Itaia 52 - Kiribati New Version Bible

E Konaa Ni Karaoa Ana Baka Ni Kukurei Ierutarem

1Ierutarem, Uti!

Teirake ao korakora.

Tion te kaawa ae e Tabu

karina kunnikaim ae moan te tamaroa.

A na aki manga urua

am kaawa ae e tabu

taian ianena.

2Tion, teirake man te baareka!

Kainaomatako man te roobu

ane i roroam.

Tokin Te Maraki

3E taku te UEA:

au Aomata, kam kabooaki nako ngkoa,

tiaki i bukin te m'ane,

ao ngkai kam na nang kainaomataaki,

tiaki naba i bukin te kabooaki.

4Kam nako Aikubita n taai ake ngkoa

ike kam maeka iai.

b'a iruwa ngkami.

Ao i mwiina, e iowawa Aturia nako imi,

5ao ngkai ai manga te botannaomata teuana

e a manga uotiko nako b'a te taenikai

ao bon akea naba bukina teuana.

A ngirangira am taani kairiiri ni maraki,

ao e karereantiaki arau

n te bong teuana ma teuana.

6au Aomata, kam na ataia

b'a antai Ngai ao antai ae E taetae

i bukina ngkai I mena ikai.

Rongorongon Te Kaantaninga I bukin Ierutarem

7Ai kakatekera taraan

te tia uarongorongo ri aoni maunga

ae e touakina ae e kaangai nako Ierutarem,

“Te rongorongo ae e raoiroi! Kam a kamaiuaki.

E nang roko te rau.

E a UEA ngkai Atuami.”

8Baane anene ao kukurei

ngkami aika kam tei n taratara!

Nooria, kam a konaa n noora te UEA

n okira Tion.

9Ierutarem, teirake mai buakon uruakim!

ira buakon te anene.

E a tia te UEA n anga te rau

nakoia ana Aomata;

E roko b'a e na kamaiu.

10E a tia te UEA ni kaota korakorani m'aakana

nakoia botannaomata ni kabane;

a bane aomata n noora

m'aakan Atuara ni kakamaiu.

Te Taeka I bukin Kitanan B'aburon

11Kam na kiitana te kaawa ae e buubura ae B'aburon!

Kam na tai riinga te b'ai teuana ae e buakaka.

Teboki baimi. Tauraoi

ni uoti rikaaki b'aai aika a tabu

ake bon ana B'ai te UEA.

12Kam na aki biri.

Akea ae e kaeingkami.

E na kairingkami ao ni kaawakiningkami

man aia buaka ami kairiribai

te UEA ae Atuaia Iteraera.

13E taku te UEA:

E na tootokanikai au tia m'akuri!

E na anganaki taian nebonebo aika a kakannato

ao taian karinerine aika rangi n rietaata.

14A m'aiti aika a maaku

n te b'ai are e riki nakoina.

Ma a bane ni maaku

ake a nooria

i bukina ngke e maraki

ni karokoa kaanga ai tiaki taraan te aomata,

15E na karikiia botannaomata au tia m'akuri

b'a a na boongana i bukin taromauriakiu;

a na aki kakarongoa uea

ngkana a boobaraaki ni mimi.

Ane a na noori ao a na

iangoi b'aai

aika a tuai ma n noori

ke n tuai n iangoi mai m'aaina.