1N te tai ae e aki maan i mwiina ngke e a tia ni m'aing Tawita nakon ana bareti ae e boou, ao e taku nakon Natan are te burabeti, “Taraia! I a maeka n te bareti ae e karaoaki man te tiira, ma te Atiniberita e kaawakinaki n te auti n rianna.”
2Ao e kaeka Natan, “E na mena te UEA iroum--karaoa ane ko taku.”
3N te tairiki anne, ao te UEA e tuanga Natan
4b'a e na nakon Tawita ao e na kaangai nakoina:
Tawita, bon au toro ngkoe, ma ngaia are, kakauongo raoi. Tiaki ngkoe ae ko na karaoa au Tembora.
5I aki maeka n te Tembora ngke I kaotinako ia au aomata mai Aikubita, ao I tuai naba mani maeka n teuana ni karokoa te bong aei. E a tia n riki te auti rianna b'a mwengau ni koaua n taabo nako ake I a tia ni m'ananga ma ngaiia nako iai.
6I rineia taani karirii ao I tuangiia b'a a na riki b'a kaanga taani kaawakin tiibu i bukiia au aomata aika Iteraera. Ao I bon tuai n tuanga temanna mai buakoia b'a e na katea te Tembora man te kai ae te tiira ibuku.
7Tawita, aio ana taeka Ngai, ae te UEA ae Moan te M'aaka nakoim. I uotiko ni kariniko man taian tawaana are ko kaawakiniia iai taian tiibu, ao I karikiko b'a te tia kairiia au aomata.
8I buokiko n taabo nako ike ko nako iai ao I tiringiia am kairiribai bon i matam. I a tia ni karikiko b'a te aomata temanna ae e rangi n kakannato n te aonnaba.
9I a tia n anganiia au aomata aika Iteraera oin abaia ike a na konaa ni maeka ma te rau iai. A na aki manga ruru-a na aki manga karauaki irouia botannaomata aika a kam'ara, n aron are a tia ni karaoia
10ngke I karokoia ngkoa taani motikitaeka b'a a na tautaekaniia au aomata, ao N na tararuaia ami kairiribai b'a a na aki roko ni buakaningkami.
I berita ngkai b'a a na riki b'a uea am kariki n ai arom.
11N na rinea temanna mai buakoia natim m'aane b'a e na uea ngkana ko a roko n tokin maium man taunaki i rarikiia am bakatibu. N na karikia b'a te tia tautaeka ae e korakora,
12ao bon akea temanna ae e na konaa n anaa abanueana mai rouna. Ao boni ngaia are e na karaoa te Tembora ibuku.
13N na riki b'a kaanga te tama nakoina, ao e na riki b'a kaanga te nati te m'aane nako iu. N na bon aki kaaki au boraraoi ma ngaia, n aron au boraraoi ma Tauro are te uea i m'aain are I a tia ni katokia.
14N na boni kakoauaa raoi b'a a na bon tautaekaniia au aomata ao abanueau natim m'aane ao am kariki n aki toki.
15Ao Natan, e tuanga raoi Tawita b'aai ni kabane ake E a tia n taekin te UEA.
Ana Kaaitau Tawita nakon te UEA(2 Tam 7.18-29)16Ao e nako n rin Tawita n te autinrianna are e a tia ni kateia i bukin te Atiniberita. E tekateka ikekei ao e tataro:
Te UEA ae te Atua, Ko bon aki riai n karaoi nako iu ma au utu b'aai aika ko a tia ni karaoi i bukira,
17ao ngkai ko a tia ni manga berita b'a ko na karaoi riki aika a m'aiti nako ia au kariki. Ko karaoai b'a kaanga te aomata ae moan te kakannato.
18Bon am toro ngai, ao ko atai au iango ni kabane. Tera riki ae n na taekinna, ao ko a tia ni karineai?
19Bon nanom b'a ko na karaoi b'aai aika a kamimii aikai ibuku ma ni karaoi taian berita aikai.
20Bon akea riki te Atua n ai arom, te UEA--bon ti ngkoe te Atua. A boni koaua taekam ake ti a tia n ongo.
21Ao bon akea riki te botannaomata n te aonnaba ae ai aron Iteraera, te botannaomata are ko kamaiua man te tautoronaki i Aikubita b'a am b'ai. Ko kakannato i bukin kamanenaan taiani kamimii ke kakai aika a korakora ni kakionako ia botannaomata ake tabeua ma antiia man abam, b'a a aonga ni konaa am aomata ni maeka ikai.
22Ko a tia n rinea Iteraera b'a am aomata n aki toki, ao Ko a tia n riki b'a Atuaia.
23Te UEA ae te Atua, taiaoka karaoa ane Ko a tia ni berita iai nako iu ma au kariki.
24Ao ane Ko na kakannato iai n aki toki, ao ane a na bane ni kaangai aomata, “E tautaekana Iteraera te UEA are Moan te M'aaka ao bon Atuaia.”
E na korakora abanueau,
25i bukina ngkai Atuau ngkoe, ao Ko a tia ni berita b'a a na uea au kariki. Ao bon anne bukina ngkai e rin angiu n tataro nakoim n aron aei, e ngae ngke bon ti am toro ngai.
26Bon te UEA ae te Atua ngkoe, ao Ko a tia n karaoa te berita ae raoiroi aei nako iu.
27I butiiko ngkai b'a Ko na kakab'aiaia au kariki n aki totoki, ao karikiia b'a am uea aika a rineaki. Ko a tia ni kakab'aia au utu, ao I ataia b'a Ko na bon kakab'aiaira n aki totoki.
Who We AreWhat We EelieveWhat We Do
2025 by iamachristian.org,Inc All rights reserved.
