1Ao i mwiina, e na taetae Tamuera nakon te botannaomata n Iteraera ae b'anin.
Ao n te bong teuana a nako Iteraera ni buakaniia kaain Biritia. A katea aia kaemb'a i rarikin Ebenetera, ao kaain Biritia a katei kaemb'a i Abeki.
2Ao e rangi ni matoatoa aia buaka kaain Biritia. A kataenikaiia Iteraera ma n tiringiia e kaaniia 4,000 te aomata.
3Ao a okirikaaki tautian Iteraera nakon aia kaemb'a, ao a taku taani kairiiri, “E aera te UEA ngkai E kakonaakira n te bong aei irouia kaain Biritia? Ti na anaa te Atiniberita are a kaawakinaki iai aia boraraoi te UEA ma Iteraera. Ao ane na buokiira iai te UEA ni kamaiura mairouia ara kairiribai.”
4Ao a kanakoaki tautia tabeman b'a a na anaa te Atiniberita i Tiro, i bukina b'a iai Ana kaintokanuea te UEA i aon baiia baike a maiu i aon taubukin te Atiniberita.
Ao ngke a roko natin Eri m'aane ake uoman ake Obeni ma Bineati,
5ni uota te Atiniberita nakon te maeka, ao a takaarua ni kukurei tautia n te b'anaa ae moan te korakora n te aro are e m'aingiing te tano
6Ao a ongo te b'anaa kaain Biritia ao a taku, “Tera ae a bon takaarua iai kaain Ebera akekei?”
Ao ngke a ataia kaain Biritia b'a e a tia ni uotaki te Atiniberita nakon te Kaemb'a,
7ao a ruru ni maaku n te aro kaanga a mate ao a taku,
E a roko te atua n aia kaemb'a. Ti a bon reke n te kangaanga ngkai. E bon tuai man reke te aro aei nako ira mai m'aaina.
8Ti a bon reke n te kangaanga ae moan te ab'ab'aki! Antai ae kona ni kamaiura mairouia atua aika m'aaka akekei? Bon taian atua naba ake a karaoi b'aai aika kakamaamate ngkoa nakoia kaain Aikubita i nanon te rereua.
9Kaain Biritia, kam na ninikoria ao kakorakoraingkami ni buaka! Ngkana kam aki ao ae a na tautaekaniira kaain Ebera aikai, n arora ngke ti tautaekaniia ngkoa. Kam na buaka ao kam na aki maaku.
10Ao a buaka kaain Biritia. A tiringiia 30,000 m'aitiia tautian Iteraera, ao nikiraia a birinako nakon mwengaia.
11Ao a mate Obeni ma Bineati, ao e anaaki te Atiniberita.
Maten Eri12Ao e biririkaaki man te bonibuaka nako Tiro temanna te tautia man te baronga are Beniamin. E a tia n raeuaka ana kunnikai ao e tauna atuuna n te tano ni kaota rawawatan nanona.
13Ao e nakon te kaawa man taekina rongorongon te buaka, ao a bane n tang aomata.
Ao e nako nanon Eri n te Atiniberita b'a tera ae nang karaoaki nako iai. Ma ngaia are, e tekateka i aon ana kaintekateka i rarikin te kawai ni kakantaninga.
14E a bon koro 98 ana ririki ni maiu ao e a mataki,
15ma e ongongo tangiia aomata ni kabane ngke a tang, ao e taku, “Tera te karongoa arei?”
Ao e kawaekoa te tautia arei ni kawara Eri ao e taku nako ina,
16“I birinako man te buaka n te bong aei ni birimai.”
Ao e taku Eri, “Nao, ao tera ae riki?”
17Ao e taku te tautia arei, “A birinako Iteraera mairouia kaain Biritia. Ao m'aitiia ara aomata ake a tia n tiringaki, n reitaki naba ma natim m'aane ake uoman, ake Obeni ma Bineati. Ma te b'ai riki ae moan te buakaka b'a e a uotakinako te Atiniberita.”
18Ao e bon tabe naba n tekateka Eri i aon te kaintekateka i rarikin oon mataroan te kaawa. Ao ngke e ongo ana taeka te m'aane arei are a uotaanako te Atiniberita kaain Biritia, ao e einako ni b'aka. E a bon rangi ni kara man aki konab'ai, ma ngaia are, ngke e b'aka ao e m'aoto roroana, ao e mate. E a tia n riki b'a te tia kairiiri Eri i aon Iteraera i nanon 40 te ririki.
19Ao e a kaani bung buun Bineati. Ao n te tai ae aki maan i mwiin ongona b'a e a tia n anaaki te Atiniberita, ao a tia naba ni mate buuna ma tamana, ao e a bungiia te tei. E bon rangi ni matoatoa aron bungina,
20ao e mate. Ma e taku te aine are kakaawakinna, “Ko na aki maaku b'a te m'aane!”
Ao e aki rangi n tabe ma ngaiia.
21ma e bon tiku naba n ana iango are nanokaawakina i bukin buan buuna ma taman buuna.
22Ma ngaia are, e taku, “E na aranaki natiu te m'aane b'a Ikabota, i bukina b'a e a kiitana abara te mimitong ngke anaaki te Atiniberita.”
Who We AreWhat We EelieveWhat We Do
2025 by iamachristian.org,Inc All rights reserved.
