1E taku Iobi nako ia raoraona:
2Eng, boni ngkami b'anaaia aomata.
Ngkana kam mate, ao e mate naba te rabakau ma ngkami.
3I bon atai naba baikana kam atai,
I aki babanga riki nako imi.
A bane n ataaki baikana kam taekini.
4A ngareakinai naba n arou aei uaake bon raoraou;
e ngae ngke I eti raoi n akea te b'ai ae I reke ni bukinaki iai.
Bon iai ngkoa te tai ae kaekaekai iai au tataro te Atua.
5E aoria b'a are akea ami kaangaanga, ao kam a manga b'ainingareai.
Kam a manga karawawata riki te aomata ae bon rawawata.
6A maiu ma te rau taani kimoa, ma aomata naba aika akea te b'ai ae a onimakinna,
e ngae ngke a tia n atuani korakoraia.
7A boni kona naba mannikiba ma maan n reireiniko;
8titirakiniia manin aonteaba ma taari i bukin wanawanaia.
9A bane n ataia b'a E karaoia te UEA ni baina.
10Bon te Atua ae kairi maiuia Ana karikib'ai,
a bane ni mena maiuia aomata i nanon m'aakana.
11Ti katoong b'aai ni wiira,
ao ti ongo b'aai n taningara,
12ao ti karekei rabakaura teutana
mairouia aomata aika b'akanako aia ririki,
13ma bon te Atua boton
te rabakau ma te korakora.
14Ngkana e urub'ai te Atua,
akea ae kona ni manga kateia,
akea naba ae kona ni kab'ara te aomata ae kainna te Atua n te karabuuti.
15E roko te rongo ngkana E taua te karau te Atua;
a roko taian ieka ngkana E kanakoi taian ran.
16E korakora te Atua, ao E totokanikai n taai nako;
a bane ni mena i aan m'akana aomata aika m'am'anaaki ma aomata naba aika taani m'am'ana te aba.
17E uoti nako rabakauia taan tautaeka,
ao E karikiia taan kairiri b'a nanobaba.
18E kab'akaia uea man aia kaintokanuea,
ao E karikiia b'a buure.
19E karinanoi nanoia ibonga,
ao aomata aika iai te m'aaka i rouia.
20E kaini wiia aomata aika onimakinaki,
ao e uoti nako rabakauia unim'aane.
21E kamamaaia aomata aika taui taian nakoa aika rietaata,
ao E katoki korakoraia taan tautaeka.
22E kanakoa te oota nakon taabo aika rotongitong.
23E karaoia botannaomata b'a a na korakora ma n rikirake,
ao i mwiina E a manga kab'akaia ma ni kamaunaia
24E kariki aia mataniwi b'a nanobaba,
ao E katiotionakoia ni kam'aningaia, ao a noubaba.
25A kakaenako baiia n te rotongitong,
ao a raai waeia kaanga koro ni manging.
Who We AreWhat We EelieveWhat We Do
2025 by iamachristian.org,Inc All rights reserved.
