1E a manga uea i aon Iteraera Otea are natin Era te m'aane n ana ka 12 n ririki ni uea Aati i aon Iuta. Ao e tautaeka i nanon ruaiwa te ririki mai Taamaria.
2E aki ongotaeka Otea iroun te UEA ao e karaoa te bure, ma tiaki n ai aron te bure are a tia ni karaoia uean Iteraera ake mai m'aaina.
3E buakana Iteraera uean Aturia are Tiaremanetera; e taua taekan te aba, ao e tuanga Otea b'a e na kab'ab'akai taian roonrab'ata.
4Ma i mwiina riki, e a manga rawa Otea ni kakab'akai taian roonrab'ata, ao e bubutiia uean Aikubita are To b'a e na buokiia ni kaaitaraa Tiaremanetera are uean Aturia. Ao ngke e ataa te waaki arei Tiaremanetera, ao e anaa Otea ni kaburea.
Buakanakin Taamaria ao Anaakiia Kaain Iteraera nako Aturia5E teirake n eekaanako Iteraera Tiaremanetera, ao e buakana Taamaria i nanon tenua te ririki,
6i m'aain are e a reke i rouna n ana karuaiwa n ririki ni uea Otea. E uotiia nako Iteraera uean Aturia b'a buure. E kairoroia tabeman mai buakoia b'a a na maeka n te kaawa are Ara, ao tabeman b'a a na maeka i rarikin Karaangan Abora n te aba are Kotan, ao ake tabeman b'a a na maeka ni kaawa ake a maeka naba iai kaain Miria.
7A riki baikai ni kabane i bukina ngke a tia ni bure Iteraera nakon te UEA are Atuaia, are E kamaiuia mai Aikubita, ike a tautoronaki iai ngkoa. A taromauriia antiia ianena,
8ma ni katotoonga kateia botannaomata ake E kanakoia ngkoa te UEA mai Iteraera, ao kaanga ai aron aia bure uean Iteraera.
9E rangi ni korakora riki aia bure Iteraera ngke a manga kataia ni karabaa aia bure nakon te UEA ae Atuaia. E katei aia baangota ni kabutaa aon Iteraera, ni moa mani kaawa aika a uarereke ni karokoa kaawa aika a buubura, ma kaawa aika a buubura naba ake a nonoaki.
10A karaoi naba bouanantin antiia ianena, ma baangota i bukin taromaurian Nei Aatera i aon taian tabuki nako, ao i aan nuun aroka nako aika a buubura.
11A anga taiani karea n taiani baangota n aron are a kakaraoia ngkoa botannaomata ake ianena i m'aain kakionakoaia mai Iteraera iroun te UEA. A karaoi buure aika a rangi ni buakaka n te aro are E a rangi n un iai te UEA.
12E ngae ngke E a tia n tuangiia Iteraera te UEA b'a a na aki taromaurii taiani bouananti, ao a boni karaoia naba.
13Ma ngaia are, E tuangiia burabeti te UEA b'a a na bon riai ni kauringiia Iteraera ao Iuta n taeka aikai, Boni Ngai ae te UEA, ao I tuangkami b'a kam na katoka karaoan taiani bure, ma ni manga moana te ongotaeka nakon Au tua ma au reirei. I anganiia ngkoa ami bakatibu, ao I a manga tuangiia Au taani m'akuri ake burabeti b'a a na manga kaoki n taekini nakoimi.
14Ma a aki kan ongo Iteraera, a taningabono n ai aroia aia bakatibu are a rawa n taromauriia te UEA ae Atuaia.
15A katinanikua ana taeka ni kauring te UEA ma ana babaaire, ao a kaaki taekan te boraraoi are e a tia ni karaoia ma aia bakatibu. A taromauri bouananti ake akea maneia, ao a boni kakeai manenaia. E a tia n tuangiia b'a a na aki katotoongia botannaomata ianena ake i rarikiia ni b'aai aika a karaoi, ma a aki ongo Iteraera b'a a boni katotoongia naba.
16A aki ongotaeka Iteraera nakon ana Babaaire te UEA ae Atuaia ni kabane. A karaoi uoua bouananti aika koora, aika katotoongan te kaoteteei, ao a katei baangotan Nei Aatera, a taromauri naba taiani itoi, ao te anti are B'aara.
17A kabonganaa te tabunea, ao m'akuri ni ibonga i bukiia anti, ao a anga oin natiia b'a taiani karea. A kakaraoi b'aai ake E ribaai te UEA Iteraera.
18E a rangi ni maraki nanon te UEA irouia Iteraera, ma ngaia are, E a kariaia b'a a na uotaki nako b'a taenikai.
Bon ti aomata ake a maeka i Iuta aika a tiku,
19ma a bon aki ongotaeka nakon ana babaaire te UEA, ao a karaoi naba aia m'akuri Iteraera.
20Ma ngaia are, E a tannako te UEA mairouia Iteraera ma Iuta ni kabaneia, ao e karikiia b'a a na katuaaeaki ma ni kookonaaki ni karokoa bon akea temanna nikiraia.
21I mwiina, ngke E a tia ni kaokoroa Iteraera ma Iuta, ao Iteraera a rinea te m'aane are Ieroboam are natin Nebata b'a aia uea i aon Iteraera Meang. E kareketatiia Iteraera Ieroboam ni karaoan te bure korakora i matan te UEA.
22A teimatoa aomata ni kakaraoa te bure n aron Ieroboam,
23ni karokoa te tai are E katuaaia iai te UEA, n aron are E a tia ni kauring iai rinanoia ana toro ake burabeti.
Ao bon anne bukina are a uotaki nako iai Iteraera b'a taenikai i Aturia, ao ikanne ike a tiku iai.
Manga Rokoia Ianena ni Maeka i Iteraera24E anaiia aomata ake a maeka ni kaawa aika a buubura ake B'aburon, Kuta, Awa, Amata, Tebarawaim uean Aturia, ao e kairoroia b'a a na m'ae nako Iteraera. A taui kaawa ake a maeka iai Iteraera, n reitaki ma kaawan te tautaeka ae e buubura are Taamaria.
25N te moan tai ao a aki taromauriia te UEA aomata aikai, ma ngaia are, E kanakoia raian te UEA b'a a na tenaia, ao a mate tabeman irouia raian.
26E taku te tia uarongorongo nakon uean Aturia, A aki ataa aron taromaurian Atuan te aba arei aomata ake ko kam'aeia nako Iteraera. Ma ngaia are, E kanakoi taian raian b'a a na tenaaki irouia, ao a tiringaki tabeman mai buakoia.
27Ao e taku te uea, Anaa temanna te ibonga maibuakoia ibongan Iteraera ake ti uotiia mai, ao kaokia nako Iteraera. E na maeka ikekei ao e na reireiniia aron Atuan te aba arei.
28Ao e rineaki temanna ibongan Iteraera b'a e na oki nako Iteraera.
29Ma a katei baangotan oin antiia koraki aika a kakaokoro n tatabeua nako ni kabutaa aon Iteraera, ao i mwiina, a manga katei bouananti aikanne ni nnen aia baangota Iteraera.
30A karaoa te anti are Tukota Benota kaain B'aburon, ao ake mai Kuta, a karaoa te anti are Nerekara, ao ake mai Amata, a karaoa te anti are Atima,
31ao ake mai Awa, a karaoa te anti are Nibeati ma Taretaka, ao kaain Tebarawaim, a kareani natiia nakon oin antiia ake Aterammereka, ao Anammereka.
32-33A taromauri oin antiia n aron are a karaoia naba ngkoa i m'aain uotakiia nako Iteraera. A taromauriia naba te UEA, ma a bon rinei oin aia aomata n taiani baangota.
34A bane aomata ni irii aia katei nikawai. Bon akea temanna ae e taromauria te UEA n ti Ngaia, ao rawa ni iri nanon taian tua ao babaaire ake E a tia n anga nakoia ana kariki Iakob'a, are E aranna b'a Iteraera.
35N te tai arei ngke E a tia te UEA ni karaoa ana Boraraoi ae e matoa ma ana Aomata ake Iteraera, ao E taku nakoia:
Kam na aki taromauriia anti tabem'aang. Kam na aki bobaraaki nakoia ke n angakarea nakoia.
36Taromauriai n ti Ngai. Boni Ngai are I kamaiungkami mai Aikubita ni korakorani m'aakau. Bobaraaki nako iu ao angakarea nako iu.
37Tai manga taromauri anti tabem'aang. Iri nanon Au tua ma au reirei,
38ao ururinga te boraraoi ae e matoa i marenara.
N na taekina riki are e kaangai, Tai taromauriia riki anti tabem'aang
39i rarikiu. Bon te UEA ae Atuami Ngai, ao N na kamaiungkami mairouia ami kairiribai ni kabane.
40Ma a aki tabeakina ana babaaire te UEA aomata ake a maeka i Iteraera, ao a bon teimatoa n irii oin kateia.
41A taromauria te UEA, ma a bon taromauri naba oin aia bouananti. Bon ti te bo naba ma are a karaoia aia kariki.
Who We AreWhat We EelieveWhat We Do
2025 by iamachristian.org,Inc All rights reserved.
