Etekiera 31 - Kiribati New Version Bible

E Na Koreaki Uean Aikubita Kaanga Te Kai Te Tiira

1Tebwi ma teuana te ririki i mwiin anaakin te Uea are Ieoiakin ma nikiraia aomata b'a taenikai nako B'aburon, ao E taetae te UEA nako iu ni moanibongin te katenua n nam'akaina. Ao E taku:

2Etekiera ae natin te aomata, ko na tuanga uean Aikubita ma aomata te b'ai ae I taekinna ni kaangai:

Ko korakora riki nakoia

aomata ni kabane n te aonnaba.

Ko na kakauongo ngkai nakon te b'ai aei.

3Iai ngkoa te kai ae te tiira

i Reb'anon

iai m'aangana, aika a rangi ni korakora

aika a roota karawa.

4E rawata te ran n te aroka aei

are e buokia ni karikirakea rietaatana,

taian raanga n ran ake i rarikina a teboki

taian aroka ake tabekai

i nanon te buakonikai.

5Ma e bura riki taberan te aroka aei i aon

taian aroka ake tabeua,

ao a rikirake n ab'ab'aki

m'aangana nako.

6A karaoi ngaoia mannikiba i aoni m'aangana nako,

ao a bungiaki maan nako

i aana.

A maeka aomata mani botannaomata

nako i aan nuun

te kai ae korakora aei.

7Bon iai m'aangana aika a tamaroa

aika a ab'ab'aki,

ao e rokoroko wakaana n te ran

i nano i nanon te tano.

8Bon akea te tiira tekaina

i nanon au nen aroka i Eten

ae ai aron

te kai aei;

ao akea naba te kai

ae e roota ab'ab'akin m'aangana.

9Boni Ngai ae te UEA ae I angan te kai aei

tamaroana,

ao I buoki m'aangana

b'a a na ab'ab'aki.

A bane aroka nako i Eten

n tangiria b'a na riki ni katotoongnga.

10Uean Aikubita, kakauongo ngkai nakon te b'ai ae I taekinna Ngai ae te UEA ae te Atua, i bukin te aroka anne:

E rikirake n rietaata te kai anne n roota karawa ao e rikirake ni kamoamoa ma ni kainikatonga.

11Ma ngaia are, N nang katinanikua te kai anne ma n anga ngaia nakon te tia tautaeka ae ianena, are e na katuaaea i bukin ana m'akuri aika a buakaka.

12E na koreaki ni kab'akaaki irouia ianena aika a iowawa ma ni katikua n te tabo ike e b'aka iai. A na maaenako m'aangana ma m'aangana ake a uarereke i aon taiani maunga ao i nanon taian m'arua. A na nako aomata ake a maeka i aan nuuna nakon taabo n aki akaaka.

13A na manga karaoa ngaoia mannikiba i aoni botona are e tiku i nanon te tano, ao a na toubekaa m'aangana maan aika a aki manana.

14Bon akea riki te aroka tekaina ae na manga rikirake n rietaata n aron te aroka aei, e ngae ngke e korakora te ran n reke i rouna. A na bane ni mate aroka nako, n aroia naba aomata ngkai a mamate ma n ruorikaaki nakon aia aonnaba maate.

15N te bong are e mate iai te aroka aei ma n ruorikaaki nakon te aonnaba are i nano, N na tuanga te karaanga ma te raanga n ran b'a a na tanginiwenei i bukin matena. A na bane n toki raangaia taiani koburake n ran ma taiani karaanga ake i aan te aba. E na rabunaki te Maunga are Reb'anon n te rootongitong b'a kanikinaean te nanokawaki, ao a na bane n rai aroka nako n te buakonikai.

16E na b'aka ni maerikiriki te aroka aei i aon te tano, ao N na kanakoa nakon te aonnaba are i nano. Ao ane e na toubekaaki irouia botannaomata nako n te aonnaba.

17A na bane naba aomata nako ake a kataniia i aan nuuna ni bane nako nakon te aonnaba are i nano, ike a na ikotaki iai ma maate.

18Uean Aikubita, a na bane n riki baikai nakoim ma am aomata! Ti te bo ngkoe ma te aroka aei n te tai teuana—ko rietaata ma ni korakora riki nakoia aomata nako n te aonnaba. Ma ko na koreaki, n ai aron taian aroka ake n te nne n aroka are Eten ake a bon riai ni mate. Ko kanakoaki nakon aia aonnaba maate, ike ko na ikotaki iai.