Naum 1 - Kiribati New Version Bible

1Aio rongorongon Ninewe ake a reke iroun Naum n te mii. E maeka Naum n te kaawa ae Erekoti.

Unin te Atua N Eekaanako Ninewe

2E aki kariaia te UEA ae te Atua taiani buaka;

E katuaaia aika a kakaitaraa.

E kabooa mwin aia bure n unna.

3E aki kakaiun te UEA,

ao E m'aaka

ao E aki toki ni katuaaia taani bure.

E tei te angibuaka n te tabo are E nakonako iai te UEA;

bubun waena taian nang!

4E tua ao e ora taari.

E kaorai taiani karaanga.

A rai uteuten tawaanan Batian.

Ao Maungan Karemera e bitaki nakon te buraun,

Ao a b'ata ueen Reb'anon.

5A m'aiei maunga i matan te UEA,

ao a rannako tabuki.

E ingiing aonteaba ni kaotin te UEA.

A na ruru aonteaba ma aomata ake iai.

6Antai ae e kona ni maiu ngkana E un?

Antai ae e kona ni maiu i m'ain uran unna?

E otinako unna n ai aron te ai. A maerikiriki b'aa,

ma n riki ni bubu i matana.

7E raoiroi te UEA.

E kamanoia Ana aomata n tain taiani kaangaanga.

E kawakinia akana a rairaki nakoina.

8E kamaunaia ana kairiribai n ai aron rokon te ieka.

E kamateia ake a kakaitaraa.

9Ko iangoa ae e aki raoiroi nakon te UEA?

E na kamaunanakoko

B'a akea ae e kauoua kaaitaraana.

10Ngkami aika kam mamanging,

kam na kabuokaki n ai aron uteute aika a kateketeke,

aika a m'auteretere.

11Ninewe, e na nako mairoum te aomata ae e on nanona ni babaire aika a bubuaka, ao iango aika a eekaanako te UEA.

12Aio ana taeka te UEA nakoia ana aomata aika Iteraera: “E ngae ngke e korakora Aturia mani m'aiti ana aomata, a na boni b'aka mani mauna nako.” Au aomata, I bati ni karawawataingkami, ma N na bon aki manga karaoa riki aei nakoimi.

13N nang kanakoa m'aakan Aturia mai aom, ao N na motiki kabaeam ake taurekereke.

14Aio baireaia kaain Aturia iroun te UEA, “A na akea aia kariki, are a na kateimatoai araia n rooro rimwi. N na kab'akai aia bouannanti ake i nanon temboran atuaia ni kewe. I a katauraoa ngkai ruanimateia kaain Aturia-a aki katauaki b'a a na maiu!”

15Noria, e ri aon maunga n nakomai te tia uarongorongo, ma te rongorongo ae e raoiroi! I aon kawaina n taekina te tokanikai! Kaain Iuta, karaoi ami toa, ao angan te Atua baike kam a tia ni berita iai nakoina. A na aki konaa ni manga eweka abam aomata aika a buakaka. A tia ni bane ni kamaunaaki.