Ieremia Taekan te boki aei - Kiribati New Version Bible
Taekan te boki aeiE onrake ana tai Ieremia n taian buaka irouia tautaeka aika a boou aika a buakania tautaeka nikawai. Te abanuea ae uarereke are Iuta e nuukaaki n taian tautaeka, ao i nanon ana tai ni maiu Ieremia, e teirake B'aburon n eekaanako Iuta man katoka inaomatana ni botannaomata.E moana karokoan ana rongorongo te UEA irouia kaain Iuta teuae Ieremia ngke e uarereke, ngke e a kaan 40 ana ririki ni maiu. E reitinako ana m'akuri ni karokoa 586 BC, are e roko iai kaain B'aburon n taua Ierutarem. Iai tabeman kaain Iuta ake a kairoroa b'a e na airi ma ngaiia nako Aikubita, ike e teimatoa naba iai n taetaekin ana taeka te UEA nako ia.Angiin ana taeka Ieremia a kaotaki iai taian tai ake a taekinaki iai. Ma ngke e a manga buokaki i roun raoraona are B'aruka ni koroi, ao a aki karinani raoi taai akanne. A bobootaki raoi taian rongorongo i bukina ngke ti te bo te b'ai ae a taekinna.E karaoi nanon taian rongorongo aikai Ieremia b'a a aonga aomata n ataa te b'ai ae E taekinna te UEA (Noora 13.1-11; 19.1-11; 27.1—28.17; 32.1-44; 43.7-13).E aki toki n tataekinna Ieremia b'a e na katuaaea Iuta te Atua. Ma i bukina ngke e taekinna naba b'a a na taenikai kaain Iuta irouia kaain B'aburon, ao a bukinna ana kairiribai b'a te tia kam'ane. A karinna i nanon te karabuuti ao a bon iangoa naba tiringana. E ngurengure Ieremia nakon te Atua i bukin kangaanga aikai ao a ataaki ngurengurena aikai b'a ana “Kab'arabure” (Noora 11.18-23; 12.1-6; 15.10,11,15-21; 17.14-18; 18.19-23; 20.7-18).E aki toki ni kauringiia kaain Iuta Ieremia b'a a tia n urua aia booraraoi i bukin taromaurian te UEA n ti Ngaia. Ai ngaia are, E nang katuaaia te UEA ni karokoia kaain B'aburon b'a a na uotiia nako B'aburon. Ma E bon berita naba te UEA b'a E na manga kaokiia nako abaia n te bong teuana, ao e na manga karaoa te booraraoi te UEA ae e boou ma ngaiia n te tai anne:“N na korea Au tuainanoia ma aia iango.N na riki b'a Atuaia,ao a na riki b'a Au aomata.“A na aki manga reireiniia i bon irouia aroia n ongo taeka irou. I a tia Ngai ae te UEA ni berita b'a a na bane n ongotaeka irou, ti te arona aomata n nako ma taan tautaeka. N na kab'arai aia bure nako ao N na m'anuokin aia m'akuri aika a buakaka aika a tia ni karaoi.” (31.33b; 34)Oi n iango i aon te boki aeiWetean Ieremia 1.1-19Taeka ni burabeti n aia tai n uea Iotia, Ieoiakim, Ieoiakin ao Tetekia 2.1—25.38Baika riki ni maiun Ieremia 26.1—45.5Taeka ni burabeti n ekianako botannaomata 46.1—51.64Rongorongon B'akan Ierutarem (52.1-34)