2.Uea 15 - Kiribati New Version Bible

Uean Iuta are Ataria(2 Rongo 26.1-23)

1E uea Ataria are natin Amatia te m'aane i aon Iuta n ana ka 27 n ririki ni uea Ieroboam i aon Iteraera

2ai tib'a 16 ana ririki ni maiu ngke e riki b'a te uea, ao e tautaeka i nanon 52 te ririki man te kaawa are Ierutarem, are bon ana kaawa naba tinana are Nei Iekoria.

3E ongotaeka Ataria iroun te UEA b'a e kaakaraoa ae e raoiroi n ai aron are e karaoia naba tamana are Amatia.

4Ma e aki roko n te urui taiani baangota. A bon tiku naba b'a taabo n angakarea.

5E katuaaea Ataria te UEA n te reebera, ni kabanea bongini maiuna. E aki kariaiakaki b'a e na maeka n ana bareti te uea, ma ngaia are, e maeka natina n te bareti man tautaeka n onea mwiina.

6A tauaki rongorongon b'aai ni kabane ake e karaoi Ataria i nanon ana tai ni uea n te boki are Rongorongoia Uean Iuta.

7E mate Ataria, ao e taunaki i rarikiia ana bakatibu i Ierutarem. E a manga uea natina te m'aane are Iotam.

Uean Iteraera are Tekaria

8E a manga uea i aon Iteraera Tekaria are natin Ieroboam te m'aane n ana ka 38 n ririki ni uea Ataria i aon Iuta, ma e ti tautaeka i nanon 6 te nam'akaina mai Taamaria.

9Bon ti te bo naba aron Tekaria ma ana bakatibu n aki ongotaeka iroun te UEA. E katotoonga Ieroboam are natin Nebata te m'aane ni karaoi m'akuri aika a kam'araa, ma ni kareketatiia Iteraera n te bure.

10E karaoa ana m'akuri Tiarum are natin Iabeta te m'aane ni kaaitaraa Tekaria ni karokoa e bon tiringnga i mataia aomata. Ao i mwiina, e a manga uea Tiarum.

11E boni kaawakina ana berita te UEA nakon Ieu, ma ngaia are, a na rineaki uean Iteraera rimwi aika aman man ana utu.

12A bane n tauaki rongorongon b'aai ni kabane ake e karaoi Tekaria i nanon te boki are Rongorongoia Uean Iteraera.

Uean Iteraera are Tiarum

13E uea Tiarum i aon Iteraera n ana ka 39 n ririki Ataria ni uea i aon Iuta. Ma ti teuana te nam'akaina i mwiin rikin Tiarum ni uea.

14E roko Menaem are natin Kari te m'aane mai Tireta nako Taamaria ao e tiringnga. Ao e a manga uea Menaem.

15E rawa n taenikai te kaawa ni bane ake i rarikina ni karokoa Tireta. E tiringiia ni kabane ake a maeka i Tibeta, ao e korouaia aine aika a bikoukou n ana kabaang.

16A bane n tauaki rongorongoni b'aai ni kabane ake e karaoi Tiarum n ana tai ni uea i nanon te boki are Rongorongoia Uean Iteraera.

Uean Iteraera are Menaem

17E uea Menaem i aon Iteraera n ana ka 39 n ririki ni uea Ataria are uean Iuta, ao e tautaekana Iteraera i nanon tebwiina te ririki mai Taamaria.

18E teimatoa arona n aki ongotaeka iroun te UEA b'a e katotoonga Ieroboam are natin Nebata te m'aane, are e kareketatiia ngkoa Iteraera n te bure.

19Inanon ana tai ni uea Menaem, ao e buakana Iteraera uean Aturia are Tikerata Biretia. E kariaia buokakin Menaem ni kabutaa abanueana, ngkana e na kab'aka Menaem nako ina e raka i aon 30 te tan te tirewa.

20Ma ngaia are, e anga ana taeka Menaem nakoia aomata ni kabane i aon Iteraera aika a kaub'ai b'a a na anga kaka teuana te rawaawata ni waerake te kirokuraem te tirewa, ao e anga nakon Tikeraka Biretia ni kabane. Ao e katoka buakanakin Iteraera Tikeraka Biretia ao e kiitanna.

21A bane n tauaki rongorongon b'aai ni kabane ake e karaoi Menaem i nanon ana tai ni uea i nanon te boki are Rongorongoia Uean Iteraera.

22E mate Menaem, ao e a manga uea natina te m'aane are Bikaia.

Uean Iteraera are Bikaia

23E riki b'a te uea Bikaia i aon Iteraera n ana ka 50 n ririki ni uea Ataria i aon Iuta, ao e tautaeka i nanon uoua te ririki mai Taamaria.

24E aki ongotaeka iroun te UEA ao e kareketatiia Iteraera n te bure, n aron are e a tia ni karaoia ngkoa Ieroboam are natin Nebata te m'aane.

25Mataniwiia ana aobitia Bikaia bon Bika are natin Remaria te m'aane, ma bon ngaia naba are e karaoa babaairean tiringakin te uea. Ma ngaia are, e m'ananga ma nimangaun m'aane mai Kireata nakon m'akoron Taamaria teuana ae e rangi ni matoatoa ao a tiringa Bikaia, n ikotaki ma Arekoba, ao Arie. E a manga riki Bikaia b'a te uea.

26A tauaki mwiin b'aai ni kabane ake e karaoi Bikaia i nanon ana tai ni uea i nanon te boki are Rongorongoia Uean Iteraera.

Uean Iteraera are Bika

27E a manga uea Bika are natin Remaria te m'aane i aon Iteraera n ana 52 n ririki ni uea Ataria are uean Iuta, ao e tautaeka i nanon 20 te ririki mai Taamaria.

28E aki ongotaeka iroun te UEA, ao e a manga katotoonga ana m'akuri ae e buakaka Ieroboam are natin Nebata te m'aane, are e kareketatiia Iteraera n te bure.

29E m'ananga uean Aturia are Tikeraka Biretia ni buakana Iteraera i nanon ana tai n tautaeka Bika. E taui aaba ake i Kireata ao Kariraia, n ikotaki ma te kaawa are Iion are Abera Betamaaka, Ianoa, Kateti, ao Atora, ao ai uana naba ma te aba are Nabetari. I mwiina, e anaiia Iteraera man taabo aikai ao e uotiia nako Aturia b'a taenikai.

30Inanon ana ka 20 n ririki n tautaeka Ioram i aon Iuta, ao e kam'anea Bika teuare Otea are natin Era te m'aane, ao e tiringnga. Ao e a manga uea Otea i aon Iteraera.

31A tauaki rongorongon b'aai ni kabane ake e karaoi Bika i nanon ana tai ni uea i nanon te boki are Rongorongoia Uean Iteraera.

Iotam are Uean Iuta

32E a manga riki Iotam are natin Ataria te m'aane b'a uean Iuta n ana ka uoua n ririki ni uea Bika i aon Iteraera.

33Ai 25 ana ririki ni maiu Iotam ngke e riki b'a te uea, ao e tautaeka i nanon 16 te ririki mai Ierutarem. Tinana bon Nei Ieruta are natin Tatoka.

34E katotoonga tamana te uea are Iotam b'a e ongotaeka iroun te UEA ni kakaraoa ae e raoiroi.

35Bon Iotam are e a manga katea te mataroa are Ieta are te kawai nakon te katawanang are e katobibia te Tembora.

36A tauaki rongorongoni b'aai ni kabane ake e karaoi Iotam i nanon ana tai ni uea n te boki are Rongorongoia Uean Iuta.

37E kateirakea uean Turia are Retin, ao uean Iteraera are Bika ni buakana Iuta.

38E mate Iotam ao e taunaki i rarikiia ana bakatibu i Ierutarem, ao e a manga uea natina te m'aane are Aati.