Taeka n Rabakau 30 - Kiribati New Version Bible

Ana Taeka n Rabakau Akura

1Aikai ana taeka n rabakau

ao ana rongorongo

Akura are natin Iaketa te m'aane.

E tang temanna nakon te Atua ni kaangai,

E a kiitanai te Atua. E a kiitanai te Atua,

A akea ae e kona ni buokai.

2I aki riai n atongaki b'a te aomata

b'a I bon rangi n nanobaba,

3I bon tuai man wanawana,

ao I aki ataia

b'a te aekakira te Atua.”

4A tia ni waerake tabeman nako karawa

mani manga ruorikaaki?

Iai ae e a tia n rawea te ang

i nanoni baina?

Iai ae e a tia ni batiana taari

ke ni kanikinaai taian tia

n te aonnaba?

Ngkana iai ae ko ataia

b'a e a tia ni karaoi baikai,

ao anganai araia

ao aran natiia.

5A bane ni koaua b'aai ni kabane aika e taekin te Atua

ao bon te otanga i bukiia aomata nako

aika a roko nakoina i bukin kamanoaia.

6Tai manga bita te b'ai ae e a tia n taekinna te Atua!

E na kaetiko mani katereterea nakoim

b'a te tia kewe ngkoe.

7Bon iai b'aai aika uoua, te UEA

aika I tangiriko b'a ko na karaoia ibuku

i m'aain mateu:

8Ko na karikai b'a te aomata ae e raoiroi

ao ko na aki karikai b'a te aomata ae e rangi ni maiu ni kainano

ke n rangini maiu ni kaub'ai.

Ko na ti anganai baika I kainanoi.

9Ngkana e a manga rangi n rawata kanau,

ao ane n na manga m'aninga taekam;

ao ngkana e a manga aki tau,

ao ane n na manga kimoa

ma ni kamamaaea aram.

10Ko na aki tuanga te toka

taekan temanna mai buakoia

ana toro ae e buakaka.

B'a ane e na kamaraiako te toro anne,

ao ane ko na reke n te kangaanga.

11Iai tabeman aomata aika a kamaraiaia tamaia

ao bon tinaia naba;

12ao tabeman a taku n aia iango b'a a rangi n raoiroi,

ma a kam'araaeaki n aia bure.

13Ao tabeman a kainikatonga

ao a karaoi aia m'akuri taani kamoamoa;

14ao tabeman a rangi n nano n rang

ao a kab'autiia

aomata aika a maiu ni kainano ao aika akea mwengaia.

15Bon uoman natin te nano n rang aika a bwebwee,

araia n tatabemaniia bon “Anganai!”

Bon iai b'aai aika tenua ke aua

aika a aki konaa n rauaki:

16aia aonnaba maate

ao te aine ae e kanoabo,

aonteaba ae e b'atakataka

ao te ai ae e ura.

17Ko na tai b'ainingarea tamam

ke n aki ongotaeka iroun tinam

A na katebea kanoani matam rebenin te m'arua ni karebenakoa,

ao a na kana nikiran rab'atam

taian ikare.

18Boni iai b'aai aika tenua ke aua

aika I aki ataia:

19Aron te ikare ni kiba ieta

ke te naeta ni kawakawa i aon taiani b'a,

aron taiani kaibuke ni ieie i nanoni marawa

ke aroia aomata n tangira.

20E taku ana taeka te ainenum'a ae e aki kakaonimaki,

“Akea buren te matu ma te m'aane temanna

b'a kaanga ai aron kanakin te am'arake.”

21Bon iai b'aai aika tenua ke aua

aika e karurua te aonnaba

aika a aki konaaki moaia:

22Ngkana e a manga riki n uea te toro,

ao te nanobaba ae e rangi kabatia kanana ae e kanna.

23Te aine ae e rangi n ribaaki

ae a manga reke buuna,

te toro te aine

ae a manga onea mwiin te aine are ana toka.

24Bon iai b'aai aika a uarereke

n te aonnaba aei ma a wanawana:

25Te kinnongo, aika a taraa ni mamaara,

ma a kaikoa te am'arake

i nanoni bongin te aumaiaki;

26Taiani kone, aika a taraa ni mamaara,

ma a maeka i buakon taiani b'a;

27Taian rookati, aika akea aia uea,

ma a m'ananga kaanga te taanga ni buaka;

28Taiani beru, aika a konaa

n raweaki i nanon te bai

ma a maeka naba n taiani bareti.

29Iai teniman maan

aika a tamaroa nakonakoia:

30Taian raian aika a aki konaa ni maaku

aika a tautaekana te buakonikai,

31taiani moa aikai, aika a nakonako ma te kakatia,

kootin aoni maunga aikai,

ao taan tautaeka aikai

aika akea aia kairiribai.

32Ngkana ko nanobaba ni kamoamoako

ke ko babaairei aron b'aai aika a buakaka,

ao katokia ngkai!

33Ngkana ko kakibea te rannimamma i bukin karekean te b'ata

ao ko na karekea ae e raoiroi riki;

ngkana ko orea b'airim,

ao e na raraa

ao ane ko na reke n te kangaanga

ngkana ko tiku ma marakin nanom.