Te Tua-Kaua 24 - Kiribati New Version Bible

Tuua I bukin Te RaureAo e taku Moote nakoia Iteraera:

1Ngkana tao arona b'a e raure te m'aane ma buuna b'a e ataia b'a iai aroaron buuna ae buakaka. Ao e na korei taeka n raure i aon taiani beeb'a te m'aane, man angan te aine, ao e na kanakoa.

2I mwiina, tao e a manga iein te aine arei ma te m'aane temanna,

3ao e a manga raure naba ma ngaia ke tao e mate.

4Ao ngkai e a tia ni wene ma buuna are ana kauaei, ao e aki riai ni manga okira moan buuna ni mare ma ngaia. E na riki aia mare b'a kam'araean te aba are a tia n anganiira te UEA ae Atuara, ao E na bon rangi n ribaaki iroun te UEA.

Taanga Aika Tib'a MareakiAo e taku Moote nakoia Iteraera:

5Ngkana a tib'a mareaki te m'aane ma te aine teuana te ririki n nako, ao e na aki kanakoaki te m'aane b'a e na ira te buaka ke ni kanakoaki nakon te m'akuri ae moan te rawaawata. E na kariaiakaki n tiku n ana auti i nanon teuana te ririki ni kukurei ma buuna.

Taian RounAo e taku Moote nakoia Iteraera:

6Ngkana kam angan te aomata temanna te m'ane b'a e na taarau iai, kam kona ni kaawakina ana b'ai teuana te tia taarau b'a te kabomwi b'a e na manga boni kab'ara ana taarau. Ma kam na aki anaa teuana ke uoua ana atiibu ni kamanti uita, b'a a kaawa ni mate ni baki. A kainanoa aia atiibu ni kamanti uita i bukin kamantan aia uita ni kariki aia uita b'a te buraawa are a na kona ni karaoa iai kanaia te kariki.

Iraeakin Te AomataAo e taku Moote nakoia Iteraera:

7Ngkana kam reke n te bure n iraea kaain Iteraera ma ni kam'akuria n te m'akuri n toronaki, ao kam na kamateaki b'a e aonga n nako te m'akuri ae buakaka aei man te bootaki ni Iteraera.

Taian Aoraki N Te KunAo e taku Moote nakoia Iteraera:

8I a tia n tuangiia ibonga te b'ai ae a na karaoia ngkana e reke temanna mai buakomi n te rebera, ma ngaia are, kam na karaoi b'aai ni kabane akana tuangingkami.

9Ao kam na uringa te b'ai are karaoia te UEA ae Atuami nakon Nei Miriam i mwiin kitanakin Aikubita iroumi.

Taian TaarauAo e taku Moote nakoia Iteraera:

10Ngkana kam kataarauia aomata n te m'ane, ao kam kariaiakaki n anai aia b'ai are te b'ai ni kabomwi b'a a na manga kab'ara aia taarau. Ma kam na aki rin n aia auti n anai.

11Kam na tei i tinaniku n tataninga, ao a na bon uoti nakoimi aia b'ai ni kabowi.

12Ao ngkana tao iai ae rangi ni kainano n te aro are e ti kona n anga kunnikaina b'ai ni kabomwi. Ao kam na aki taua iroumi te kunnikai anne ni karokoa te tairiki.

13Ma kam na riai ni kaokia i m'aain bungintaai, b'a e aonga ni kona ni kamanenaa te aomata are kunnikaina n kamanoa iai rab'atana ngkana e matu, ao ma ni bubutiia te UEA b'a E na kakab'aiako. Ao n te aro anne, ao E na ataia iai te UEA ae Atuami b'a kam karaoa ae raoiroi.

Booia Aomata Aika KainanoAo e taku Moote:

14Ngkana kam kabooia aomata aika kainano b'a a na m'akuri i bukimi, ao kam na aki kamaani booia iroumi, e aoria ngkana bon Iteraera ke te ianena ae maeka n ami kaawa.

15Kam na kabooia n te bongina, i bukina b'a a maiu ni kainano ao a tangira te m'ane i bukin maiuia. B'a ngkana kam aki kabooia n te tai ae riai, ao ane a na ngurengure nakon te UEA i bukimi, ao E na katuaaingkami te UEA.

Te Tuua Are Te MateAo e taku Moote nakoia Iteraera:

16A na aki tiringaki kaaro i bukin aia bure natiia, ao a na aki tiringaki naba naati i bukin aia bure aia karo. Akea temanna ae kam na tiringnga i bukin ana bure temanna.

Tai Karaoa Ae Aki Riai Nakon Te Aomata Ae Akea KorakoranaAo e taku Moote nakoia Iteraera:

17Kam na riai ni kakoauaa b'a kam bon kakaraoa ae raoiroi nakoia ataei aika akea aia karo, ao iruwa. Ngkana kam anga te m'ane nakon te aine ae mate buuna, man taua ana b'ai teuana b'a kakoauaan ana taarau are riai ni kab'ara, ao kam na aki ana teuana man ana kunnikai.

18Bon tooro ngkoa ngkami ngke kam mena i Aikubita ni karokoa E kamaiungkami te UEA ae Atuami. Ao bon aei bukina ngkai I anganingkami iai tuua aikai.

Ao e taku Moote nakoia Iteraera:

19Ngkana kam m'aninga n uoti ami b'ab'ati ni uita man te katawanang, ao kam na aki manga nako n okiri n anai. Kam na katikui b'a aia b'ai aomata aika a kainano, n reitaki ma iruwa, ataei aika akea aia karo, ao aine aika a mate buuia, ao E na katetekeraoingkami iai te UEA ni b'aai ni kabane aika kam karaoi.

20Ngkana kam taia uaan arokami te oriwa, ao kam na aki kababanei uaaia n anai, ma kam na katikui tabeua i bukiia aomata aika kainano.

21Ao ngkana kam kiniki uaan ami kureebe, ao ti teuana tain kinikan uaaia, ao ko na aki manga okiria riki te kauoua n tai, b'a a na karekei aroia aomata aika kainano n nikirana.

22Kam maeka ngkoa ni kainano n ai aroia tooro i Aikubita ni karokoa E kamaiungkami te UEA ae Atuami, ao bon anne bukina ngkai I anganingkami tuua.