Warekaia Iteraera 21 - Kiribati New Version Bible

Tokanikaia Iteraera I Aoia Kaain Kanaan i Oma

1Ao e maeka uean Arata are kaain Kanaan n Rereuan Kanaan are mai Maiaki, ao ngke e ongo b'a i aon kawaia Iteraera n roko nakon ana kaawa are Atarim, ao e buakaniia ao e kataenikaia tabeman mai iai.

2Ao a tataro Iteraera ao a taku, “Ara UEA, ngkana Ko bon buokiira ni kataenikaiia kaain Kanaan, ao ti na bon kamaunai aia kaawa ma kanoana ni kabane, ni kaotia b'a bon Am b'ai ngaiia.”

3Ao E kaekai aia tataro te UEA ao E buokiia ni kamateia ni kabane tautian Kanaan, ma ni kamaunai aia kaawa ni kabane. Ao bon anne bukina are e aranaki iai te kaawa teuana ikekei b'a Oma are nanona “Te Tabo ae Kamaunaaki.”

Karaoan Te Naeta Te Buraonti Iroun Moote

4Ao a m'ananga Iteraera ri tinanikun te aba are Etom, ma ngaia are, ngke a kitana te Maunga are Ora, ao a m'ananga ni kaineta Taari are Uraura. Ma a aki kona n taotaon nanoia aomata ngke a tabe ni m'ananga,

5ao a ngurengure nakon te Atua, ao a taku nakon Moote, “Ko bon kaotinakoira mai Aikubita b'a ko na tiringiira n te rereua? Bon akea te ran ikai, ao a aikoa rin am'arake aika buakaka aikai!”

6Ao E kanakoia naeta aika a rangi ni boitin te UEA ao a tenaia aomata, ao a m'aiti ake a mate iai.

7Ao a nakon Moote tabeman aomata, ao a taku, “E boni bure arora ngke ti ekiko nako ma te UEA. Ma ti a butiiko b'a ko na bubutiia b'a E na kanakoia naeta aikai.”

Ao e tataro Moote,

8ao E kaeka ana tataro te UEA ao E taku, “Karaoa te naeta man te buraonti, ao kanimm'a i aon tabon te kai. A na tara te naeta anne aomata akana tenaaki n te naeta, ao ane a na aki mate.”

9Ao e ongotaeka Moote iroun te UEA. Ao a bane ni maiu aomata ni kabane ake a tara te naeta are karaoaki man te buraonti, e ngae ngke a tia n tenaaki n te naeta are rangi ni boitin.

M'anangaia Iteraera Nako Moaba

10Ao ngke a reitanako m'anangaia Iteraera nako Kanaan, ao a katei maeka i Obota,

11ao i mwiina, a manga katei maeka i Iie-abarim n te rereua are i mainikun Moaba,

12i mwiina, i Tereta.

13Ao i mwiin anne, a manga ri nanon te Karaanga are Arenon, ao a manga katei maeka n rereuan Moaba are tian abaia kaain Amora. Te Arenon bon te tia i marenaia kaain Moaba ma Amora.

14E taekinaki n te anene are n Bokin Ana buaka te UEA kaawan Waeba ma karaangan ranna aika uarereke n te aba are Tuba (Tuba). E taekinaki naba iai te Karaanga are Arenon,

15ma taiani m'arua are wene i aon tian abaia kaain Moaba, ma n roota te kaawa ae Are.

16Ao a waakinako Iteraera man te Arenon nakon te m'anib'a are i rarikin te kaawa are Beere, ike E taetae iai te UEA ngkoa nakoni Moote ni kaangai, “Ikotiia aomata, ao N na anganiia nimaia te ran.”

17Bon anne naba te tabo are a anenea iai te kuna aei Iteraera:

Ti na karaoa ara botaki ni kukurei!

E a tia te m'anib'a aei n anganiira te ran.

18A tia taani kairiri ni kotea te tabo

ike ti na kena iai te m'anib'a

n tabon aia kainuea.

A kiitana te rereua Iteraera, ao a katei maeka i rarikin te kaawa are Matana,

19ao i mwiina, a manga katei maeka i Naariera, ao i mwiina Bamota.

20Ao n tokina, a roko n aban Moaba, ike a manga katei maeka i rarikin te Maunga are Bitika n te m'arua are kaaitaraa te rereua are i meangin Taari are Mate.

Konaakin Uean Amora Are Taion(Te Tua 2.26-37)

21Ao a kanakoa te rongorongo aei Iteraera nakon uean Amora are Taion:

22Ti butiiko b'a ko na kariaia b'a ti na ri nanon abam, ti berita b'a ti na bon kararoaira man ami katawanang ma ami nnenikureebe, ao ti na aki nima naba ranin ami m'anib'a. Ao ti na bon aki kitana nanon te kawai ngkana ti roko i nanon abam.

23Ma e rawa Taion ni kariaia b'a a na ri nanon abana Iteraera, ao e weteia ana taanga ni buaka, ao a m'ananga nakon te rereua ni buakaniia Iteraera i rarikin te kaawa are Iaati.

24Ma a konaaki irouia Iteraera, ao a tauaki abaia kaain Amora man te Karaanga are Arenon ni karokoa meangin Iaboka are abaia kaain Ammon, ake a korakora riki nakoia Iteraera.

25Ao a maeka Iteraera n aia kaawa kaain Amora, n reitaki naba ma kaawan te tautaeka are Etibon ma kaawa nako ake i rarikina.

26E a tia n tautaekana Etibon te uea are Taion, i mwiin konaakiia kaain Moaba irouna, ma anaakin abaia are i meangin te Karaanga are Arenon.

27Ao bon aei bukina are a otea iai te kuna aei kaain Amora:

Nakomai manga katea Etibon.

Kaawan ana tautaeka te uea are Taion!

28A m'aati nakon te buaka ana taanganibuaka

kaanga ai aron uran te ai,

ma ni kabuoka te kaawa are Are,

ma ni kamaunai taian tabuki

ake i rarikin te karaanga are Arenon.

29Ai kaawara ngkami kaain Moaba!

E boni manga tewenakoingkami

atuami are Kemoti,

a na tauaki b'a taenikai, ma ni uotaki nako

iroun te uea are Taion are kaain Amora.

30Ti kataenikaia raoi Moaba.

Kaawa aika Etibon ma Ribon,

ao Nob'a (Nob'a) ma Meteb'a

kam a urubekebeke ma ni mauna nako.

31Ao ngke a tia ni maeka Iteraera n aban nako Amora

32ao Moote, e kanakoia tabeman mm'aane b'a a na tuoa te aba are Iatera. I mwina, ao a taui taiani kaawa akekei Iteraera; a katobibia, ao a kanakoia kaaina ake a maeka iai.

Konaakin Oka are Uean Batian(Te Tua 3.1-11)

33Ao a manga m'ananga nako Iteraera ni kaineta aonon Batian, are e tautaeka iai te uea are Oka. Ao e kairiia ana taanga ni buaka ni kabane Oka nako Eterei b'a a na butim'aia Iteraera ni buaka ma ngaiia.

34Ao E taku te UEA nakoni Moote, “Ko na aki maaka Oka, N na buokiko b'a ko na konaa ma ana taanga ni buaka, n ai aron naba are ko karaoia nako te uea are Taion, are e tautaeka i Etibon. Ko na b'aina aban Oka.”

35Ma ngaia are, a kamaunaa Oka Iteraera, ma ana utu, ma ana taanga ni buaka ni kabane. Bon akea nikiraia ni maiu. Ma ngaia are, a b'aina aban Batian Iteraera.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help