1Bon te mataniwi n te taanga ni buaka mai Turia te aomata ae Naaman. E a tia ni buokaki ma ana taanga ni buaka iroun te Atua ni katokanikaiaki i aoia aia kairiribai. Ma ngaia are, e rangi n onimakinaki Naaman iroun te uea. Bon te tia buaka ae e ninikoria Naaman, ma e reke i rouna te aoraki ae te reebera.
2N te tai teuana ngke a tabe tautian Turia ni buakaniia Iteraera, ao e uotaanako te ataei n aine temanna b'a aia taenikai, ao e riki b'a ana tia m'akuri buun Naaman.
3Tabeua te tai i mwiina, ao e taku te ataei n aine arei, “Ngkana e nako buum are Naaman nakon te burabeti i Taamaria, ao e na boni kamaiuaki man aorakina te reebera.”
4Ao ngke e taetae Naaman nakon te uea ni kaota te b'ai are e taekinna te ataeinaine arei,
5ao e taku te uea, “Naako kawaria. N na anganiko te reta ae ko na uotia n angan uean Iteraera.”
Ao e m'ananga Naaman, ao e uoti 340 te kirokuraem te tirewa, 68 te kirokuraem te koora, ao 10 taiani kunnikai aika a boou.
6E uota naba te reta nakon uean Iteraera. E taku taekan te reta, “I kanakoa au tia m'akuri ae Naaman nakoim. Taiaoka ko konaa ni kamaiua man reeberana?”
7Ngke e wareka te reta arei uean Iteraera ao e raeuai kunnikaina i bukin maakuna, ao e takaarua ni kaangai, “E boni kakoauaa ngkai uean Turia b'a I konaa ni katoka aorakin te aomata ae e reebera aei. N ana iango ngai te Atua ae iai m'aakau i aon te maiu ao te mate? E kataia ngkai ni kakaaea angan reken te buaka ma ngai.”
8Ao ni bon te tai naba are e ongo iai Eritai are te burabeti te b'ai are e riki, ao e kanakoa te rongorongo nakon uean Iteraera ae e kaangai, E aera ngkai ko rangi ni maaku? Kanakomaia te m'aane anne b'a e aonga n ataia ae iai te burabeti i aon Iteraera.”
9Ao e m'ananga nako Naaman ma ana aoti, ao ana kaanibuaka, ao e tei i mataroan ana auti Eritai.
10E kaotinakoa temanna Eritai b'a e na taetae nako ina ni kaangai, “Naako tebokiko itiua te tai n te Karaanga are Ioretan, ao e na toki iai reeberam.”
11Ma e rangi n un Naaman ao e tannako ma te ngurengure ao e taku, “E aera ngkai e aki otinako n taetae ma ngai? I taku ngai b'a e na otinako n tei i matau ao e na tataro nakon te UEA ae Atuana, ma ni katiotioa baina i aon kuniu are e aoraki ni katoka aorakiu.
12Bon ti te bo ngke I a bon tebotebo naba ni karaangan Tamateko ake Abana ao Baba, b'a a bon itiaki naba n aron ranin karaangan nako Iteraera, ao e na toki aorakiu.”
13Ao e kawaria ana tia m'akuri ao e taku nako ina, “Teuae ko karineaki! Ngkana e tuangko te burabeti b'a ko na karaoa te b'ai ae e kangaanga arona, ao ko na boni karaoia naba. Ao bukin tera ngkai ko na aki karaoa te b'ai ae e tuangko? Naako tebotebo ao e na toki aorakim.”
14Ao e ruorikaaki Naaman nako nanon Ioretan; e nakonako i nanon te ran, ao i mwiina e teboo itiua te tai n aron are e tuangnga Eritai. Ao e toki aorakina ni bon te tai naba arei, ao e tamaroa kunna n aron kunin te ataei.
15Ao e okirikaaki Naaman ma ana mataniwi nakon Eritai. E tei Naaman i matan Eritai, ao e katanoata ni kaangai, “I a bon ataia ngkai b'a bon ti te Atua n te aonnaba aei Atuaia Iteraera. Teuae ko karineaki! taiaoka butim'aea au b'aintangira aei.”
16Ao e taku Eritai nakon ana tia m'akuri, “I tuea b'a N na bon aki anaa te b'aintangira teuana mairoum.”
E teimatoa Naaman ni bubuti ma e bon rawa Eritai.
17Ao n tokina e a taku Naaman, “Ngkana ko aki butim'aai b'aintangira, ao I butiiko b'a ko na kariaiakai b'a N na kaona tewaana te kaa ae e konaa ni katikitikaki irouia uoman aati n te tano. Teuae ko karineaki! man te tai aei ao N nang angaanga karea nakon te UEA.”
18I tataro b'a e na kab'arai au bure te UEA ngkana I nako n rin n ana tembora te anti are Rimmon ma ni bobaraaki nako ina ikekei ma uean Turia.
19Ao e taku Eritai, “Okira am auti, ao tai raraoma n anne.” Ao e a nako Naaman.
Kamaraiaan Keati Iroun EritaiAo ngke e a tib'a nako Naaman,
20ao e taku i bon i rouna Keati, “E a tia au toka ni kanakoa Naaman ao n aki anaa te b'ai teuana mai rouna! E na riai ni butim'aea ana b'aintangira te I-Turia arei ma e aki. I tuea n aran te UEA b'a N na nakon Naaman, ao N na anai b'aai tabeua mai rouna.
21Ao e kawaekoaa n ri mwiin Naaman.
Ao ngke e a noora Keati Naaman ni biri ri mwiina, ao e otinako man ana kaanibuaka ni kawaria. Ao e taku Naaman, “Iai te b'ai ae e riki?”
22Ao e taku Keati, “Eng, b'a e kanakoai au toka b'a N na tuangko i bukiia uoman burabeti aika ataei aika roko man Maungan Eberaim. A roko ni buubuti buokaia, ao e butiiko Eritai ngkana tao ko konaa n anganiia 34 te kirokuraem te tirewa ao kunnikai aika a boou?”
23Ao e taku Naaman, “E raoiroi, ma e aera ngkai ko aki kauoua te tai m'aitin ane te tirewa?” Ao e imanonoa Keati b'a e na uoti ni kabane, ma ni kaona uaai te baeki n te tirewa. E anga taiani baeki ao kunnikai nakoia ana taani m'akuri ake uoman b'a a uoti i bukin Keati.
24Ngke e roko n te tabuki are e maeka iai, ao e anai taiani baeki mairouia taani m'akuri akekei, ao e karin i nanon ana auti, ao e kaokiia m'aane akekei.
25Ao e nako n rin Keati ao e tei i matan Eritai, ao e titirakinna Eritai ni kaangai, “Keati ko nakea?”
Ao e taku Keati, “I aki nakonako.”
26Ao e taku Eritai, “Ko aki ataia b'a e mena tamneiu n te tabo are e ruo iai Naaman man ana kaanibuaka ni butim'aiko? Keati, bon akea kariaiakam b'a ko na butim'aea te m'ane, ke te kunnikai, ma nne n aroka aika oriwa ao nnen arokan te kureebe, ma taian atiibu ke taiani kao, ke taani m'akuri.
27I bukin te b'ai ae ko a tia ni karaoia, ao e na manga ewekiko ngkai reeberan Naaman, ao a na ewekaki naba kanoam n aki toki.”
Ao n te tai naba arei, ao e mainaina kunna n te reebera, ao e taonnako.
Who We AreWhat We EelieveWhat We Do
2025 by iamachristian.org,Inc All rights reserved.
