1E na nanoangaea Iteraera te UEA ao e na manga karikiia b'a ana aomata aika a rineaki. E na kaokiia nakon abaia, ao a na iraki irouia ianena b'a a na riki b'a Iteraera naba.
2A na kairaki nakon mwengaia irouia botannaomata ake tabeua, ao e na karikiia Iteraera b'a a na toro n te aba are aban te UEA.
Maten Uean B'aburon!3E na kainaomataingkami te UEA man nanokawakimi, rawawatami, ao tautoronakimi.
4Ao i mwiina, ane kam na b'ainingarea Uean B'aburon n anenei kuuna aikai:
E a mate te man ae e kakamaaku!
E a aki manga un nakoira.
5E a tia ni kamanatuai m'aakaia
uea ake a buakaka te UEA,
6ake a kiunuun
ma n aki toki ni kabuakakaia
aomatan botannaomata ake tekorakina.
7A bane ni wene n rau te aonnaba ni kabane;
a karaoa aia baka ni kukurei aomatana
ma taian anene ni kukurei.
8A kukurei Uean B'aburon
a karaoa naba aia baka ni kukurei
taian aroka naba aika taiani m'aiango
ao tiiran Reb'anon ao a taku,
Ti kaeinakoaki ngkoa,
ma akea ae e roko
ni korokoroira.”
9E a mate te aonnaba
ma ingainga ni kaantaningaiko.
a ongo taekan rokom
ma te kukurei ae e bati
tamneia taan tautaeka nikawai.
10A na kaangai n tatabemaniia,
“Ko a mamaara ngkai kaanga
aekakira naba n tatabemaniira nako!”
11A toki ikai
am kainikatonga ma am katangitang
n aia aonnaba maate.
Ko na rabuniko n taiani m'ata,
ao ko na kieniko n taian ino.”
12Ko a tia ni b'aka
Ngkoe ae te itoi ni ngaina ae e raneanea!
Ko kab'akaia botannaomata ake tabeua;
ao ngkai ko a kab'akaaki.
13Ko taku i bon iroum,
“N na tam'arakea karawa
ni kaaki au kaintokanuea iai
i etan taian itoi.
N na tekateka ikekei ma taian anti
ake a raroa nako i meang.
14N na mena i aon taian nang,
n aron te Atua ae Moan te Rietaata.”
15Ma ko a mena inano ngkai
i abaia maate.
16Ane a na miimi akana a nooriko
ao a na taraiko ao a na kaangai,
“Aio ngkoa te m'aane
are e karurua te aonnaba
man ioioi taian abanuea?
17E tauai taian kaawa aika a buubura ni kabane
ao e karika te aonnaba b'a te rereua?
Boni ngaia are e rawa
ni kaokiia buure nakoni mwengaia?”
18A taunaki taiani uea ngkana a mate
n taiani ruanimate aika a mimitong.
19Ma ngkoe ko na katukaki n aki taunaki,
ao te mate riki temanna
ae e wene i aan te wae
kaanga te m'aoto ni m'aanga.
Ko na riki b'a temanna mai buakoia
tautia aika a mate n te buaka
ao a ruorikaaki nakon
b'angab'angan te b'aa ae moan te nano.
20Ko na aki taunaki ma taiani uea:
ko urua abam
ao ko tiringiia am aomata.
Bon te mannikaakang ngkoe ae e buakaka!
Ti kaantaningaia b'a a na m'anuokinaki
taekaia am utu n aki toki.
21Ti na tiringiia natim m'aane
b'a kaboan
mwiin aia bure
aia bakatibu.
A na bon aki taua taekan te aonnaba
ke taiani kaawa aika a buubura
n taabo nako n te aonnaba.
22E a tia te UEA ae moan te M'aaka ni berita b'a e na buakaniia kaain B'aburon ao e na tiringiia aomata ake ikekei ni kabane, ma ngaia are, bon akea temanna mai buakoia ae e na manga ururingaki.
23E na kanakoia aomata te UEA, ao e na riki te aba b'a te tabo ae e aoneinei ae nneia maan aika a aki manana.
Katuaaean Aturia24E a tia ni karaoa te berita aei
te UEA ae Moan te M'aaka:
A na koro bukin b'aai nako
aika a I a tia ni baairei n aron are I taekinna.
25N na kanakoia kaain Aturia
mai abau,
ao N na kamanatuaia akana
a mena i aon taiani maunga.
N na kainaomataia au aomata
man te tautoronaki
irouia kaain Aturia.
26I a tia ni baairea te tai aei
i bukin te aonnaba,
ao e na tau aroia botannaomata
baiu ae e m'aaka.
27E a tia te UEA ae Moan te M'aaka
ni baairei baikai.
Akea ae e konaa ni katokai ngkai!
Katuaeakiia Kaain Biritia28E roko te rongorongo aei mai roun te UEA
n te ririki are e mate iai te Uea are Aati:
29Kam na aki kukurei kaain Biritia
ti i bukina
ngkai e a uruaki te kai
are kam oreaki iai.
E na manga riki te kai
b'a te naeta ae moan te boitin,
ao i mwiina, e a manga riki b'a te raakon ae te ai rab'atana ae e kibakiba.
30A nang reke aia uteute i bukin kanaia aia tiibu
aomata aika a maiu ni kainano aika a tangira buokaia
ao a na maeka ma te rau.
Ma N na kabakiia tabem'aang mai buakomi,
ao a na tiringaki tabem'aang.
31Kam na tang ma ni katuu ranin matami
ni mataroan nako taiani kaawa.
ngkami aika kaain Biritia!
E a roko te bubu mai meang,
ao a bane n tauraoi taiani tautia.
32Ngkana e roko te tia uarongorongo
man te botannaomata ae e raroa,
ao ko na kaangai nakoina:
“E karaoa Tion te UEA.
Ao e na reke naba ikekei te rau
iroun te aomata ae e rangi ni kainano.”
Who We AreWhat We EelieveWhat We Do
2025 by iamachristian.org,Inc All rights reserved.
