam kiitanai n te bong aei, ao ane kam na kaaitibo ma m'aane aika uoman i rarikin ruanimaten Rakera i Tereta i abaia kaain te baronga are Beniamin. Ane a na kaangai nako imi, “E a tia n reke te aati are kam kakaaea. E a m'aninga taekana tamam, ma e a manga raraomaeakiningkami! E a manga tabe n iangoa aron rekemi.”
3Kam na waakinako mai ikanne ni karokoa kam roko n te kai ae te oke are korakora are i Tabora, ike kam na manga kaaitibo iai ma teniman m'aane aika a na nako n taromauria te Atua i Betaera. Temanna mai buakoia e na kairiia teniman taiani kooti, ao temanna e na uoti tenua taiani kariki aika mronron, ao te kabanea e na uota te tiaeki ae karaoaki man te bokaboka ae kakanoa n te wain.
4Ao ngkana a tia ni kamauringkami, ao ane a na anganingkami taiani kariki ake uoua.
5Ao i mwiina, kam na manga nako Kibea, ike a kaemb'a iai aia taanga ni buaka kaain Biritia. Ao ngkana kam tabe ni m'ananga nakon te kaawa, ao ane kam na kaaitibo ma koraki n burabeti aika ruorikaaki man te tabo n taromauri. Ane a na nakonako man taetae ni burabeti ao tabeman ane a na nakonako i moaia ma ni katangtang n taian aabi aika uarereke, ma taian turam aika uarereke, ao taian kaib'ab'aa.
6Ao ane na niningkami Tamnein te UEA. Ao kam na riki b'a aomata ngkami aika kam kaokoro, ao ane kam na taetae ni burabeti ma ngaiia.
7Ao ngkana a tia n riki baikai, ao kam na karaoi b'aai nako akana kam taku b'a a eti! E na buokingkami te Atua.
8Ao i mwiina, kam na nako Kirekara. N na rimwi n roko ikanne, ma ngaia are, kam na taningaai. Tao e na bon reke te wiiki m'anangau n nakoati, ma ngkana I roko, ao n na anga karea ma taian angab'ai nakon te UEA. Ao n na manga tuangingkami te b'ai are kam na manga karaoi i mwiina.
Okin Tauro Nakoni Mwengana9Ao ngke e rairaki nako Tauro b'a e nang kiitana Tamuera, ao te Atua E angan Tauro te nano ae kaokoro. Ao a bane n riki b'aai n te bong naba arei n aron are a tia n taekinna Tamuera.
10Ao ngke e roko Tauro i Kibea, ao e kaaitibo ma koraki ni burabeti. Ao e rina n niniaki n Tamnein te Atua, ao e a moana ana taetae ni burabeti i nuukan te koraki arei.
11Ao aomata ake a boni ngae n nonora Tauro a nooria ngke e a taetae ni burabeti ma ni karaoi aroia burabeti. Ao a taetae bon i marenaia ni kaangai, “Tera ae riki? E na kanga n riki Tauro b'a te burabeti?”
12Ao e taku temanna mai buakoia, “B'a e aera ngkai e na aki kona? E bon riai riki n riki ni burabeti nakoia tabem'aang!” Ao bon anne bukina are a kaangai iai aomata ni kabane, “E na kanga n riki ni burabeti Tauro?”
13Ao ngke e tia n taetae ni burabeti Tauro, ao e nakon te tabo n taromauri.
14Ao rimwi riki, ao e titiraki tarin taman Tauro ni kaangai, “Ko mena ia?”
Ao e kaeka Tauro, “I kakaaei taian aati. Aki roko n te reke i roura, ngaia are, ti a manga nako ni maroroo ma Tamuera!”
15Ao e taku tarin taman Tauro, “Ao tera ae taekinna nako imi?”
16Ao e taku Tauro, “E tuangiira b'a a tia n reke taian aati.” Ma e aki taekinna Tauro ae e a tia Tamuera n rineia b'a te uea.
Kaotakin Tauro Iroun Te UEA B'a Te Uea17Ao e kanakoa te rongorongo Tamuera nakoia Iteraera b'a ana bootaki i Mitib'a b'a a na kaaitibo ma te UEA.
18Ao ngke a bane n roko aomata, ao e taku Tamuera:
Ao E tuangai te UEA ae Atuaia Iteraera b'a n na kauringngkami are E a tia ni kamaiungkami mai Aikubita, ao mairouia naba botannaomata ake tabeua ake a karawawataingkami.
19E a tia te Atua ni kamaiungkami man taiani kangaanga ma taiani kabuanib'ai. Ma kam a tia ni kamoamoaingkami nakon Atuami ma n bubuti karekean ami uea. Ma ngaia ae ngkai, kam na bane ni kaaningkami baronga ma kaainga n tatabeua nako nakon te tabo n taromauri b'a E aonga n rinea te uea te UEA.
20Ao e kawaerakeia baronga n tatabeua nako Tamuera nakon te baonikarea, te barongana i mwiin te barongana, ao te UEA E rinea te baronga are Beniamin.
21Ao i mwiina, e kawaerakeia kaaingan te baronga are Beniamin Tamuera, ao te UEA E rinea te kaainga are Materi. Ao n te kabanea, e a rineaki Tauro are natin Kiti te m'aane. Ma ngke a kakaaea, ao e aki roko n te reke.
22Ao a tataro aomata ni kaangai, “Ara UEA, e mena ikai Tauro ke e aki?”
Ao E taku te UEA, “Eng, ane e karaba i buakon b'aai.”
23Ao a birinako aomata n anaa Tauro ao a kairiia rikaaki nako nukan te botaki. Bon te aomata ae ab'ab'aki riki nakoia aomata ni kabane.
24Ao e taku Tamuera nakoia aomata, “Karaua n tara te aomata ae a tia n rineia te UEA! Bon akea te aomata ae ai arona!”
Ao a takaarua aomata, “E na anaanau maiun te uea!”
25Ao e kab'arab'arai ana m'akuri te uea ma tib'angana ao e koroi i aon te boki. Ao e katuka te boki n ruun te tembora n te tabo are tataromauriaki iai te UEA. Ao i mwiina, e a kaokiia aomata Tamuera nakon mwengaia.
26Ao e a tia Tamuera ni kaungai nanoia rorobuaka tabeman b'a a na iriira Tauro n taai nako, ao ngke e okira mwengana i Kibea ao a iria rorobuaka akekei.
27Ma a taku tabeman aomata aika nanobaba aika akea maneia, “E na kanga Tauro ni kamaiura mairouia ara kairiribai?” A aki tangiria b'a e na uea Tauro i aoia, ao a aki uoti naba taiani b'aintangira nako ina. Ma e taotaona nanona Tauro.
Who We AreWhat We EelieveWhat We Do
2025 by iamachristian.org,Inc All rights reserved.
