2.Tamuera 24 - Kiribati New Version Bible

Warekakiia Kaain Iteraera Iroun Tawita(1 Rongo 21.1-6)

1Ao E un te UEA irouia Iteraera, ao e karekea ana iango Tawita b'a e raoiroi ngkana e wareki m'aitiia Iteraera ma Iuta.

2Ma ngaia are, e tuanga Ioaba ma aobitian te taanga ni buaka ni kaangai, “Naako nakoia kaain te baronga ni kabane i Iteraera, ni moa man kaawan Taan i meaang ni karokoa maiakin Beerateb'a, ao wareki m'aitiia aomata ni kabane aika a konaa n riki ni kaaina te taanga ni buaka. I tangiria n ataa m'aitiia.”

3Ao e kaeka Ioaba ni kaangai, “Au kaantaninga b'a E na anganiko te UEA ae te Atua tebubua riki okiokin m'aitiia tautia aika a tia n reke iroum. Bon au kaantaninga b'a ko na bon kauia te bong anne! Ma e aera ngkai ko tangiria ni karaoa te aro aei?”

4Ma ngke e rawa Tawita ni bita nanona, ao a otinako Ioaba ma aobitian te taanga ni buaka ao a moana warekaia aomata.

5A ri nanon te Karaanga are te Ioretan ao a moanna mai Aroera ao te kaawa are i nuukan m'aruan te karaanga. Ao a waaki nako Kata maikanne, ao n reitia nako ni karokoa Iatera.

6A manga nako Kireata ao Kateti i Turia. Ao i mwiina, a manga nako Taan, Oteti Ke “Taniaan”, te tabo ae e aki ataaki, ao n reiti nako ni kaineta Titon.

7Ao a roko n nonon Turo, ao a manga ri nanon aia kaawa nako kanoan Iwa ao kanoan Kanaan. Ao kabaneana, a nako Beerateb'a are n Rereuan i Iuta mai maiaki.

8Ao a tia ni kabuta te aba, ao a okira Ierutarem. A kabanea ruaiwa te nam'akaina ao uabwi te bong.

9Ao e kawara Tawita teuare Ioaba ao e tuanga Tawita ni kaangai, “Bon iai aomata i aon Iteraera ae m'aitiia bon wanibubua te ngaa aika a konaa n riki b'a kaain te taanga ni buaka, ao i aon Iuta bon nimabubua te ngaa.”

Katuaaean Tawita Iroun Te UEA

(1 Rongo 21.7-17)

10Ao ngke e tia Tawita ni wareki m'aitiia aomata nako, ao e a namakinna b'a e bure iai ao e taku nakon te UEA, “Bon te m'akuri ni baba te b'ai ae I a tia ni karaoia ao bon te m'akuri ae e rangi ni kaairua. Te UEA, taiaoka kab'araa au bure.”

11Ngke E tuai n uti Tawita n te ingabong n te moaningabong are i mwiina, E a tia te UEA n tuanga ana burabeti Tawita are Kata

12b'a e na karokoa te rongorongo iroun Tawita.

13Ao e nako Kata ni kawara Tawita ao e taku:

Ko na riai n rinea teuana mai buakon kawai aika e na katuaaeako iai te UEA: e na iai ririki aika itiua te ririki are e na aki anga iai uaana aon te aba nakoia am aomata? Ke a na kakioko am kairiribai b'a ko na biri nako mairouia i nanon tenua te nam'akaina? Ke e na roko tenibong bongin te aoraki ae e kakamaaku i abam? Ko na iangoia n rinea nanom, b'a N na manga anga am kaeka nakon te Atua, are E kanakomaiai.

14Ao e rangi ni maaku Tawita, ao e taku, “E matoatoa rineana! Ma E bon akoi te UEA, e raoiroi riki katuaaeau Irouna nakon ae N na katuaaeaki iroun temanna.”

15Ma ngaia are, n te ingabong anne, E kanakoa te anera te UEA b'a e na kabutaa aon Iteraera ni kabane n te aoraki ae e kakamaaku, ni moa mai Taan nako Beerateb'a.

16Ao i m'aain tokina, a tia ni mate itibwi te ngaa aomata.

Ao ngke kaanga e nang urua Ierutarem te anera, E a manga uringa nanona te UEA i bukin te karawaawata are E a tia ni karokoa ao E taku nakon te anera, “E a bati n tau anne! Tai katoka baim i aoia.” E riki te b'ai aei n te tabo ni kaaki kunni uita are ana b'ai Arauna are kaain Iebuti.

17E noora te anera Tawita ngke e tiringiia aomata nako ao e taku nakon te UEA, “Bon ti te bo aomata aikai ma tiibu ao Ngai aia tia kaawakintiibu. I a tia ni bure korakora, ao a bon aki bure. Taiaoka, katuaaeai ma au utu ma Ko na aki katuaaia!”

Kabooan Ana Tabo ni kaakikunuita Arauna Iroun Tawita(1 Rongo 21.18-22)

18-19Ao e roko te burabeti are Kata n te bong naba arei iroun Tawita ao e taku, “Naako nakon ana tabo ni kaakikunuita Arauna ao karaoa iai te baonikarea ikekei i bukin te UEA.”

Ao e taku Tawita.

20Ao e taratara nako Arauna ao e nooria Tawita ma ana tautia aika a tabe n nakoina. E nako ni kawara Tawita ao e bobaraaki ni karinanoa,

21ao e taku, “Te uea ae ko karineaki! E aera ngkai ko nakomai ni kawarai?”

Ao e kaeka Tawita ni kaangai, “I roko b'a N na kabooa am tabo ni kaaki kunniuita. N na riai ni karaoa te baonikarea ikai, b'a e aonga n toki mateia aomata n te aoraki aei.”

22Ao e taku Arauna, “Anaa te b'ai ane ko bon tangiria ao anga am karea. Aikai naba tabeua taian kao i bukin am karea. Ko konaa naba ni kamanenaa kairababan te tabo ni kaaki kunniuita ma amon te kai b'a am aia.

23Anai-b'ainii! Bon au kaantaninga b'a E na bon kukurei te UEA ae Atuam iroum.”

24Ma e kaeka Tawita ni kaangai, “I aki! N na riai ni kabooi ni m'aitin booia ae e riai. I aki konaa n anga nakon te UEA ae Atuau te b'ai ae I anaia n aki akaaka.” Ma ngaia are, e kabooa te tabo ni kaakikunuita arei ma te kao n nimabwi te m'akoro n tirewa.

25Ao i mwiina, e karaoa te baonikarea i bukin te UEA. E karean taian man ao e kabuoki i aon te baonikarea.

Ao E kaekaa aia tataro aomata te UEA, ao akea riki ae e manga mate man te aoraki are e kakamaaku arei.