Etekiera 39 - Kiribati New Version Bible

Konaakin KokaE taku te UEA:

1Etekiera ae natin te aomata, ko na kabuakakaa Koka ao tuangnga ni kaangai:

Bon te tia tautaeka ngkoe i Meteka ao Tubara, ma I a riki b'a am kairiribai Ngai ae te UEA!

2N na manga karairakiko rikaaki ma n uaakiniko mai meaang ni karokoa ko roko ni maungan Iteraera.

3N na orea nako te kai ni katebe mai baim te angamaing ao taiani kanoa ni katebe mai baim te angaatai,

4ao ko na kaai ni mate ma koraki akana i aon taiani maunga. Ao mannikiba ma maan aika a aki manana a na roko ni kang

5rab'atamii aika a mate aika a tiku ni wene i nanon taian rereua aika a tangaina. Bon aei Au taeka Ngai ae te UEA.

6N na kaurarakea te aba are Mokoka ao nakoia botannaomata ake a mena i mataniwiin taari ake a taku b'a a rangi mano raoi, ma a na ataia b'a bon te UEA Ngai.

7A na ataai Au aomata aika Iteraera, ao a na aki manga oki ni kamatauningaa Arau. A na bane aomata ni kabane aika i aon te aonnaba n ataai b'a bon te UEA Ngai ae Atuaia Iteraera ae I tabu.

8A na roko boong are a nang koro iai bukin baikai, n aron are I a tia ni berita iai.

9A na bane aomata i nanon kaawan nako Iteraera n rikoi aia b'ai ni buaka aia kairiribai ake a mate. A na kamanenai otanga akanne, ma kainikatebe ma kanoanikatebe, ma kainiwai, ao taian kai n oro b'a taian aia, ao e na bon nikirana n aki bane i nanon itiua te ririki.

10A na kabuoki taian b'ai ni buaka aikai n onea mwiin te kai ke kaai ake a na korokoroi man aroka ake a na kab'akai. Ao anne aroia Iteraera ni katae aia kai irouia ake a aki toki ni kikimoaia ma ni kabuakakaia. Bon aei Au taeka Ngai ae te UEA.

Taunakin KokaE taku te UEA:

11Ngke e a tia ni kamaunaaki Koka, N na taunna ma ana taanga ni buaka i Iteraera, n te M'arua are Taani M'am'ananga, i mainikun Taari are Mate. E na bon rangi ni buubura te tabo n taunimate anne n te aro are e na tuuka kawaia aomata ake a kataia n nakonako i nanon te m'arua, are e na ataaki n arana ae M'aruan Ana Taanga ni buaka Koka.

12A na kabanea itiua te nam'akaina Iteraera n tauniia maate ao ni kaitiaka aon te aba.

13A na bane aomata ni buobuoki n tauniia maate, ao a na karineaki i bukin te baei n te bong are e na nooraki iai raneanean mimitongiu.

14I mwiin nam'akaina aika itiua aikai, ao a na rineia aomata ake a na kakaei taian mate aika a tuai taunaki. E na karaoaki aei i nanon itiua te nam'akaina b'a e na kakoauaaki raoi b'a e a aki kam'araa aon te aba.

15Ngkana a boo ma riin te aomata, ao a na katea te kanikina i rarikina. Ao ana roko taan kenrua n taunna ni “M'aruan ana taanga ni buaka Koka”

16i rarikin te kaawa are “ana taanga ni buaka Koka.” Ao i mwiin, anne e na manga okira arona n itiaki aon te aba.

17Etekiera ae natin te aomata, N nang karaoa te baka n am'arake i aoni maungan nako Iteraera ma n anga te karea ikekei. Ma ngaia ae ko na kaoiia maanikiba ni kabane ma maan aika kawakawa ni kabane man taabo nako b'a a na am'arake n irikon te karea ao nima te raraa. A na am'arake mannikiba nako ma maan aika kawakawa nako

18n rab'ataia taan buaka ao taan tautaeka ma ianena ake N na kareaniia kaanga te tiibu, ke taian kooti, ke taiani kao.

19I tangiriia mannikiba nako ma maan aika kawakawa nako b'a a na am'arake ni karokoa a ngae ke ni mooi ni karokoa a koro.

20A na roko nakon Au taibora ao a na kaonia n irikon taian aoti ma taani buaka n aekaia nako. Bon aei Au taeka Ngai ae te UEA.

E Na Manga Kaokaki Aron IteraeraE taku te UEA:

21A na noora ootan mimitongiu bootanaomata n te aonnaba n tatabemaniia nako ngkana I katuaaia.

22A na ataia man te tai aei Iteraera b'a bon te UEA Ngai ae Atuaia.

23A na ataia botannaomata aika ianena b'a a kairoroaki Iteraera b'a a na kiitana oin abaia i bukina ngkai a bure nako iu. I tannako mairouia Au aomata ao I kariaia taiani kairiribai b'a a na buakaniia ma n tiringiia.

24A rangi ni buakaka ma ni buretoroia, ma ngaia are a riai ni katuaaeaki.

25Ngkai N nang kaota Au nanoanga nakoia Iteraera ma ni kaokiia mairouia ianena ake a maeka i buakoia. Bon kanoan Iakob'a ngaiia, ma ngaia ae, N na kakab'aiaia ma ni kaotia b'a I tabu.

26A na maeka ma te rau n oin abaia, ma a na mamaa ngkana a uring aia m'akuri aika a buakaka ma aroia ni kamamaaeai.

27Ane a na mataku botannaomata aika ianena ngkana I anaia Iteraera mai abaia kairiribai ma ni kaokiia nakon mwengaia, ao a na nooria botannaomata aikai b'a I bon tabu.

28A na ataia Au aomata b'a bon Ngai ae te UEA ae Atuaia ae I kanakoia b'a taenikai ao ngkai N nang kaokiia rikaaki nako oin abaia.

29N na aki manga tannako mairouia Au aomata aika Iteraera, ao E na maeka Tamneiu i nanoia. Bon aei Au taeka Ngai ae te UEA.