Iotua 21 - Kiribati New Version Bible

Aia kaawa te baronga are Rewi

1Ngke a bon tabe naba ni kaemb'a aomatan Iteraera i Tiro n te aba are Kanaan, ao a m'ananga mataniwiin utu man te baronga are Rewi ni kawara Ereata are te ibonga, ma Iotua are natin Nun, ma atun utuun Iteraera ni kabane,

2ao a kaangai nakoia, “E a tia ni mwiokoa Moote te UEA b'a e na anganira taian kaawa b'a nnera ni maeka, ao taian tawaana n uteute naba akana i rarikin kaawa akanne i bukiia ara nanai ni man.”

3Ma ngaia are a anganaki aia kaawa ma aia tawaana n uteute te baronga are Rewi i rouia aomatan Iteraera man abaia nako n ai aron Ana mwioko te UEA.

4A moan anganaki aia kaawa utuun Rewi, man te kaainga are Koata. A anganaki utuun kanoan Aron tebwi ma tenua kaawa aika a buubura man abaia te baronga are Iuta, ma Timeon, ao Beniamin.

5Ao a anganaki tebwiina aia kaawa nikiran te kaainga are Koata man abaia te baronga are Eberaim, Taan, ao Manate maeao.

6A anganaki tebwi ma tenua aia kaawa te kaainga are Kerition man abaia taian baronga ake Itakara, Atera, Nabetari, ao Manate mainiku.

7A anganaki tebwi ma uoua aia kaawa kanoan Merari man abaia te baronga are Reuben, Kata, ao Teburun.

8A karaoa tib'aakin kaawa ma taian tawaana Iteraera nakoia te baronga are Rewi n te katekeraoi n aron ana mwioko te UEA nakon Moote.

9Aikai aran kaawa ake a anaaki man abaia te baronga are Iuta ao Timeon ao a anganaki

10kanoan Aaron are kaain te kaainga are Koata, are ana kariki Rewi. Boni ngaia te moan anganaki aia kaawa.

11Ao a anganaki te kaawa are Areb'a (Areb'a bon taman Anaka), ma e a aranaki ngkai te kaawa anne b'a Eberon, are n aaba ake tabukibuki i Iuta, ni ikotaki ma tawaana ake a katobibia.

12Ma e ngae n anne ao e a kaman anganaki Kareb'a are natin Iebunne tawaanan te kaawa, ma taian kaawa naba aika a uarereke ake i rarikiia b'a ana b'ai.

13Ao aikai naba kaawa ake a anganaki naba kanoan Aaron ake ibonga i rarikin Eberon (te kaawa ni kamauri teuana): Ribena,

14Iatira, Etitemo,

15Oron, Tebira,

16Ain, Iuteta, ao Beta-temeti. Ao ni ikotaki naba ma taian tawaana n uteute. Bootan kaawa ake anganaki man baronga ake Iuta ma Timeon, bon ruaiwa.

17A anganaki naba aua kaawa man abaia te baronga are Beniamin aika kaawa aika: Kibeon, Keeb'a,

18Anatota, Aremon, ni ikotaki ma tawaana n uteuten taian kaawa aikanne.

19Bon tebwi ma tenua bootan kaawa aikanne, ma taian tawaana n uteute. Aikai kaawa ake a anganaki ibonga ake kanoan Aaron.

20Ao a anganaki naba utuun Rewi ake te korakina ake kaain te kaainga are Koata kaawa tabeua man abaia te baronga are Eberaim,

21A anganaki aua aia kaawa aika a buubura aika: Tekem ma ana tawaana n uteute n aaba ake a tabukibuki i Eberaim (te kaawa ni kamauri teuana), Ketere,

22Kibetaim ao Beta-oron ma aia tawaana n uteute.

23Aikai naba kaawa aika aua ake a anganaki man te baronga are Taan, Ereteke Kibeton

24Aiiaron, Kata-rimmon, n airi ma aia tawaana n uteute.

25Ao uoua naba aia kaawa ake a anganaki man abaia te baronga are Manate maeao b'a Taanaka ao Kata-rimmon, n airi naba ma aia tawaana n uteute.

26Bootan aia kaawa utuun te kaainga are Koata ake a anganaki bon tebwiina, aika a airi ma aia tawaana n uteute.

27Ao te koraki teuana are kaain te kaainga are Rewi, are kanoan Kerition, a anganaki tebwi ma teuana aia kaawa man abaia te baronga are Manate mainiku, aika kaawa aika: Koran are i Batian (te kawa ni kamauri teuana) ao Beetitera, ao n airi naba ma aia tawaana n uteute.

28A anganaki naba aua aia kaawa man abaia te baronga are Itakara aika: Kition, Taberata,

29Iaremuta, En-kannim, ao a airi naba ma aia tawaana n uteute.

30A anganaki naba aua aia kaawa man abaia te baronga are Atera aika: Mitiara, Abeton,

31Erekata, ao Reoba. Ao a airi naba ma aia tawaana n uteute.

32A anganaki naba tenua aia kaawa man abaia te baronga are Nabetari aika: Keteti i Kariraia, ma ana tawaana n uteute (te kaawa ni kamauri teuana), Ammotatora, ao Karetan, ma aia tawaana n uteute.

33Bootan kaawa ake a anganaki kanoan Kerition bon tebwi ma tenua, aika a airi ma aia tawaana n uteute.

34A anganaki kanoan Merari ake nikiraia te baronga are Rewi, aua aia kaawa man abaia te baronga are Teburun aika: Iokeneam, Kareta,

35Rimna, ao Naarara. Ao a airi naba ma aia tawaana n uteute.

36A anganaki naba aua aia kaawa man abaia te baronga are Reuben aika: Betera, Iaati,

37Ketemota, ao Meb'ata, ao a airi naba ma aia tawaana n uteute.

38Man te baronga are Kata ao a anganaki naba aua aia kaawa aika: Ramota are i Kireata (te kaawa ni kamauri teuana), Maanaim,

39Etibon, ao Iatera, ao a airi naba ma aia tawaana n uteute.

40Ma ngaia are a anganaki kaaingan Merari tebwi ma uoua aia kaawa.

41Bootan aia kaawa te baronga are Rewi man abaia aomatan Iteraera bon abwi ma m'aane,

42ao a airi ma aia tawaana n uteute i rarikiia nako.

Tekatekaia Aomatan Iteraera n te Aba

43Ma ngaia are e anganiia aomatan Iteraera ni kabane abaia te UEA n aron are E a tia n taekinna n ana berita ae tabu nakoia aia bakatibu b'a E na anganiia. Ao a bon maekanna b'a ai bon abaia.

44E anga te rau te UEA nakoia ni kabutaa aonteaba n ai aron are e a tia ni berita iai nakoia aia bakatibu. Bon akea riki ana kairiribai Iteraera ae kona ni manga eekaanako Iteraera b'a E angaanga te tokanikai te UEA nakoia Iteraera i aoia aia kairiribai ni kabane.

45E kakoroi bukin ana taeka te UEA ni kabane n aron are E a tia ni berita iai nakoia aomatan Iteraera.