Nakoaia Ibonga 4 - Kiribati New Version Bible

Te Anga Karea i bukin te Bure ae Tiaki te Nano

1Aikai tuua ake E anga te UEA nakon Moote

2b'a e na tuangiia Iteraera ake a bure n urui ana Tua te UEA n tiaki nanoia.

3Ngkana tao te ibonga ae e bure ni kabuakakaia te botannaomata, ao e na uota te kao teteei ae te m'aane ae akea toabuakan rab'atana, ao e na tiringnga b'a ana karea i bukin ana bure.

4E na uota ana kao anne nako mataroan te Um'antabunrianna, ma ni katokaa baina i aon atuun te man, ao e na tiringnga ikanne i matan te UEA.

5Ao e na anaa te raraa te ibonga, ao e na uotia nako nanon te Um'antabunrianna.

6E na kateboa baina i nanon te raraa, ao e na tatauriia iai rokin te ruu are e tabu itiua te tai.

7Ao i mwiina, e na kararaaea koron koonan te baonikarea are i bukin karea aika boiarara, are i nanon te Um'antabunrianna. E na kabanea ni kab'aroa nikiran te raraa i oin te baonikarea are i mataroan te Um'antabunrianna.

8E na anai taian nenea man te kao anne ni kabane, n ikotaki ma nenean te kanoannano,

9ma te kirine ao neneana ake i aona, ao b'ain nako te ato aika a raraoi.

10E na anaa te nenea te ibonga ao e na kabuokia i aon te baonikarea are kakamanenaaki i bukin kabuokan taiani karea, kaanga ai aron naba are e karaoia nakon te man are e tiringaki i bukin te Karea n Raoi.

11Ma e na ana kunna, ma irikona ni kabane, ma atuuna, ma rangana, ma b'ain nanona, ma kanoannanona,

12ao e na uoti nako tinanikun te maeka n te tabo are a tetewenakoaki iai taiani mannang, ao e na kabuoki ikanne.

13Ngkana arona b'a ai bon te botannaomata ae Iteraera ae bure n urua ana Tua te UEA teuana n tiaki nanoia,

14ao n te tai are a ataa iai aia bure, ao e na uota ana kao teteei te bootaki n Iteraera b'a te karea ni kab'arabure. A na uotia nako matan te UEA n te Um'antabunrianna;

15A na katokai baiia taan kairiiri man te bootaki n Iteraera i aon atuun te man arei, ao e na tiringaki ikekei.

16Ao te ibonga e na uota te raraa teutana nako nanon te Um'antabunrianna,

17ao e na kateboa taboni baina i nanon te raraa, ao e na tatauriia rokin te ru are tabu iai itiua te tai.

18E na kararaaea koron te baonikarea n te b'ai ni kaboiarara are e kaakabubuaki, are e mena i nanon te Um'antabunrianna, ao e na kabanea ni kab'aroa nikiran te raraa i oin te baonikarea are i bukin kabuokan te karea, are e mena i mataroan te Um'antabunrianna.

19Ao i mwiina, e na anai ni kabane taian nenea, ao e na kabuoki i aon te baonikarea.

20E na karaoa ae ti te arona nakon te kao aei ma are e karaoia nakon te kao are i bukin te karea ni kab'arabure, ao ai anne ngkanne arona ni karaoa te angakarea i bukin aia bure aomata, ao a na kab'araaki aia bure iai.

21Ao i mwiina, e na uotaanako te kao nako tinanikun te kaawa, ao e na kabuokia ikanne n ai aron are e karaoia naba nakon te kao are te karea, are bon i bukin kab'araan ana bure. Ao ai anne ngkanne te angakarea i bukin kab'araan aia bure aomata.

22Ao ngkana arona b'a e reke n te bure te tia tautaeka n urua ana Tua te UEA teuana n tiaki nanona,

23ao e n a riai ni waekoa ni uota te kooti m'aane ae akea toabuakan rab'atana b'a ana karea.

24E na katokai baina i aon atuun ana karea, ao e na tiringnga n tanimeangin te baonikarea, n te tabo are a titiringaki iai maan i bukin te karea ni kabuokaki. Bon aio te karea i bukin kab'araan bure.

25E na kateboa tabonibaina te ibonga i nanon te raraa, ao e na kararaaea iai koron te baonikarea ake aua, ao e na kab'aroa nikirana ni kabanea i oin te baonikarea are b'ain kabuokan te karea ni kabuokaki.

26Ao e na manga kabuoki taian nenea ni kabane i aon te baonikarea n ai aron naba kabuokan nenean te man are e tiringaki i bukin te karea n raoi. Ao anne ngkanne aron te ibonga n anga te karea i bukin kab'araan ana bure te tia tautaeka, ao e na kab'araaki iai ana bure.

27Ao ngkana bon te aomata n aki akaaka ae bure n urua ana Tua te UEA teuana n tiaki nanona, ao ni bon te tai naba are e ataa iai ana bure anne,

28ao e na anga te kooti te aine ae akea toabuakan rab'atana b'a ana karea.

29E na katokai baina i aon atuun ana man, ao e na tiringnga i tanimeangin te baonikarea, n te tabo are a titiringaki iai maan i bukin te karea n ni kabuokaki.

30E na kateboa tabonibaina te ibonga i nanon raraan te man, ao e na kararaaea iai koron te baonikarea ake aua, ao e na kab'aroa nikirana i oin te baonikarea.

31Ao e na kanakoi taian nenea ni kabane, n ai aron naba kanakoakin nenean te man are tiringaki i bukin te karea n raoi, ao e na kabuokaki i aon te baonikarea b'a te karea ae boiarara nakon te UEA. Ao ai anne ngkanne aron te ibonga n anga te karea i bukin ana bure te aomata, ao e na kab'araaki ana bure.

32Ngkana e uota ana tiibu te aomata b'a ana karea ni kab'arabure, ao e na riai n anaa ana man te aine ae akea toabuakan rab'atana.

33E na katokaa baina i aon atuuna ao e na tiringnga i tanimeangin te baonikarea, n te tabo are a titiringaki iai maan i bukin te karea ni kabuokaki.

34E na kateboa tabonibaina te ibonga i nanon raraan te man, ao e na kararaaea iai koonan te baonikarea ake aua, ao e na kab'aroa nikirana ni kabane i oin te baonikarea.

35Ao e na manga kanakoi taian nenea ni kabane, n ai aron kanakoan nenean naba te tiibu are tiringaki b'a te karea n raoi, ao e na kabuokaki i aon te baonikarea, n ikotaki ma te am'arake are te karea nakon te UEA. Ao ai anne aron te ibonga n anga te karea i bukin ana bure te aomata, ao e na kab'araaki ana bure iai.