1A bon tiku naba ni maeka ana kariki Aaba aika itingaun i Taamaria. Ma ngaia are, e korea ana reta Ieu nakoia taani kairiiri aika a kakannato ma mataniwi aika a kakannato n tatabemaniia nako n te kaawa, ao aomata nako ake a tei i bukin Aaba. Ao a taku kanoan reeta akekei:
2“E matoatoa ami kaawa, ao kam kamanoaki n taiani kaanibuaka ao taani buaka i aoia aoti aika a uab'ai ni kamaamate. Ao I ataia b'a a maeka ikanne ma ngkami ana kariki Aaba. Ma ngaia are, ni bon te tai are kam wareka naba iai te reta aei,
3ao kam na rinea te aomata ae e tau nakon te tib'anga, ao karikia b'a manga te uea i mwiina. Ao kam na kakatauraoingkami b'a kam na kamanoia ana utu Aaba.”
4A wareki reeta akekei taani kairiiri ma taiani mataniwi ao a rangi ni maaku. A i taetae bon irouia ao a taku, “E a tia Ieu n tiringa te uea are Ioram ao te uea are Aatia. Ti riai ni karaoa te b'ai ae e taekinna.”
5Ao mataniwin te bareti, ma mataniwiin te kaawa, ai uana naba ma taani kairiiri nako, ao ake a teetei i bukin Aaba, a kanakoa aia rongorongo nakon Ieu ae e kaangai, “Teuae ko karineaki, bon am toro ngaira. Ao ti na karaoi b'aai ni kabane aika ko tuangiira. Ma bon tiaki ara b'ai te rinea temanna b'a e na uea. Ko a boni karaoa ane ko taku b'a te kabanea n tamaroa.”
6Ao e manga korea riki ana reta Ieu ao e taku, “Ngkana kam mena n au itera ao kam ongotaeka irou, ao kam na kaota koauana. Kam na uoti nako iu atuiia ana kariki nako Aaba. Ao kam na mena ikai i Ietireera n te tai naba ae aron aei nakon te ingabong.”
A kaai ni maeka ana kariki Aaba ake itingaun ma aomata aika a rangi ni kakannato n te kaawa.
7Ao ngke a wareka ana kauoua n reta Ieu aomata akekei, ao a weteia ana kariki Aaba ake itingaun ni kabane. A tiringiia, ao a nnei atuiia i nanon te b'aatiketi, ao a kanakoi nako Ietireera.
8Ao ngke e kaongoaki Ieu te b'ai are e a tia n riki, ao e taku, “Bootii atuuia nakon uoua te b'ariko ni mataroan te kaawa, ao katikui ikekei ni karokoa te moani ingabong.
9N te ingabong are i mwiina, ao e otinako Ieu, ao e tei n te tabo are a na konaa n ongo iai aomata ni kabane b'anaana, ao e taku, “Bon akea ami bure aomata, b'a boni ngai ae I baairea aron kaaitaraan Ieoram ma tiringakina. Ma antai ae e tiringiia m'aane aikai ni kabane?
10Ongora irou. A na riai ni bane ni koro bukin ana berita ana toro te UEA are Eria i bukiia ana utu Aaba.”
11Ao i mwiin arei, ao e bane n tiringiia ni bane Ieu ana koraki Aaba ake a maeka i Ietireera, n reitaki ma ana mataniwi ake kabanea n rietaata, ana ibonga, ao raoraona ake e rangi n reitaki ma ngaiia, bon akea temanna man ana utu Aaba ae tiku ni maiu i Ietireera.
12Ao e nako Taamaria Ieu, ao i aoni kawaina, ao e kaaitibo ma tabeman ana koraki uean Iuta are Aatia n te tabo are a bobowi iai taani kaawakin tiibu.
13E titirakiniia ao e taku, “Antai ngkami?”
Ao a kaeka ao a taku, “Bon ana koraki Aatia ngaira. Ti na nako ni kawariia ana utu.”
14Ao e taku Ieu nakon ana aobitia, “Tauia ma tai tiringiia.” Ma ngaia are, a tauia ao a kairiia nakon te m'anib'a i rarikin aia tabo ni bowi taani kaawakin tiibu, ike a tiringiia iai ngaiia ake angaun ma uoman.
15Ao e reitanako kawaina Ieu, ao e noora teuare Ieonataba are natin Rekaba ae e roko ni kawaria. E kamauria Ieu, ao e taku, “Ieonataba, I tei n am itera, ao ngkoe ko tei n au itera ke ko aki?”
E kaeka Ieonataba ao e taku, “Eng, I tei naba n am itera. Ngkana ngaia anne, ao kaamai baim.” Ma ngaia are e buokaki Ieonataba iroun Ieu ni katokaa n ana kaanibuaka,
16ao e taku, “Nakomai irai b'a ko na noora au kakaonimaki nakon te UEA.”
A kaai ni m'ananga i aon ana kaanibuaka Ieu
17nako Taamaria. E tiringiia ana utu Aaba ni kabane Ieu ikekei ni ikotaki ma ana mataniwi ni kabane. A bane ni mate ngkai kaain ana utu, n aron are E a tia ni berita iai te UEA nakon Eritai.
Ieu Ngke E Tiringiia ni Kabane Taan Taromauria B'aara18E weteia ni kabane kaain Taamaria Ieu, ao e taku nakoia:
E taromauria B'aara n tabetai te uea are Aaba; ma ngai, N na teimatoa n taai nako n taromauria B'aara n ti ngaia.
19N nang anga ngkai te karea ae moan te korakora nako ina. Ma ngaia are, kam na kaoiia ana burabeti ao ana ibonga, ao kakoaua raoi b'a a na bane n roko ikekei taan taromauria B'aara. E na tiringaki ane e aki roko.
Ma bon te m'akuri ni kam'ane te baei-b'a Ieu e bon iangoa tiringakiia taan taromauria B'aara.
20Ao e taku, “Kam na katanoataa te bong are e na taromauriaki iai B'aara. Ao i mwiin te katanoata,
21ao e kanakoa ana beeb'a ni kakao Ieu nakoia aomata ni kabane i aon Iteraera. A bane n roko taan taromauria B'aara, ao e onrake te tembora mai tabona nako tabona.
22E tuanga te mataniwi Ieu are te tia kaawakin taian niiniira aika tabu b'a a na kakoaua raoi b'a a bane aomata ni kunnikaiia iai.
23E rin nako Ieu ma Ieonataba nako nanon te tembora, ao e taku Ieu nakoia aomata, “Taraia raoi b'a bon ti taan taromauria B'aara aika a na mena ikai. Bon akea ae taromauriia te UEA ae e kariaiakaki n rin.”
24Ao i mwiina e a moanaki te angakarea nakoni B'aara.
E a kaman tia Ieu n tuangiia waningaun tautia b'a a na tataninga i tinanikun te tembora. E a tia n tuangiia ni kaangai, “N na tauia ikai taan taromauri, ma ngkana kam karekea birinakon temanna naba mai buakoia, ao kam na manga onea mwiina n tiringaki.
25Ao ngke e a tib'a bane ana angakarea Ieu, ao e a tuangiia taan tei ao tautia ni kaangai, “Mai tiringiia, Tai kabiri nakoa temanna.” A tiringiia ni kabane kaain te bootaki arei, ao a tewenakoi rab'ataia i tinaniku, ao i mwiina, a manga rin nako n te tembora,
26ao a kaotinakoa bannan B'aara. A kabuokia,
27ao a kamaerikirikia, ao i mwiina, a urubekea temboran B'aara n akea naba nikirana teutana. Ao man te tai arei, e a riki b'a te b'ai ae akea bonganana b'a e a riki b'a aia kainakotaari aomata.
28Ao anne aron Ieu ni katoka taromauriani B'aara i aon Iteraera.
29Ma e aki katoka taromaurian bouanantin te kaoteteei ae te koora i Taan ao Betaera, are e a tia ni kateia Ieroboam b'a e na taromauriaki irouia aomata.
30Ao rimwi riki, E taku te UEA, “Ieu, ko a tia ni karaoa ae e eti ngke ko kamaunaa ana utu Aaba ni kabane, n aron are I a tia ni baaireia. Ma ngaia ae, N na kakoaua raoi b'a uean Iteraera akana aman imwiim a na nako man am utu.”
31Ma e aki kakaonimaki Ieu nakon ana Kaetieti te UEA ae Atuan Iteraera. B'a e a manga teimatoa ni karaoi b'aai ake e karaoi naba Ieroboam are e kairiia iai Iteraera nakoni karaoan te bure.
Maten Ieu32Ao i nanoni boong akanne, ao E a tabe ni kauarerekea aban Iteraera te UEA. E konaiia Iteraera uean Turia are Ataera ao e taui taekan,
33aonon Kireata ao Batian are i mainikun te Karaanga are Ioretan, ao meangin te kaawa are Aroera i rarikin Karaangan Arenon. Bon aei ngkoa te aba are a maeka iai baronga ake Kaata, Reuben ao Manate.
34A tauaki mwiini b'aai ni kabane ake e karaoi Ieu ngke e uea, ni ikotaki ma ana m'akuri n ninikoria n te boki are Rongorongoia Uean Iteraera.
35E mate Ieu, ao e taunaki i Taamaria, ao e a manga uea natina te m'aane are Ieoaati.
36E a tia n tautaekana Iteraera Ieu mai Taamaria i nanon 28 te ririki.
Who We AreWhat We EelieveWhat We Do
2025 by iamachristian.org,Inc All rights reserved.
