1Ao n ana katenua ni bong n aki mamatam Nei Etita, ao e a karina niiniirana ao e nako n tei i nanon m'aneaban te bareti, ni kaaitaraa te ru are e mena iai te kaintokanuea. Ao e boni mena ikekei te uea i aon ana kaintokanuea ni kaaitaraa te mataroa.
2Ao ngke e noora Nei Etita n teitei i tinaniku, ao e kukurei i rouna, ao e arora ana kainuea are te koora nakoina. Ao e waaki rake Nei Etita n riinga tabon te kainuea.
3Ao e titirakina Nei Etita, ao e taku, Tera ae ko tangiria te ueanaine ae Nei Etita, tuangai b'a tera ae ko tangiria, ao e na reke iroum, e aoria ngkana iteran abanueau ke kaub'aiu.
4Ao e kaeka Nei Etita, ao e taku, Ngkana ko butim'aea au buubuti te uea, ao I tangiriko ma Aaman, b'a kam na riki b'a au iruwa nakon au baka n am'arake nakon te b'akantaai, ae N na katauraoia i bukimi.
5Ao e kanakoa ana taeka te uea b'a e na kawaekoa Aaman n roko, b'a a aonga n riki b'a ana iruwa Nei Etita. Ma ngaia are, e a nako te uea ma Aaman nakon ana baka n am'arake Nei Etita.
6Ao ngke a tabe ni mooi n te wain, ao e taku te uea nakon Nei Etita, Ko na tuangai te b'ai ae ko tangiria, ao e na reke iroum. N na bon butim'aea am bubuti, e aoria ngkana ko butiai iteran abanueau.
7Ao e kaeka Nei Etita,
8Ngkana tao arona b'a e na kariaia te uea au bubuti, ao N na manga butiko riki ma Aaman b'a kam na manga riki naba b'a au iruwa nakon te baka n am'arake ningabong ae N na katauraoia i bukimi. Ao I a tuangko te b'ai ae I tangiria nakon te ingabong.
Ana M'akuri Aaman ni Iangoa Tiringan Moretekai.9Ao e rangi ni kukurei ma ni kim'areirei Aaman ngke e a oki man te baka n am'arake. Ma e a manga noora Moretekai i rarikin mataroan te bareti, ao ngke e aki teirake Moretekai nakoina, ke ni karinea ngke e ri rarikina, ao e rangi ni maraki nanona iai.
10Ma e keiaki n taotaona nanona ma n okira ana auti. Ao i mwiina, e kaoiia raoraona nakon ana auti, ao e butia buuna b'a e na raoniia naba.
11Ao e kamoaa nakoia n aron kaub'aina ma m'aitiia natina m'aane, ma aron te uea ngke e karikirakea nakoana, ma arona n rietaata riki nakoia raona n aobitia.
12Ao e reitanako ana taeka ma n taku, Ma ai moara riki aron Nei Etita are te ueanaine, b'a bon akea ae e a tia ni karaoa ana baka n am'arake i bukina, ma bon ti nakon te uea ao ngai, ao e a manga kaoiira naba b'a ti na manga oki nakon te ingabong.
13Ma e birinako kukureiu ni baikai ni kabane, ngke I a manga noora te I-Iutaia are Moretekai n tekateka i mataroan te bareti.
14Ao a kaeka buuna ma raoraona ma n taku, E aera ngkai ko aki karaoa te kainikabaeroroa ae uabwi ma uoua te miita ab'akina? Ao nakon te ingabong ko butia te uea b'a e na anganiko Moretekai, b'a ko na kabaea roroana, ao i mwiina, ko a nako nakon te baka n am'arake ma te kukurei.
Who We AreWhat We EelieveWhat We Do
2025 by iamachristian.org,Inc All rights reserved.
